Read Chimborazo Highland Quichua 2 CRÓNICAS 7 Bible Online

2 CRÓNICAS 7 - Chimborazo Highland Quichua bible

2 CRÓNICAS 7

¹Salomón chashna mañajpica, jahua pachamantami nina shamurca. Chai ninami Diosman cushca animalcunapaj aichataca tucui rupachirca. Diospaj huasipica, pai Mandaj Diospaj sumaj cashcami jundarca.

²Mandaj Diospaj sumaj cashca Mandaj Diospaj huasipi jundajpimi curacunaca mana yaicui tucurcacuna.

³Ninapish, Mandaj Diospaj sumaj cashcapish jahua pachamanta chai huasi jahuaman uriyamucujtaca, tucui israelcuna ricushpami cungurishpa, rumicunata churashca pambaman tupajta cumurircacuna. Shinallataj Mandaj Diostaca: “Paica allimari, pai llaquij canaca huiñai huiñaipajmi” nishpami adorarcacuna, alabarcacuna.

⁴Chashna nishpaca jatun mandajpish, tucui israelcunapish paihuan tucushpami, Mandaj Diosman animalcunata cushpa huañuchircacuna.

⁵Jatun mandajca, 22.000 c'ari huagracunata, 120.000 ovejacunatami Diosman cushpa rupachircacuna. Chashnami jatun mandajpish, tucui israelcunapish Diospaj huasitaca cambajlla cachun nircacuna.

⁶Curacunaca, paicuna rurana cashcallatatajmi rurarcacuna. Levitacunapish Mandaj Diosta cantangapaj tocanacunapi tocarcacunami. Chai tocanacunataca, jatun mandaj Davidmi rurachishca carca. Chai tocanacunapi tocachishpami Davidca: “Pai llaquij canaca huiñai huiñaipajmi” nishpa, paicunahuan cantaj carca. Tucui israelcuna chaipi shayacujpica, curacunaca levitacunahuan ch'imbapurami trompetacunapi tocarcacuna.

⁷Salomonca, Mandaj Diospaj huasi ñaupajpi caj patiotapishmi Diospajlla cachun nirca. Chai patiopimi, Mandaj Diosman cushca tucui rupachinatapish, Diosman cushca chasquishca granocunatapish, Dioshuan alli cangapaj cushca huiratapish paiman cushpa rupachirca. Salomón rurachishca bronce altarca Diosman cushpa tucui rupachinatapish, granocunatapish rupachingapajca mana pajtarcachu.

⁸Salomonca yallitaj achca tandanacushca tucui israelcunahuanmi canchis punllata fiestata rurarca. Paicunaca Hamat puebloman yaicunmanta callarishpaca, Egiptopi caj jatun yacucama causajcunami tandanacurcacuna.

⁹Punta canchis punllapica, Mandaj Diospaj huasitami Diospajlla cachun nircacuna. Caishuj canchis punllapica, jatun punllacunata yuyarina cashcamantami, chaitapish rurashpa cushicurcacuna. Chai cayandij punllaca, shuj jatun fiestatami rurarcacuna.

¹⁰Huatapaj canchis quilla ishqui chunga quimsa punllapica jatun mandajca, tucui israelcunatami caya minchacamachij nirca. Mandaj Diosca Davidpajpish, paipaj churi Salomonpajpish, pai agllashca israelcunapajpish achca allicunata cushcamantami, tucuicuna jatunta cushicushpa paicunapaj huasicunaman tigrarcacuna.

¹¹Salomonca, Mandaj Diospaj huasitapish, pai mandashpa tiyana huasitapish, chai huasicunapi tucui imalla ruranata yuyarishcatapish tucuitami alli rurashpa tucuchirca. Tucuillatajmi alli llujshirca.

¹²Chai q'uipami Mandaj Diosca, Salomonman tuta ricurishpa cashna nirca: “Can mañashcataca uyanimi. Cai huasitapish, animalcunata ñucaman cushpa caipi rupachina cachunmi agllarcani.

¹³Ñuca agllashca israelcunataca mana tamyachishpa, mana cashpaca chagracunata llaquichichun langostacunata cachashachari, mana cashpaca ungüita cachashachari.

¹⁴Ñuca agllashcacunamanmi ñuca shutita apachun curcani. Ñuca chai llaquicunata cachashpa llaquichijpica, paicuna mana allita ruracushcata saquishpa tucui shunguhuan nanarishpa ñucata yuyarishpa mañajpica, jahua pachamanta uyashami. Paicunapaj juchacunata perdonashami. Shinallataj paicunapaj allpapi tucui imapish mirachun bendiciashami.

¹⁵Cunanmantapachaca cai huasipi mañashcataca uyarashami.

¹⁶Cunanca cai huasipi ñuca shuti huiñaipaj cachunmi agllarcani. Ñuca ñahuicunapish ñuca shungupish punllantami chai huasipi canga.

¹⁷Canpish cambaj yaya David shinallataj tucui ñuca imalla rurangui nishcacunata rurashpa chaitataj pajtachichun nishpa ñuca mandashcata pajtachishpa pajtachinguitaj nishca shinataj rurashpa ñuca ñaupajpi purijpica,

¹⁸israelcunata can mandanataca huiñaipaj cachunmi pi mana cuyuchipajta churasha. Cambaj yaya Davidman: Cambaj huahua huahuapuraca israelcunata mandajca mana illangachu nircanimi. Chai nishca shinallatajmi rurasha.

¹⁹Ashtahuanpish ñuca chaitataj pajtachichun nishpa cancunaman cushca mandashcacunatapish mana cazushpa ñucamanta anchurishpa shujtajcunapaj dioscunapajta rurangapaj rishpa paicunata adorajpica,

²⁰ñuca cancunaman cushca allpamantaca israelcunataca anchuchishami Ñucapajlla cachun ch'icanchishca cai huasitapish ñuca ñaupajmanta anchuchishami. Chashna rurajpimi israelcunamantaca tucui cai pachapi causajcunaca yuyachij shimicunata rimashpa asicungallacuna.

²¹Sumaj nishca cashca cashpapish cai huasica, llaquinayaj siricujta ricushpaca maijanpish chaita pasajca mancharishpami: ¿Ima nishpashi Mandaj Diosca cai llajtatapish, cai huasitapish chashna rurarca? ningacuna.

²²Shina nijpica: Paicunapaj ñaupa yayacunata Egiptomanta llujshichimuj Mandaj Taita Diosta saquishpa, shujtajcunapaj dioscunapajman rishpa chai dioscunata adorashpa, chaicunapajta rurashcamantami Mandaj Diosca paicunapaj jahuamanca tucui cai llaquita cachashca ningacunami” nircami.