Read Chimborazo Highland Quichua 2 CRÓNICAS 27 Bible Online

2 CRÓNICAS 27 - Chimborazo Highland Quichua bible

2 CRÓNICAS 27

¹Jotamca, mandai callarinapajca ishqui chunga pichca huatayujmi carca. Paica chunga sujta huatatami Jerusalenpi mandarca. Paipaj mamaca, Sadocpaj ushushi Jerusami carca.

²Jotamca, paipaj yaya Uzías shinallatajmi Mandaj Diospaj ñaupajpica, ima pandata mana rurarca. Shina cashpapish, Mandaj Diospaj huasimanca mana yaicurcachu. Ashtahuanpish Judá llajtapi causajcunaca millaita rurashpa catircallami.

³Jotammi, Mandaj Diospaj huasi ñaupaj punguta rurachirca. Shinallataj ashtahuan jatun pirca jahuapipish ashtahuanmi pircachirca.

⁴Judá llajtapi caj urcucunapica, shujtaj pueblocunatapishmi rurachirca. Miticuna jatun torrecunatapishmi yura chaupicunapi rurachirca.

⁵Amón llajtapi causajcunata jatun mandajhuan macanacushpapish, paimi misharca. Chaimantami Amón llajtapi causajcunaca, chai huataca patsaj talento cullquita, 10.000 coro trigota, 10.000 coro cebadatapishmi curcacuna. Caishuj ishqui huatapipish, quimsa huatapipish chashnallatajmi curcacuna.

⁶Jotamca, Mandaj Diospaj ñaupajpi allita rurashpa causashpami, tucui imapipish alli carca.

⁷Jotam ashtahuan imallata rurashcata, soldadocunahuan rishpa macanacushcata, ima shujtajta rurashcata ashtahuan yachasha nishpaca, Israel llajtata jatun mandajcuna, Judá llajtata jatun mandajcuna imallata rurashcata quillcashca libropimi ricuna.

⁸Jotamca, mandai callarinapajca ishqui chunga pichca huatayujmi carca. Paica chunga sujta huatatami Jerusalenpi mandarca.

⁹Jotam huañushpa paipaj ñaupa yayacunahuan dormijpica, Davidpaj pueblopimi pambarcacuna. Paipaj randica paipaj churi Acazmi mandarca.