Read Chimborazo Highland Quichua NEHEMÍAS 8 Bible Online

NEHEMÍAS 8 - Chimborazo Highland Quichua bible

NEHEMÍAS 8

¹Chai punllami yacuhuan yaicuna pungu ñaupaj plazapi tucui israelcuna shuj shinalla tandanacushpaca, Moisesman Mandaj Dios israelcunaman cuchishca librota apamuchun quillcaj Esdrataca mañarcacuna.

²Chaimi Esdras curaca canchis quillapaj punta punllapica, c'aricunapaj, huarmicunapaj, tucui ña entendi tucuipajlla cajcunapaj ñaupajman chai librota apamurca.

³Chai librotaca yacuhuan yaicuna pungu ñaupaj plazapimi, c'aricunapaj huarmicunapaj, tucui ña entendi tucuipajcunapaj ñaupajpi inti llujshinmanta rezai callarishpaca chaupi punllacama rezarca. Chai mandashca librota rezajpica, tucuicunami tucui munaihuan uyaracurcallacuna.

⁴Quillcaj Esdrasca, chai punlla shayarinapaj tarimata rurashcapimi shayarirca. Paipaj alli ladomanca Matatías, Sema, Anías, Urías Hilcías, Maasías shuti runacunami carca. Paipaj lluqui ladomanca Pedaías, Misael, Malquías, Hasum, Hasbadana, Zacarías, Mesulam shuti runacunami carca.

⁵Esdrasca jahuaman cashpa, chai librota, tucuicuna ricucujpi pascajpica, tucui israelcunami chaparacurcacuna.

⁶Esdrasca: “Tucuita rurai tucuj Mandaj Diostami allimari cangui” nirca. Tucui chaipi cajcunaca, paicunapaj maquicunata huichi chutashpami: “¡Chashna cachun, chashna cachun!” nishpa cutichircacuna. Chashna nishpaca tucuicuna shungucuna cumurishcami, pambaman tupajta cumurishpa Mandaj Diosta adorarcacuna.

⁷Jesúa, Bani, Serebías, Jamín, Acub, Sabetai, Hodías, Maasías, Kelita, Azarías, Jozabed, Hanán, Pelaía shuti levitacunaca chai mandashcapi imallata nicushcacunatami, tucuicunaman entendichicurcacuna. Tucui chaipi cajcunaca paicuna maipi cashcamanta maiman mana cuyurishpami uyaracurcacuna.

⁸Taita Dios mandashca librotaca tucuicuna entendinallata rezajpimi, entendichicuj levitacunaca tucuicunaman alli entendichircacuna.

⁹Chaipica llajtata mandaj Nehemiaspish, quillcaj cura Esdraspish, israelcunaman entendichij levitacunapish, tucui chaipi cajcunataca: “Cunanca ñucanchij Jatun Diospaj ch'icanchishca punlla cashcamanta, ama llaquilla caichijchu, ama huacaichijchu” nircacunami. Mandashca librota rezashcata uyashpa tucui chaipi cajcuna, huacacushcamantami chashna nircacuna.

¹⁰Chai q'uipaca: “Cunan punllaca Mandaj Diospajlla ch'icanchishcamari. Chaimanta richij sumajta allichishca micunacunata micugrichij. Mishquijlla vinotapish ubyagrichij. Micunata allichinapaj imata mana charijcunamanpish caraj cachaichij. Ama llaquilla caichijchu. Mandaj Dios cushichishcaca, cancuna fuerzayuj tucunapajmi” nircami Esdraspish.

¹¹Levitacunapish tucui israelcunataca: “Cunan punllaca Mandaj Diospajlla ch'icanchishca punllamari. Upalla caichij ama llaquilla caichijchu” nishpami, upallachircacuna.

¹²Tucui israelcunami micunamanpish, ubyanamanpish, mana charijcunaman cunamanpish, jatunta cushicunamanpish rircacuna. Taita Dios mandashca shimicunata yachachishcata alli entendishcamantami chashna rurarcacuna.

¹³Chai cayandij punllaca, tucui familiacunata mandajcunapish, curacunapish, levitacunapish Dios mandashcacunata yachangapajmi quillcaj Esdrashuan tandanacurcacuna.

¹⁴Chaipimi paicunaca Mandaj Dios Moisesta quillcachishpa israelcunaman cushca mandashcapica: “Huatapaj canchis quillapi ramadacunapi causashpa jatun fiestata rurachun” nishca quillcashcata japircacuna.

¹⁵Chaimi tucui paicunapaj pueblocunatapish, Jerusalén pueblopipish cashna caparishpa huillashpa purimuchun cacharcacuna. “Mandashcapi nishca shinallataj ramadacunata rurangapaj urcuman llujshishpa olivos ramacunata, sacha olivos ramacunata, arrayán ramacunata, palmera ramacunata, tucui p'angasapa yura ramacunata apamugrichij” nichunmi cacharca.

¹⁶Chaimi israelcuna llujshishpa rishpaca ramacunata apamushpa, cada quiquin paicunapaj huasi jahuacunapi, huasi canllacunapi, Diospaj huasi canllapi, yacuhuan yaicuna pungu ñaupaj plazapi, Efrainpaj pungu ñaupaj plazapipish ramadacunata rurarcacuna.

¹⁷Prezu apashcamanta tigramuj tucui israelcunami, ramadacunata rurashpa chai ramadacunapi causarcacuna. Nunpaj churi Josué causai punllacunamanta chai punllacamaca, israelcunaca ramadacunataca mana rurashca cashcamantami, chaicunata rurashpaca yallitaj cushicurcacuna.

¹⁸Ramadacunapi causashpa fiestataca canchis punllatami rurarcacuna. Mandashca libropi nishca shinallatajmi pusaj punllapica yallitaj jatun fiestata rurarcacuna. Chaipica Esdrasca, fiesta callari punllamanta tucuri punllacamami, cada punlla Taita Dios mandashca librotaca rezarca.