Read Chimborazo Highland Quichua 2 CRÓNICAS 9 Bible Online

2 CRÓNICAS 9 - Chimborazo Highland Quichua bible

2 CRÓNICAS 9

¹Sabá llajtata jatun mandaj huarmica, jatun mandaj Salomón yallitaj yachaisapa cashcata yachashpami, mana cutichi tucuipaj tapunacunata tapunaman Jerusalenman shamurca. Chai huarmica paita cuidaj, achca runacunandijmi shamurca. Mishquijllata ashnacujtapish, achca curitapish, sumaj rumicunatapish camellocunapi apachishcami shamurca. Salomonpajman shamushpaca, paipaj shungupi tucui imallata yuyacushcatami tapurca.

²Jatun mandaj Salomonca tucui pai tapushcatami cutichirca. Shuj tapunallapish pai mana cutichi tucuipajca mana tiyarcachu.

³Sabá llajtata jatun mandaj huarmica, Salomonpaj yachai ima shina cashcatapish pai mandashpa tiyana huasita ima shinalla rurashcatapish,

⁴paipaj mezapi tiyaj micunacunatapish, paipajta rurajcuna causana ucucunatapish, paipajta rurajcuna ima shina cashcatapish, paicuna churarishca ima shina cashcatapish, paipaj micunata pasachijcuna ima shina cashcatapish, Mandaj Diospaj huasiman ima shina yaicuj cashcatapish ricushpaca yallitajmi mancharirca.

⁵Chaimi jatun mandajtaca: “Can yallitaj yachaisapa cashcatapish, imalla rurashcacunatapish, ñuca llajtapi cashparaj uyashca shinaca chashnatajmi cashca.

⁶Ñuca caiman manaraj shamushpaca, chashnataj canataca mana crircanichu. Cambaj yachaitapish imalla rurashcacunatapish cuna ñuca ñahuihuantaj ricujpica ñuca uyashca shinaca chaupillatapish mana huillashcacunachu.

⁷Canhuan caj runacunapish, cambajta ruraj cai runacunapish yachaisapa shimicunata rimajta punllanta uyashpaca, cushijllami cangacuna.

⁸Mandaj cambaj Taita Diosca alli nishca cachun. Canca pai munashca cajpimi israelcunata mandaj cachun churarca. Mandaj Diosca israelcunata c'uyacujlla cashcamantami cashcata rurashpa paicunata mandachun churashca” nircami.

⁹Chai huarmica jatun mandajmanca, 120 talento curita, mishquijllata ashnajcunata, sumaj rumicunatapish achcatami curca. Sabá llajtata jatun mandaj huarmi cushca shina yallitaj achca mishquijllata ashnajcunataca, pi manaraj jatun mandaj Salomonpajca apamurcachu.

¹⁰Shinallataj Hirampajta rurajcunami Salomonpajta rurajcunahuanca, Ofir llajtamanta curita sándalo caspicunata, sumaj rumicunatapish apamurcacuna.

¹¹Jatun mandajca sándalo caspicunahuanca Mandaj Diospaj huasipipish, pai mandashpa tiyana huasicunapipish gradacunatami rurarca. Chai caspitaca tocanata yachajcunapajpish arpacunata, salteriocunatami rurarca. Chashna caspicunataca Judapica shuj cutinllapish mana ricushcacunachu carca.

¹²Jatun mandaj Salomonca, Sabá llajtata jatun mandaj huarmimanca, tucui imallata ña cushca cashpapish, chai huarmi ashtahuan mañajpica pai ima nishcata tucui imata mañashcatami curca. Chai q'uipaca chai huarmica, paipajta rurajcunandij paipaj llajtaman tigrarcallami.

¹³Salomonca huatantami, 666 talento curita chasquij carca.

¹⁴Chaica c'atushpa randishpa causajcunatapish, shujtaj llajtamanta apamushpa c'atujcunatapish, Arabia llajtata jatun mandajcunatapish, pai mandacun llajtapi churashca mandajcuna Salomonpaj curita, cullquita apamushcacunatapish mana yupashcami chaica caj carca.

¹⁵Jatun mandaj Salomonca 200 jatun escudocunatami curimanta rurachirca. Cada escudocunatami 600 siclo ashtahuan alli curita tacachishpa rurachirca.

¹⁶300 uchilla escudocunatapish curillamantatajmi rurachirca. Chai escudocunaca cada escudomi, 300 siclo ashtahuan alli curihuan rurashca carca. Jatun mandajca chai escudocunataca, Líbano nishca huasipimi churarca.

¹⁷Jatun mandajca jatun tiyanatapish marfilmantami rurachirca. Chaitaca alli curihuanmi jahuata llihuichirca.

¹⁸Chai tiyarinaca sujta gradacunatami charirca. Chai tiyanapi tiyarishpa chaquita churangapajpish, curimanta rurashcami tiyarca. Maquicunata samachinacunatapish ishquindij ladomanmi charirca. Ishquindij ladopimi, shuj shuj leoncunata rurashca shayacurca.

¹⁹Chai sujta gradacunapipish, ishquindij lado uripi chunga ishqui leontajllacunata churashcami carca. Shujtaj llajtacunapaj mandashpa tiyana huasicunapica, chai shina jatun tiyarinaca mana tiyarcachu.

²⁰Jatun mandaj Salomonpaj huasipi tiyaj tucui platocunapish, líbano nishca huasipi tiyaj tucui platocunapish curimanta rurashcami carca. Salomón mandacui punllacunapica cullquica yanga shinallami carca.

²¹Jatun mandaj Salomonca paipaj jatun barcocunahuanmi Hirampajta rurajcunataca, Tarsis llajtaman cachaj carca. Chai barcocunapimi Tarsismantaca cada quimsa huatapi shuj cutin curita, cullquita, marfilta, monocunata, pavo realcunatapish apashpa shamujcuna carca.

²²Chashnami jatun mandaj Salomonca, tucui shujtaj llajtacunata jatun mandajcunata yalli charijpish, jatun yachajpish tucushpa catirca.

²³Taita Dios Salomonman yachaita cushcahuan ima shina rimaj cashcata uyangapajca, tucui llajtapi causajcunami Salomonpaj ñahuita ricunata munarcacuna.

²⁴Salomonman cungapaj rijcunaca huatantami curimanta, cullquimanta rurashca charinacunata, churanacunata, macanacunacunata, mishquijllata ashnajcunata, caballocunata, machucunata apajcuna carca.

²⁵Salomonca paipaj caballocuna shayachunpish, carrocunata churangapajpish, 4.000 huasicunatami charirca. Caballopi tiyarijcunatapish 12.000 gentecunatami charirca. Chaicunamanta shujcunataca carrocunata maillapi huaquichishca pueblocunapimi churarca. Caishujcunataca Jerusalenpimi pai jatun mandajta cuidachun churarca.

²⁶Salomonca, Éufrates jatun yacumantaca filisteocunapaj llajtacama chai tucui llajtacunata jatun mandajcunatami mandaj carca. Shinallataj Egipto llajtahuan tupanacuncamami mandaj carca.

²⁷Jatun mandajca Jerusalenpica yallitaj cullquiyujmi tucushpa catirca. Paipajca cullquica rumicuna shina yallitajmi tiyarca. Cedro caspicunatapish, Sefela pambapi tiyaj sacha higo yuracuna shina yallitaj achcatami charirca.

²⁸Salomonpajca, caballocunataca Egipto llajtamantapish, tucui caishuj llajtacunamantapishmi apamujcuna carca.

²⁹Salomón ashtahuan imallata rurashcamantaca, Dios ricuchishcata huillaj Natán quillcashcapi, profeta Ahías ñaupaman huillashpa quillcashcapi, Dios ricuchishcata huillaj Iddo quillcashcapipishmi callarimantapacha tucuita quillcashca tiyacun. Ahiasca, Silo pueblopimi causarca. Paicunapaj quillcacunapica, Nabatpaj churi Jeroboammanta huillashcapishmi tiyacun.

³⁰Salomonca, Jerusalenpica tucui israelcunataca chuscu chunga huatacunatami mandarca.

³¹Salomón paipaj ñaupa yayacunahuan dormijpica, paipaj yaya Davidpaj pueblollapitajmi pambarcacuna. Paipaj randica, paipaj churi Roboammi mandarca.