Read Chimborazo Highland Quichua 2 CRÓNICAS 26 Bible Online

2 CRÓNICAS 26 - Chimborazo Highland Quichua bible

2 CRÓNICAS 26

¹Amasías huañujpica, Judá llajtapi causajcunaca tucuicuna shuj yuyailla tucushpa, paipaj churi Uziastami paipaj randi jatun mandaj cachun churarcacuna. Uziasca chunga sujta huatayujllami carca. Uziasca paipaj yaya huañushca q'uipa mandai callarishpaca, Judá llajtapajllataj cachunmi Elot shuti pueblota allichirca.

³Uziasca mandai callarinapajca chunga sujta huatayujmi carca. Pichca chunga ishqui huatatami Jerusalenpi mandarca. Paipaj mamaca Jerusalenllamantataj Jecoliasmi carca.

⁴Uziasca tucui imapipish paipaj yaya Amasías shinallatajmi, Mandaj Diospaj ñaupajpica, ima pandata mana rurarca.

⁵Zacariasca causashcacamaca, Taita Dios yuyaillami causarca. Zacariasca, muscuipi shina Taita Dios ricuchishcata alli yachajmi carca. Shinallataj Mandaj Diospish, Uzías paillata mañajpica, tucuipimi alli pusharca.

⁶Uziasca, filisteocunahuan macanacugrishpaca Gat, Jabnia, Asdod shuti pueblocuna muyundij jatun pircacunatami urmachirca. Chaimantaca Asdod pueblo c'uchupipish, filisteocunapajllataj caj caishuj llajtacunapipishmi pueblocunata rurarca.

⁷Taita Diosca, Uziastaca filisteocunahuan macanacuipipish, Gur-baal pueblopi causaj arabecunahuan macanacuipipish, amonitacunahuan macanacuipipishmi mishachirca.

⁸Amonitacunaca, Uziasmanmi convidanacunata cujcuna carca. Uzías chai llajtacunacama mandashpa cazuchij cajtaca, Egiptohuan tupanacunpi caj llajtacamami yachaj chayarcacuna.

⁹Jerusalenpica, esquinapi caj pungupipish, pugru pambaman llujshina pungupipish, caishuj esquinapipishmi torrecunata rurarca. Tucui muyundij jatun pircatapishmi ashtahuan sinchita rurarca.

¹⁰Shitashca pambapipishmi torrecunata rurarca. Achca animalcunata charishcamantami, Sefela pambacunapipish, caishuj pambacunapipish achca pugyucunata rurashpa yacutapish surcurca. Shinallataj urcucunapipish, alli p'ucuj pamba allpacunapipishmi uva chagracunatapish, shujtaj chagracunatapish achcata charirca. Paica chagracunata ruranata achcata munashcamantami, chashna rurarca.

¹¹Uziasca jatun macanacuipajca, achca soldadocunatami charirca. Chai soldadocunaca macanacuimanca, jatun mandajpaj quillcaj Jeielpish, Maasías mandajpish mandashpa quillcashca shinallatajmi, mirga mirga llujshijcuna carca. Chai soldadocunataca, jatun mandajllataj churashca mandajcunapuramanta Hananías mandajmi mandaj carca.

¹²Tucui soldadocunata mandaj, ashtahuan c'ari c'ari caj soldadocunaca, 2.600 soldadocunami carca.

¹³Chai soldadocunaca: Alli macanacunata yachaj, 307.500 c'ari c'ari soldadocunatami mandajcuna carca. Chaicunami p'iñajcunahuanca, jatun mandaj Uziasmanta macanacujcuna carca.

¹⁴Uziasca, chai tucui soldadocunapajmi escudocunatapish lanzacunatapish umapi churarina fierro cascocunatapish, cuerpopi churarina fierro churanacunatapish, arcocunatapish, rumicunata shitangapaj huaracacunatapish rurachirca.

¹⁵Shinallataj Jerusalenpipish, macanacuipajmi alli yachajcunahuan jatun macanacunacunata rurachirca. Chai macanacunacunataca, torrecunapimi churarca. Shinallataj baluartecunatapishmi churarca. Chaicunahuanmi chai jahuamantaca puntajlla caspicunatapish, jatun rumicunatapish shitashpa macanacuj carca. Pai chashna yachaj cashcataca, caru llajtacunapi causajcunapishmi yachaj chayarcacuna. Taita Diosmi paitaca, tucuipi alli pushashpa chashna jatunta rurarca.

¹⁶Uziasca, ña tucuita mandai callarishpaca, jatun tucushpami llaqui tucurca. Paita Mandaj Taita Diosta c'ariyashpami, Mandaj Diospaj huasi ucuman yaicushpaca inciensota rupachina altarpi inciensota rupachirca.

¹⁷Chashna ruranaman yaicujpica paita catishpami, Mandaj Diospajta ruraj Azarías curaca c'ari c'ari pusaj chunga curacunahuan yaicurca.

¹⁸Paicunami jatun mandaj Uziastaca, p'iñarishpataj cashna nircacuna: “Uzías, Mandaj Diosman inciensota cushpa rupachinaca mana cambaj ruranachu. Aaronpaj huahua huahua curacunallami caitaca rurai tucun. Paicunaca caita ruranapajtaj Diospajlla ch'icanyachishca cashpallami, caitaca rurancuna. Diospajlla ucumanta llujshi. ¿Ima nishpataj chashna mana allita rurashpaca, canta Mandaj Diosta p'iñachinaman shamunguiyari? Chashna rurashcamantaca, Diosca mana alli ningachu” nircacunami.

¹⁹Chashna nijpica Uziasca, curacunahuanca yallitajmi p'iñarirca. Paica Mandaj Diospaj huasi ucupica inciensota rupachina altar ñaupajpimi, inciensota rupachinapi inciensota aisashca shayacurca. Chaipi shayacushpa curacunahuan p'iñarijpica, tucui curacunapaj ñaupajpimi, paipaj frentepi lepra ungüi llujshirca.

²⁰Curacunata Mandaj Azariaspish, caishuj curacunapish, paipaj ñahuita ricushpaca, frentepi lepra llujshishcatami ricurcacuna. Chaimantami chai ucumanta llujshichircacuna. Uziasca Mandaj Dios llaquichishcamantami, chai ucumantaca paillatajpish utca llujshirca.

²¹Jatun mandaj Uziasca huañungacamami, chai lepra ungüihuan causarca. Chaimantami pai jatun mandajca, lepra ungüi japishcacuna shinallataj shuj ucupi pailla causarca. Mandaj Diospaj huasiman cutin yaicuchunpish, ña mana saquircacunachu. Pai chashna ungushca cajpica, Jotam shuti paipaj churimi Judá llajtataca paipaj randi mandarca.

²²Uzías ashtahuan imallata rurashcataca, Amozpaj churi profeta Isaiasmi callarimanta tucuricama quillcarca.

²³Uzías paipaj ñaupa yayacunahuan dormijpica: “Caica lepra ungüihuanmi carca” nishpami, paipaj yayacunata pambashca c'uchulla jutcupi pambarcacuna. Paipaj randica paipaj churi Jotammi mandarca.