Read Chimborazo Highland Quichua ESDRAS 1 Bible Online

ESDRAS 1 - Chimborazo Highland Quichua bible

ESDRAS 1

¹Mandaj Diosca Jeremiasman pai huillachishcata pajtachingapajca, Persia llajtata jatun mandaj Ciro chai llajtata mandai callari huatami jatun mandaj Ciroman yuyaita cujpi paica huillajcunata cachashpa, quillcacunata cachashpa pai mandacun tucui llajtacunapi cashna huillachirca:

²“Persia llajtata jatun mandaj Ciroca cashnami nin nichij: Jahua pacha Mandaj Diosmi tucui cai pachata mandanacunataca ñucaman cun. Judapi caj Jerusalenpipish shuj huasita shayachichunmi mandan.

³Chaimanta cancunapurapi Dios agllashcacuna maijan tiyajpica Taita Dios paihuan cachun. Paica Judapi caj Jerusalenman huichiyachunlla. Chaipica israelcunata Mandaj Diospaj huasita shayachichun. Paica Diostajmi. Paica Jerusalenpimi.

⁴Paicuna maipi causacushcallapitaj saquirijcunaca paicunapaj c'uchullapi causacujcuna ricujpica cullquihuan, curihuan, imalla charishcacunahuan, animalcunahuan ayudashpa cachachun. Shinallataj Jerusalenpi caj Mandaj Diospaj huasipajpish quiquin munashca shinallataj ofrendacunata cushpa cachachun” nishpami huillachirca.

⁵Shina nijpimi Judapaj, Benjaminpaj ñaupa yayacunamanta mirarishca quiquinpurallata mandajcunapish, curacunapish, levitacunapish Jerusalenpi caj Mandaj Diospaj huasita cutin shayachichun huichiyachun Mandaj Dios paicunapaj shungupi yuyaita cushcacunaca tucuicuna jatarishpa rina tucurcacuna.

⁶Paicunamanca paicunapaj muyundijpi causajcunami cullquita, curita, ima charinacunatapish, animalcunatapish, tucui valij charinacunatapish cushpa cacharcacuna. Chai jahuami ofrendacunatapish quiquin munashca shina curcacuna.

⁷Babilonia llajtata jatun mandaj Nabucodonosormi, Jerusalenmanta Diospaj huasipi imalla ruranacunataca apashpa paipaj dioscunapaj huasipi churashca carca. Chaicunatami jatun mandaj Ciroca, Jerusalenllamantaj apachun llujshichirca.

⁸Persia llajtata jatun mandaj Ciroca, chai charinacunataca cullquita huaquichij Mitrídates runatami llujshichichirca. Chai runami tucuita yupashpa Judá llajtata mandaj Sesbasarman curca.

⁹Tucui chai charinacunaca: Quimsa chunga curi jatun tasacuna, 1.000 jatun cullqui tasacuna, ishqui chunga iscun cuchillocuna,

¹⁰quimsa chunga uchilla tasacuna, 410 uchilla cullqui tasacuna, Diospajta ruranapaj shujtaj 1.000 charinacunapishmi carca.

¹¹Curimanta cullquimanta rurashca Diospajta ruranacunata yupajpica, 5.400mi carca. Tucui chaicunataca Sesbasarca Babilonia llajtapi prezu causacushcacunahuan apashpami Jerusalenman tigrarca.