Read Chimborazo Highland Quichua NEHEMÍAS 6 Bible Online

NEHEMÍAS 6 - Chimborazo Highland Quichua bible

NEHEMÍAS 6

¹Jerusalén muyundij pircataca, chai punllacama pungucunata manaraj churashpapish pircana cashcataca shuj jutcullatapish maipi mana saquishpa tucuita allichishcata yachashpami, Sanbalatpish, Tobiaspish, arabemanta caj Gesempish, tucui ñucata p'iñajcunapish mana allita ruranata yuyarircacuna.

²Chaimi Sanbalatpish, Gesempish: “Ono pambapi tiyaj maijan llajtapi ñucahuan tandanacushun” nishpa huillanaman ñucapajman cachashca carca. Ashtahuanpish paicunaca ñucata llaquichingapajllami chashna nishca carca.

³Chaimi ñucaca: “Ñucaca caipica jatun ruranatamari ruracuni, mana ri tucunichu. Ñuca cancunapajman rijpica, chai ruracushcacunaca saquiringallatajmari” nichunmi huillajcunata cacharcani.

⁴Chashnallataj nishpa cayachunca paicunaca chuscu cutinmi ñucapajman cacharca. Ñucapish ñaupaman nishca shinallatajmi cutichircani.

⁵Chashna nijpipish Sanbalatca, paipajta rurajtaca ñaupaman nishca shinallataj nichunmi caihuanca pichca cutin shuj quillcashcataca mana pillushcata cachashca carca.

⁶Chai quillcapica: “Canpish, tucui israelcunapish jatun mandajta ña mana cazushpa c'ariyashpa, jatun pircataca allichicun nishpami, shujtaj llajtapi causajcunapish, Gasmu runapish huillan. Chashna nishcata uyashpaca, canca jatun mandaj tucusha nicushcatami yuyanchij.

⁷Canca Judapica ñami jatun mandaj tiyan nishpa canmanta Jerusalenpi causajcunaman huillachunca profetacunata churashcatami huillancuna. Cunanca chashna nishcacunata jatun mandaj amaraj yachaj chayajpi, shamui ñucanchijhuan parlanacushun” nishpami quillcashca carca.

⁸Chashna nijpimi ñucaca: “Pi mana chashna nicunchu. Ashtahuanpish canllatajmi cambaj quiquin yuyaimanta chashna nicungui” nichunmi cacharcani.

⁹Tucui paicunaca chai pircacushcataca, manchashpa mana tucuchingacunachu nishpami, chashna manchachishun nircacuna. “Chashna nicujpipish Taita Dioslla, ñucaman ashtahuan rurana yuyaita cuhuayari” nishpami mañarcani.

¹⁰Chai q'uipaca Mehetabelpaj nieto Delaiapaj churi Semaiaspaj huasimanmi rircani. Semaiasca paipaj huasipi huichcarishcami cashca carca. Paica cashnami nirca: “Diospaj huasi ucupi tandanacushun. Chaipica Diospaj huasi pungucunata huichcarishunllami. Cantaca huañuchingapajmi shamucun. Cunan tutami huañuchinaman shamungacuna” nircami.

¹¹Chaimi ñucaca: “¿Ñuca shina c'ari c'ari runaca miticungami yuyanguichari? ¿Ñuca shina c'ari c'ari runaca paipaj causaita quishpichingapajca Diospaj huasiman yaicungachari? Manataj yaicushachu” nircanimi.

¹²Semaiasca, Dios manapish huillachijpi chashna huillacushcata, ashtahuanpish Sanbalathuan, Tobiashuan paiman pagashcallamanta chashna nicushcatami entendircani.

¹³Paicuna ñucata chashna manchachijpi ñuca miticushpa juchallichunmi, chashna pagashca carca. Pai nishcata ñuca uyashpa miticushca cajpica, tucuicuna mana alli nishpa p'iñashcami caiman carcani.

¹⁴Ñuca Dioslla Tobiastapish Sanbalattapish paicuna ima shina rurashca shinallataj ruranata yuyaripangui. Noadías profeta huarmipish caishuj profetacunapish Taita Dios huillachijpimi huillacuni nishpa ñucata manchachishpa muspachisha nishcatapish yuyaripangui.

¹⁵Jerusalén muyundij pircataca pichca chunga ishqui punllacunata trabajashpami, Elul quillapaj ishqui chunga pichca punllacunapi tucuchircanchij.

¹⁶Tucui chaicunata uyajcunaca ñucanchijta p'iñajcunapish, ñucanchij muyundij tucui llajtacunapish mancharishpami cumurircacuna. Tucui chaicunata rurashcata ricushpaca, paicunapaj Taita Diosmari chai tucuitaca ruran nircacunami.

¹⁷Chai punllacunapica Judá llajtata mandajcunaca, achca quillcacunatami Tobiasman cachajcuna carca. Tobiaspish paicunamanca, chashnallatajmi cachaj carca.

¹⁸Tobiasca, Arapaj churi Secaniaspaj yernomi carca. Paipaj churi Johananpish, Berequiaspaj churi Mesulampaj ushushitami paipaj huarmi cachun japirca. Chashna cashpami judiocunaca achcacuna paihuan alli apanacunata ari ninacushca carca.

¹⁹Paicunaca Tobiasca caita chaitami allita ruran nishpami ñuca ñaupajpi parlanacujcuna carca. Ñuca ima nishcacunatapish Tobiasmanmi huillagrijllacuna carca. Tobiaspish ñucata manchachisha nishpami quillcacunata cachaj carca.