Read Chimborazo Highland Quichua ESDRAS 9 Bible Online

ESDRAS 9 - Chimborazo Highland Quichua bible

ESDRAS 9

¹Tucui chaicunata tucuchishca q'uipami mandajcuna ñucapajman shamushpaca: “Israelcunapish, curacunapish, levitacunapish, cai llajtapi causaj cananeocunamanta, heteocunamanta, ferezeocunamanta, jebuseocunamanta, amonitacunamanta, moabitacunamanta, egipciocunamanta, amorreocunamanta mana anchurishpami, paicunapaj millanana ruraicunapi urmashcacuna.

²Israelcunaca cai llajtapi causajcunapaj ushushicunatami paicunapaj huarmicuna cachun, paicunapaj churicunapaj huarmicuna cachun japishcacuna. Chashnami Dios agllashca jucha illaj israelcunaca cai llajtapi causajcunahuan chagrurishpa mapayashcacuna. Chashna yallitaj millaita ruranataca israelcunata pushajcunarajmi callarircacuna” nishpami huillarcacuna.

³Chaita uyashpaca, ñuca churanataca ucuta churarishcatapish, jahua churanatapish lliquirishpa, ñuca uma ajchatapish, barbastapish c'utsarishpami yallitaj llaquirishpa tiyarircani.

⁴Diosta mana cazushcamanta prezu apashca cajcuna tigramushcacunaca israelcunapaj Dios llaquichina cashcata manchashcamantami tucuicuna ñucapajman tandanacumurcacuna. Ashtahuanpish ñucaca chishi sacrificiota cuna horascamami llaquilla tiyacurcanilla.

⁵Chishi sacrificiota cuna horaspi, ñuca yallitaj llaquilla cashca ashata pararijpimi, ucu churanapish, jahua churanapish lliquillataj cungurishpa ñucata Mandaj Diosman ñuca maquicunata chutashpa,

⁶cashna nircani: “Ñuca Dioslla, ñuca Dioslla, canta huichilla ricushpa mañangapajca yallitaj musparishca yallitaj pingaihuanmi cani. Millaita ñucanchij rurashpaca yallitaj jucha aparishcami tucushcanchij. Ñucanchij juchacunaca jahua pachacamami chayashca.

⁷Ñaupa ñucanchij yayacunapaj punllamanta cunan punllacamami yallitaj juchata rurashpa causashcanchij. Millaita ñucanchij rurashcamantaca ñucanchijtapish, ñucanchij jatun mandajcunatapish, ñucanchij curacunatapish shujtaj llajtacunata jatun mandajcunapaj maquipimi churashcangui. Paicunaca maijancunataca espadacunahuan huañuchishpa, prezu apashpa, ñucanchij ima charishcacunatapish shuhuashpami ñucanchijtaca yallitaj pingaichirca. Cunanpish chashnallatajmi tucucun.

⁸Chashna cajpipish cunanca ñucanchijta Mandaj Dioslla, cambaj llaquishcata ricuchishpami, ashacunallatapish puchuchishcangui. Shinallataj ñucanchij ñahuicunata pascaj shinami sumaj punllatapish ricuchishcangui. Shujtajcunapajllata rurashpa causacujpipish, ashallatapish samachingapajmi cambaj huasiman pushamushcangui.

⁹Ñucanchijca shujtajcunapajta rurajcunami canchij. Shujtajcunapajta rurajcuna cajpipish ñucanchij Taita Diosca manataj saquishcachu. Ashtahuanpish ñucanchij Diospaj huasi urmashcata cutin shayachinaman rinapaj ñucanchij fuerzarichunca Persia llajtata jatun mandajcunapaj ñaupajpimi c'uyaita ricuchircangui. Judapi, Jerusalenpi cajpipish canmi huaquichircangui.

¹⁰Cunanca ñucanchij Dioslla, tucui caicunamantaca ¿imatataj ni tucushunri? Ashtahuanpish ñucanchijmari can mandashcacunata saquishcanchij.

¹¹Chai mandashcacunataca, cambajta ruraj profetacunamanmi cashna huillachircangui: Cancuna yaicushpa quiquinpajtaj cachun japina allpaca millaita rurajcuna millaita rurajpimi chai llajtaca millaihuan junda tucurca. Chaimantami chai llajtaca caishuj ladomanta chaishuj ladocama millaihuan junda.

¹²Cunanca cancuna c'ari c'ari cangapaj cancunapaj allpapi p'ucushca tucuimanta yalli alli granocunata micushpa causangapaj, cai allpatapish cancunapaj huahuacunapaj herencia cachun huiñaipaj saquingapajca, cancunapaj ushushicunataca paicunapaj churicunamanca ama cunguichijchu. Paicunapaj ushushicunatapish cancunapaj churicunapaj huarmi cachun ama japinguichijchu. Paicunahuan sumajta causashunmi nishpa tandanacunatapish, paicuna ruraj cashca shina rurashpa ashtahuan ñaupajman rina cashcatapish ama yuyanguichijchu.

¹³Tucui chai llaquicunaca ñucanchijllataj millai ruranacunata rurashcamanta, ñucanchij yallitaj millai juchacunata rurashcamantami ñucanchij jahuaman shamushca. Ashtahuanpish can ñucanchij Diosca canta p'iñachishcamanta llaquichina cashca shinatajca, mana llaquichishpami, cai ashacunallamanpish causaita cushpa tigrachimushcangui.

¹⁴Chashna ruracushca jahuaca cai llajtapi causaj millananacunata rurajcunahuan familia tucushpa cutinllatajca ¿maitataj can mandashcacunataca p'aquishunyari? Chashna rurajpica canca ñucanchijhuan yallitaj p'iñarishpa ashacunallatapish mana saquishpa, shujllatapish mana quishpichishpa tucuita chingachinguillatajmari.

¹⁵Mandaj Dios israelcunapaj Dioslla, quiquinca cashcata ruraj cashpami, cai ashacunallapish miticushpa cunancama causachun saquishcangui. Ñucanchijca yallitaj juchayuj cashcamanta cambaj ñaupajpi mana caipaj cashpapish, cambaj ñaupajpimi canchij” nishpami, Diosta mañarcani.