Read Chimborazo Highland Quichua ESDRAS 4 Bible Online

ESDRAS 4 - Chimborazo Highland Quichua bible

ESDRAS 4

¹Babiloniaman prezu apashca israelcuna tigramushpa paicunata Mandaj Diospaj huasita cutinllataj shayachicujta Judapaj, Benjaminpaj ailluta p'iñajcuna yachaj chayashpami,

²Zorobabelpajman, ñaupa yayacunamanta mirarishca quiquinpurallata mandajcunapajman shamushpaca: — Cai huasitaca, ñucanchijhuan tandalla shayachishunchij. Ñucanchijpish cancunapaj Diosllatatajmi yuyarinchij. Asiria llajtata jatun mandaj Esar-hadón caipi churashca pachamantami cancunapaj Diosman sacrificiota cucunchij — nircacunami.

³Shina nijpimi Zorobabelpish, Jesuapish, Israel ñaupa yayacunamanta mirarishca quiquinpurallata mandajcunapish: — Ñucanchij Diospaj huasita cancunahuan tandalla ruranaca mana allichu. Persia llajtata jatun mandaj Ciro mandashca shina israelcunata Mandaj Diospaj huasitaca ñucanchijllamari shayachina canchij — nircacunami.

⁴Chashna nijpimi, chai llajtapi causacujcunaca judacunataca chai huasita ama rurashpa catichun manchachircacuna.

⁵Chai huasita ruracushcata jarcangapajca, jatun mandajman yuyaita cuj mandajcunamanmi cullquita huashalla curcacuna. Persia llajtata jatun mandaj Ciro mandacui tucui huatacunapi, jatun mandaj Darío Persia llajtata mandai callaringacamami chashna jarcarcacuna.

⁶Jatun mandaj Asuero mandai callarijpipish Judacunata, Jerusalencunata juchachishpami cutinllataj quillcata cacharcacuna.

⁷Persia llajtata jatun mandaj Artajerjes mandacujpipish Bislam, Mitrídates, Tabeel runacunami paicunahuan cajcunandij tucushpa shuj quillcata jatun mandaj Artajerjesman cacharcacuna. Chai quillcaca arameo rimaipi quillcashcata quiquin rimaiman ch'imbachishcami carca.

⁸Jatun mandajpaj randi mandaj Rehumpish, quillcaj Simsai runapish Jerusalencunata juchachishpami, jatun mandaj Artajerjesman shuj quillcata cacharcacuna.

⁹Chai quillcataca, jatun mandajpaj randi mandaj Rehumhuan, quillcaj Simsai runahuan, paicunahuan caj juezcunahuan, llajtacunapi churashca mandajcunahuan, q'uipa mandajcunahuan, Persiamanta, Erecmanta, Babiloniamanta, Susamanta shamushca elamita nishcacunahuan tucushpami quillcashpa cacharcacuna.

¹⁰Samaria llajtapi caj pueblocunapipish, jatun yacumanta ch'imba ladoman caj llajtacunapipish causachun tucuicuna alli nishca Asnapar apamushpa churashca runacunandij tucushpami chai quillcataca cacharcacuna.

¹¹Jatun mandaj Artajerjesman cachashca quillcamanta copiashcapica cashnami nicun: “Jatun yacu ch'imba ladoman causaj cambajta rurajcunaca allillachu cangui ninchijmi.

¹²Jatun mandaj caitami yachaj chayachinchij. Cambajmanta shamuj judiocuna ñucanchij causacunman tigramujcunaca Jerusalenman chayashpami, mana cazuj millaicuna causashca pueblota cutin shayachicun. Muyundij pircacunata rurangapajpish ñami callari rumicunata churacuncuna.

¹³Cunanca jatun mandajlla caitami yuyarina cangui. Chai pueblota cutin shayachishpa muyundij pircacunatapish ña pircashpaca, tributotapish, impuestotapish, imallamanta cuna cashcacunatapish mana pagangacunachu. Chashna tucujpica mandana huasipica cullquica illangamari.

¹⁴Ñucanchijca mandana huasimanta causacujcuna cashcamantami can jatun mandajta chashna llaquichichunca mana saqui tucunchij. Chaimantami can jatun mandajman cai quillcata cachashpaca,

¹⁵cambaj ñaupa mandaj yayacuna quillcachishpa saquishca quillcacunata mashcachishpa ricuchun huillanchij. Chai quillcacunapi ricushpaca, chai pueblopi causajcunaca yallitaj millaicuna cashcata, jatun mandajcunatapish, llajtacunatapish llaquichijcuna cashcatami yachangui. Chai pueblopi causajcunaca ñaupa punllacunamanta pacha mana cazushpa jatarijcuna cashcamanta chingachishcatapishmi yachangui.

¹⁶Cai pueblota ña cutin shayachijpi, muyundij pircacunatapish pircajpica, jatun yacumanta chaininijman caj llajtacunataca ña mana can mandana cashcatami yachaj chayachinchij” nishpami quillcashpa cacharcacuna.

¹⁷Chaita japishpaca jatun mandajca: “Jatun mandajpaj randi mandaj Rehumtapish, quillcaj Simsai runatapish, Samariapi paicunahuan causajcunatapish, jatun yacumanta ch'imba ladoman causajcunatapish allillachu canguichij” nishpa cutichishpaca:

¹⁸“Cancuna cachashca quillcataca ñuca ñaupajpimi entendinallata rezachircani.

¹⁹Chaimi chai quillcacunata mashcachun mandajpi mashcashpaca, chai pueblopi causajcunaca, ñaupa punllamanta pacha jatun mandajcunata llaquichingapaj jatarishpa llaquichijcuna, yallitaj bullata rurajcuna cashcata japircacuna.

²⁰Jerusalenpica yallitaj c'ari c'ari jatun mandajcuna tiyashcata, paicunaca jatun yacumanta ch'imbanij llajtacunacama mandajcuna cashcata, paicunataca tributocunata, impuestocunata, imallamanta pagana cashcata pagachijcuna cashcatapishmi japircacuna.

²¹Chaimanta cunanca chai runacuna chai pueblota cutin shayachicuntaca ñuca cutin imatapish ningacama ama shayachichun jarcaichij.

²²Chaitaca ama cungarishpalla jarcanguichij. Jatun mandajcunata llaquichishpa catinaca manataj mirarinachu can” nishpami quillcachishpa cacharca.

²³Jatun mandaj Artajerjes cachashca quillcamanta copiashcata jatun mandajpaj randi mandaj Rehumpaj, quillcaj Simsai runapaj, paicunahuan cajcunapaj ñaupajpi rezashcata uyashpaca, paicunaca utcami Jerusalenpi caj judiocunapajman rircacuna. Chaipica yallitaj llaquichishpami imallata ruracushcata saquichircacuna.

²⁴Chashnami Diospaj huasita Jerusalenpi cutin shayachicushcataca jarcachirca. Persia llajtata jatun mandaj Darío ishqui huatata mandangacamami chashna jarcachishca saquirirca.