Read Chimborazo Highland Quichua NEHEMÍAS 12 Bible Online

NEHEMÍAS 12 - Chimborazo Highland Quichua bible

NEHEMÍAS 12

¹Salatielpaj churi Zorobabelhuan, Jesuahuan Jerusalenman huichiyamuj curacunapish, levitacunapish caicunami: Seraías, Jeremías, Esdras,

²Amarías, Maluc, Hatús,

³Secanías, Rehum, Meremot,

⁴Iddo, Gineto, Abías,

⁵Mijamín, Maadías, Bilga,

⁶Semaías, Joiarib, Jedaías,

⁷Salú, Amoc, Hilcías, Jedaías shuticunami carcacuna. Jesúa causai punllapica tucui chai curacunami paicunapurallatataj mandajcuna carca.

⁸Levitacunaca: Jesúa, Binúi, Cadmiel, Serebías, Judá, Matanías, shuticunami carcacuna. Paicunaca levitacunapurallatataj cantocunata yachachishpa cantachijcunami carca.

⁹Bacbuquías, Uni shuti levitacunaca paicunapaj quiquinpura levitacunahuanmi paicuna imallapi Diospajta rurana cashcapi rurajcuna carca.

¹⁰Jesuaca Joiacim churitami charirca. Joiacimca Eliasib churitami charirca. Eliasibca Joiada churitami charirca.

¹¹Joiadaca Jonatán churitami charirca. Jonatanca Jadúa churitami charirca.

¹²Joiacim causai punllacunapi curacuna mirarishca familiacunata mandaj curacunaca caicunami: Seraiaspura curacunataca, Meraiasmi mandacurca. Jeremiaspura curacunataca Hananiasmi mandacurca.

¹³Esdraspura curacunataca, Mesulammi mandacurca. Amariaspura curacunataca, Johananmi mandacurca.

¹⁴Melicupura curacunataca, Jonatanmi mandacurca. Sebaniaspura curacunataca, Josemi mandacurca.

¹⁵Harimpura curacunataca, Adnami mandacurca. Meraiotpura curacunataca, Helcaimi mandacurca.

¹⁶Iddopura curacunataca, Zacariasmi mandacurca. Ginetonpura curacunataca, Mesulammi mandacurca.

¹⁷Abiaspura curacunataca, Zicrimi mandacurca. Miniaminpura curacunatapish, Moadiaspura curacunatapish Piltaimi mandacurca.

¹⁸Bilgapura curacunataca, Samuami mandacurca. Semaiaspura curacunataca, Jonatanmi mandacurca.

¹⁹Joiaribpura curacunataca, Matenaimi mandacurca. Jedaiaspura curacunataca, Uzimi mandacurca.

²⁰Salaipura curacunataca, Calaimi mandacurca. Amocpura curacunataca, Ebermi mandacurca.

²¹Hilciaspura curacunataca, Hasabiasmi mandacurca. Jedaiaspura curacunataca, Natanaelmi mandacurca.

²²Eliasibpish, Joiadapish, Johananpish, Jaduapish causacui punllacunamanta Persia llajtata jatun mandaj Darío mandacui punllacunacama, levitacuna, curacuna paicunapaj familiacuna tandanacushcata mandaj curacunapaj, mandaj levitacunapaj shuticunata shuj libropi quillcashcaca tucui chaicunami carca.

²³Levipaj huahua huahuacuna mirarimushca quiquinpurallata mandajcunapaj shuticunataca, Eliasibpaj churi Johanán causacui punllacunacamaca imalla tucushcacunata quillcashca libropimi quillcashca carca.

²⁴Levitacunata mandajcunaca: Hasabías, Serebías, Cadmielpaj churi Jesuami carca. Paicunapura levitacunaca Diospaj runa David mandashca shinallataj chai mandajcuna mandajpica Diospajta rurana punllapi paicunapaj cantana tucujpica, Diosta alabashpa pagui ningapaj huashan huashan rijcuna carca.

²⁵Matanías, Bacbuquías, Obadías, Mesulam, Talmón, Acub shuti runacunaca pungu yaicunpi cuidajcunami carca.

²⁶Paicunaca Josadacpaj nieto Jesuapaj churi Joiacim causacui punllacunapimi causarcacuna. Chai punllacunapica Nehemiasca llajtata mandajmi carca. Esdrasca quillcaj curami carca.

²⁷Jerusalén muyundij pircata Diosman mingangapajca levitacunatami paicuna maillapi causan llajtacunapi mashcashpa Jerusalenman aparcacuna. Chai pircata Diosman mingacui tandanacuipi cimbalocunahuan, salteriocunahuan, citaracunahuan Taita Diosta cantashpa alabangapajmi pushamurcacuna.

²⁸Cantaj levitacunaca Jerusalén muyundij llajtapi causaj tucuicuna, Netofa pueblopi chai muyundij llajtacunapi causajcunapishmi tandanacumurcacuna.

²⁹Gilgal pambapi, Geba pambapi, Azmavet pambapi causajcunapishmi tandanacumurcacuna. Cantajcunaca Jerusalén muyundijpi llajtacunata rurashpa causacushcamantami chashna tandanacumurcallacuna.

³⁰Chai tandanacuipajca curacunapish, levitacunapish chuyayarcacunami. Chai q'uipaca tucui israelcunatami chuyayachirca. Jerusalén pungucunatapish, pircatapish chuyayachircami.

³¹Chai q'uipaca, Judá llajtata mandajcunatami pirca jahuaman huichiyachishpa chai jahuata muyungapaj ishqui mirga achca cantajcunata ch'ican ch'ican churarcani. Shuj mirga cantajcunaca chai pirca jahuatami alli ladoman, Mapacunata llujshichina pungu ladoman rircacuna.

³²Chai cantajcunapaj huashataca Osaiasmi, Judá llajtata chaupi mandajcunahuan rirca.

³³Chai mandajcunaca: Azarías, Esdras, Mesulam,

³⁴Judá, Benjamín, Semaías, Jeremías shuticunami carca.

³⁵Trompetahuan rij curacunaca: Jonatanpaj churi Zacarías. Semaiaspaj churi Jonatán. Mataniaspaj churi Semaías. Micaiaspaj churi Matanías. Zacurpaj churi Micaías. Asafpaj churi Zacurmi carca.

³⁶Curacunapurallataj caj Semaías, Azarael, Milalai, Gilalai, Maai, Natanael, Judá, Hanani curacunaca Diospaj runa Davidpaj tocanacunahuanmi rircacuna. Paicunata ñaupashpaca quillcaj Esdrasmi rirca.

³⁷Pugyuman llujshina pungu jahua nijta rishpaca Davidpaj puebloman yaicuna gradacuna huichitami pirca jahuallatataj huichiyarcacuna. Chaimantaca inti llujshin ladoman caj Yacuhuan yaicuna pungucamami rircacuna.

³⁸Caishuj mirga cantajcunaca, lluqui ladomanmi rircacuna. Ñucapish chaupi caishuj gentecunahuanmi Horno shuti torremanta ashtahuan ancho pircacunacama paicunata catishpa pirca jahuata rircani.

³⁹Ñucanchijca Efraín pungu jahuata pasashpaca Mauca pungu jahua nijta, Chalhuahuan yaicuna pungu jahua nijta, Hananeel, Hamea torrecuna chaita rishpami Ovejacunahuan yaicuna pungucama rishpa, Carcelman yaicuna pungu jahua nij pircapi shayarircanchij.

⁴⁰Chaipica pirca jahuata ishquindij ladota shamuj cantajcunataj tupanacushpami Diospaj huasiman chayarcacuna. Ñuca c'uchupica chaupi mandajcunapishmi carca.

⁴¹Trompetacunahuan caj curacunapish: Eliacim, Maaseías, Miniamín, Micaías, Elioenai, Zacarías, Hananías,

⁴²Maasías, Semaías, Eleazar, Uzi, Johanan, Malquías, Elam, Ezer shuticunami carca. Cantajcunaca sinchitami cantarcacuna. Paicunataca Izrahiasmi dirigicurca.

⁴³Chai punllapica, yallitaj achca animalcunatami Diosman cushpa rupachircacuna. Chaipi Taita Dios paicunapi yallitaj cushicuita jundachijpimi, huarmicunapish, huahuacunapish mana jahuallata cushicurcacuna. Jerusalenpi chashna cushicushpa bullacujtaca carucunamantami uyashca carca.

⁴⁴Chai punllallapitajmi, Judá llajtapi causajcunaca Diospajta ruraj curacunahuanpish, levitacunahuanpish jatunta cushicurcacuna. Shinallataj paicunapaj micuna tiyachunca, pueblocuna muyundij chagracunapi punta p'ucushca granocunata, chungamanta shujta cushcacunatapish, cullquitapish Dios mandashca shinallataj Diospaj huasipi caj huaquichina ucucunaman apamurcacuna. Shinallataj chai cushcacunata huaquichichunpish maijancunatami agllarcacuna. Curacunapajpish, levitacunapajpish micunaca pajtami tiyarca.

⁴⁵Levitacunapish, curacunapish, Diospajta ruranapica juchamanta cunapipish, cantajcuna cantanapipish, punguta cuidajcunapish, Davidpish paipaj churi Salomonpish mandashpa quillcashcapi nishca shinallatajmi pajtachircacuna.

⁴⁶Ñaupa yaya Davidpaj, Asafpaj punllamanta pachami cantajcunataca Diosta alabashpa cantanata, pagui nishpa cantanata yachachijcuna tiyarca.

⁴⁷Zorobabelpaj punllacunapi, Nehemiaspaj punllacunapica tucui israelcunami cantajcunapajpish pungupi cuidajcunapajpish punllanta paicunapaj micunapaj apamujcuna carca. Levitacunapajpish chashnallatajmi apamujcuna carca. Chaitami levitacunapish Aaronpaj huahua huahuacunaman cutin paicunapish paicunapaj cuna cashcata cujcuna carca.