Read Chimborazo Highland Quichua 2 CRÓNICAS 23 Bible Online

2 CRÓNICAS 23 - Chimborazo Highland Quichua bible

2 CRÓNICAS 23

¹Ña canchis huata tucujpimi, Joiada curaca patsaj soldadocunata mandajcunata cayaj cacharca. Chai mandajcunaca caicunami: Jerohampaj churi Azarías, Johananpaj churi Ismael, Obedpaj churi Azarías, Adaiapaj churi Maasías Zicripaj churi Elisafatpishmi carca. Paicunata tandachishpaca, paihuan shuj yuyailla tucuchunmi ari nichirca.

²Chai soldadocunami, Judá llajtapi caj tucui pueblocunamanta levitacunata Jerusalenman pushamurcacuna. Shinallataj familiacunata pushajcunatapishmi tucuicunata Jerusalenman pushamurcacuna.

³Tucuicuna chaipi tandanacushpami, Diospaj huasipica tucuicuna shuj yuyailla tucurcacuna. Joiada curaca, paicunataca: “Jatun mandaj Ocoziaspaj churica caipimi. Paimi Mandaj Dios Davidman: Cambaj huahua huahuacunataca mandanamanta manataj anchuchishachu nishca shinallataj, jatun mandaj canga.

⁴Cunanca caita ruraichij: Samana punllapi Diospajta ruranaman shamuj curacuna, levitacunaca quimsapi c'hicanchishpa, shuj mirgaca Diospaj huasi pungupi cuidaichij.

⁵Caishuj mirgaca, mandashpa tiyana huasipi cuidagrichij. Caishuj mirgaca, callari rumicuna shuti pungupi cuidanguichij. Chashnallataj tucui caishujcunaca, Diospaj huasi ñaupaj ucupi cachun.

⁶Diospaj huasimanca, Diospajta ruraj curacuna, levitacunalla yaicunguichij, pi shujtajca ama yaicuchun. Diospajta rurangapaj allichirishca cashcamanta, paicunallami yaicunga. Caishujcunaca Mandaj Diosmanta cuidanguichij.

⁷Levitacunaca tucuicuna macanacunacunata maquipi aisashca jatun mandajpaj muyujta shayaringuichij. Maijanpish Diospaj huasi ucuman yaicusha nijpica, huañuchinguichijlla. Jatun mandaj maiman llujshijpipish, tigrashpa yaicujpipish paihuan puringuichij” nircami.

⁸Levitacunapish, Judá llajtapi causaj tucui caishujcunapish, Joiada cura mandashca shinallatajmi rurarcacuna. Mandaj levitacunaca cada samana punllapi Diospajta rurajcunapish, semanata tucuchishpa llujshicujcunapishmi, paicuna mandacun levitacunahuan carcacuna. Joiada curaca, semanata tucuchishpa ricujcunatapish mana richun saquircachu.

⁹Chaipimi Joiada curaca, Taita Diospaj huasipi huaquichishca tiyacuj jatun mandaj Davidpaj lanzacunatapish, escudocunatapish, patsaj soldadocunata mandajman curca.

¹⁰Chai q'uipaca tucui chaipi cajcunaca paicunapaj maquipi espadacunata aisashcami, Diospaj huasi pungu ñaupajpica alli lado c'uchumantaca, lluqui lado c'uchucama, altar muyundijta shayarishpa jatun mandajtaca cuidacurcacuna.

¹¹Chaipimi Joiada curaca jatun mandaj Ocoziaspaj churita llujshichishpa coronata churachishpa, jatun mandaj ima shina canata, ima shina mandana cashca quillcata cushpa, paipaj umapi aceiteta churashpa jatun mandaj cachun churarca. Chai q'uipaca tucuicunami: “¡Viva jatun mandaj!” nishpa caparircacuna.

¹²Jatun mandaj nishpa achcacuna caparishpa callpacujta uyashpami, Atalía huarmica Mandaj Diospaj huasipi tucui tandanacushcacunapajman rirca.

¹³Chaipica, Diospaj huasiman yaicunapi caj pilar c'uchupi, jatun mandaj shayacujta, shujtaj mandajcunapish shayacujta, trompetapi tocajcunapish paipaj c'uchupi tocacujta, tucui chaipi cajcunapish cushicushpa bocinacunapi tocacujta, Diosta cantajcunapish tocanacunapi tocashpa, Diosta alabashpa cantacujtami ricurca. Chaimi Atalía huarmica paipaj churanata lliquirishpa: — ¡Huashallamari ñucata surcushcacuna! — nishpa caparirirca.

¹⁴Chaimi Joiada curaca, patsaj soldadocunata mandajcunata chai ucumanta llujshichishpaca: — Mandaj Diospaj huasimanta chai huarmita canllaman llujshichichij. Maijanpish paita mishajtaca espadahuan huañuchichij. Mandaj Diospaj huasipica ama huañuchichijchu — nirca.

¹⁵Chai soldadocunaca Atalía huarmita japishpami caballocunata llujshichina punguta llujshichishpa, mandashpa tiyana huasiman apashpa chaipi huañuchircacuna.

¹⁶Chai q'uipaca Joiada curaca, tucui chaipi cajcunatapish, jatun mandajtapish Mandaj Diospajllata rurashpa causachun ari nichirca.

¹⁷Chai llajtapi causajcuna Baalpaj huasiman yaicushpaca tucuitami urmachircacuna. Chaipi tiyaj altarcunatapish, rurashcalla dioscunatapish urmachishpa tucuimi ñuturcacuna. Baalpaj Matán nishca curatapish chai altar ñaupajllapitajmi huañuchircacuna.

¹⁸Joiada curaca, Mandaj Diospaj huasipica curacunata, levitacunatami imalla rurana cashcapi churarca. Davidca Mandaj Diospaj huasipica curacunata, levitacunatami Moisés mandashca quillcapi nicushca shinallataj Diosman animalcunata cushpa tucui rupachinaman huashan, huashan shamuchun mandashca carca. Shinallataj David mandashca shina cushicushpa cantachunmi churashca carca.

¹⁹Mandaj Diospaj huasiman yaicuna pungucunapipishmi cuidajcunata churarca. Ima mana allita rurashca cashpa manaraj allichirishca cajtaca, ama chai ucuman yaicujta saquichunmi, chaipipish cuidachun churarca.

²⁰Chai q'uipaca, Mandaj Diospaj huasimantaca patsaj soldadocunata mandajcunahuanpish, mandajcunapura cajcunahuanpish, Judá llajtapi causajcunata mandajcunahuanpish, tucui chaipi cajcunahuanpishmi jatun mandajtaca mandashpa tiyana huasiman ñaupaj lado punguta pusharcacuna. Chashna pushashpami jatun mandajtaca, jatun tiyanapi tiyachircacuna.

²¹Chashna rurashpaca, tucuicunami jatunta cushicurcacuna. Ataliata espadahuan huañuchishcamantami, Jerusalenpi causajcunaca casijlla saquirircacuna.