Read Chimborazo Highland Quichua 2 CRÓNICAS 33 Bible Online

2 CRÓNICAS 33 - Chimborazo Highland Quichua bible

2 CRÓNICAS 33

¹Manasesca, Judá llajtata mandai callarinapajca chunga ishqui huatayujmi carca. Paica pichca chunga pichca huatatami Jerusalenpi mandarca.

²Manasesca Mandaj Diospaj ñaupajpica, yallitaj millaitami rurarca. Paica Mandaj Dios israelcunapaj ñaupajmanta llujshichishpa cachashca runacuna rurashca millanana ruranacunatami rurarca.

³Paica lomacunapi tiyaj altarcunata paipaj yaya Ezequías urmachishcatami cutin shayachirca. Baal diospaj altarcunatapish rurachircami. Asera huarmi diosman rijchajcunatapish rurachircami. Jahua pachapi tucui imalla tiyajcunatapish adorarcami. Chaicunatami llaquihuai nishpa adorashpa mañarca.

⁴Mandaj Diosca: “Jerusalenpi caj ñuca huasipimi, huiñaipaj ñucata shutitaca churani” nircami. Chai huasipipish altarcunata rurachircami.

⁵Mandaj Diospaj huasi canllapipish, ishquindij ladopimi jahua pachapi tucui imalla tiyajcunapaj altarcunata rurachirca.

⁶Manasesca, rurashcalla dioscunaman paipaj churicunata cushpami, Hinompaj churipaj pugru pambapi rupachirca. Imalla punllacunapi imalla tucunata yachajpish, adivinajpish, adivinocunata tapujcunapish, muspachij yumbucunata tapujpishmi carca. Mandaj Diospaj ñaupajpi chashna jatun millaita rurashpami, Diostaca yallitaj p'iñachirca.

⁷Mandaj Diosca Davidmanpish paipaj churi Salomonmanpish: “Tucui israelcunapaj aillupuramanta agllashca Jerusalenpi churashca ñuca huasipimi ñuca shutitaca huiñaipaj churani nircami. Chai huasipimi Manasesca fierrota yacuyachishpa rurashcalla diosta churarca.

⁸Israelcunapaj ñaupa yayacunataca ñucami cai llajtapi causachun churarcani. Chaimantaca, ñuca tucui imallata mandashcatapish, Moisesta quillcachishpa ñuca paicunaman cushca quillcacunapi tiyacujtapish, imalla huillachishcatapish tucuita pajtachishpataj causachunlla. Chashna causajpica israelcunataca, cai llajtamantaca manataj llujshichishpa cachashachu” nishcami carca.

⁹Ashtahuanpish Manasesca, Judá llajtapi, Jerusalén pueblopi causajcunataca, Mandaj Diosllataj israelcunapaj ñaupajpi tucuchishca runacunatapish yalli millaitami rurachirca. Chashna rurachishpami, Diosmanta anchuchirca.

¹⁰Mandaj Diosca Manasestapish, pai agllashca israelcunatapishmi rimarca. Chashna cajpipish, paicunaca mana cazurcacunachu.

¹¹Chaimantami Mandaj Diosca paicunata llaquichichunca, Asiria llajtata jatun mandajpaj soldadocunata mandajcunata apamurca. Paicunami Manasestaca, cadenacunahuan huatashpa Babilonia llajtaman prezu aparcacuna.

¹²Shina cashpapish llaquita apacushpaca, Manasesca paipaj ñaupa yayacunapaj Diospaj ñaupajpica tucui shunguhuanmi llaquirirca. Chashna llaquirishpami Mandaj Diostaca mañarca.

¹³Pai mañashcata Diosca uyashpami, Judá llajtata paillataj mandashpa catichun Jerusalenman tigrachirca. Chashna rurajpimi Manasesca, Mandaj Diostaca Diostaj cashcata yacharca.

¹⁴Chai q'uipami Manasesca, Davidpaj pueblo muyundij canlla ladotaca jatun pircata rurarca. Pugru pambapi caj Gihón pugru ch'imbapurapi caj inti huashicun ladomanta pircanata callarishpaca, Chalhuacunahuan yaicuna pungucamami pircarca. Chai q'uipami, Ofel shuti mirga pueblo muyundijtapish ashtahuan jatun pircata rurarca. Shinallataj Judá llajtapi caj pueblocunapica, muyundijta jatun pircacunayuj tucui pueblocunapimi cuidaj soldadocunata churarca.

¹⁵Mandaj Diospaj huasimantaca shujtajcunapaj dioscunatapish, paillataj rurachishpa churashca diostapishmi anchuchirca. Mandaj Diospaj huasi lomapi rurashca altarcunatapish, Jerusalén pueblo chaupicunapi rurashca altarcunatapish tucui urmachishpami, pueblomanta llujshichishpa shitarca.

¹⁶Chai q'uipaca Mandaj Diospaj altarta allichishpami, Dioshuan alli tucungapajpish, pagui ningapajpish sacrificiota cushpa chai altarpi rupachirca. Shinallataj Judá llajtapi causajcunatapishmi, israelcunata Mandaj Diospajta rurachun mandarca.

¹⁷Chashna mandajpica, paicunaca paicunata Mandaj Diosman animalcunata cushpapish, lomacunapi tiyaj altarcunallapitajmi sacrificiocunata cujcuna carca.

¹⁸Manasés paipaj tucui causaipi ashtahuan imallata rurashcapish, Taita Diosta pai mañashcapish, israelcunata Mandaj Dios ricuchishcata huillajcuna Diospaj shutipi paita rimashcapish, Israel llajtata jatun mandajcuna imallata rurashcata quillcashcapimi tiyacun.

¹⁹Taita Diosta pai mañajpi cutichishcapish, Diosta mana cazushpa paimanta anchurishpa millaita rurashpa causashcapish, Dios ima nishcata paiman huillajcuna quillcashcapimi tiyacun. Shinallataj Diospaj ñaupajpi manaraj llaquirishpa, maillapi Asera huarmi diosman rijchajcunata churashcapish, shujtaj dioscunata rurashcapish, lomacunapi altarcunata rurashcapish ima tucunata huillajcuna quillcashcallapitajmi tiyacun.

²⁰Manasés huañushpa paipaj ñaupa yayacunahuan dormijpica, mandana huasi c'uchupimi pambarcacuna. Paipaj randica, paipaj churi Amonmi mandarca.

²¹Amonca, Judá llajtata mandai callarinapajca ishqui chunga huatayujmi carca. Ishqui huatatami Jerusalenpi mandarca.

²²Amonca paipaj yaya Manasés rurashca shinallataj millaitami Mandaj Diospaj ñaupajpica rurarca. Paipaj yaya Manasés rurachishca tucui dioscunaman sacrificiocunata cushpami, chaicunapajta rurarca.

²³Chashna rurashpapish, Mandaj Diospaj ñaupajpi paipaj yaya Manasés llaquirishca shinaca, mana llaquirircachu. Ashtahuanpish ashtahuan millaita rurashpami causarca.

²⁴Jatun mandaj Amontaca paipajta rurajcunallataj huashalla shujtajcunahuan yuyarinacushpami, paipaj huasillapitaj huañuchircacuna.

²⁵Huashalla yuyarinacushpa jatun mandaj Amonta huañuchijcunatapish, Judá llajtapi causajcunaca tucuicunata huañuchishpami, Amonpaj randica paipaj churi Josiasta mandachun churarcacuna.