Read Chimborazo Highland Quichua ESTER 1 Bible Online

ESTER 1 - Chimborazo Highland Quichua bible

ESTER 1

¹Jatun mandaj Asueroca, 127 llajtacunatami mandacurca. Pai mandacun llajtacunaca, India llajtamantaca Etiopía llajtacamami carca.

²Paica, Susa shuti jatun pueblomantami chai tucui llajtacunataca mandashpa causarca.

³Jatun mandaj Asueroca, quimsa huatata mandacushpami, paita servijcunahuanpish, pai churashca mandajcunahuanpish jatun micuita rurarca. Chai jatun micuimanca Persia shuti, Media shuti llajtacunapi causaj soldadocunata mandajcunatapish, tucui llajtacunapi pai churashca mandajcunatapishmi cayarca.

⁴Paica, achca llajtacunata mandaj cashcamanta, tucui imatapish sumaj charinacunata charij cashcata ricuchingapajmi, chaupi huatacama jatun micuita rurarca.

⁵Chai chaupi huata q'uipaca, shujtaj jatun micuita rurashpami, mandana huasi canllapi caj sumaj jardinpica, canchis punllacama tandanacurca. Chai jatun micuimanca, Susa pueblopi causaj mandajcunatami, ashtahuan alli nishca cajcunatapish, yangalla cajcunatapish cayarca.

⁶Chai jardín pambapica yurajlla, verdijlla, azul-lla sumaj jatun linsocunahuanmi sumajta allichishca carca. Chai linsocunataca linomanta rurashca morado racu puchcacunahuanmi, mármol rumi pilarcunapi churashca cullqui argollacunapi huatashca carca. Shinallataj pambapish, nácar shuti sumaj rumicunahuanpish, yuraj mármol rumicunahuanpish, yana rumicunahuanpish churashcami carca. Chashna sumaj pambapimi curimanta, cullquimanta rurashca sumaj jatun tiyanacunapi tiyarcacuna.

⁷Ubyanacunataca, curimanta rurashca tucui laya sumaj vasocunapimi ubyarcacuna. Vinopish, jatun mandajpaj huasipi tiyana shinallataj achcami tiyarca.

⁸Shina cajpipish jatun mandajca, mandana huasipi paipajta rurajcunata mandajcunataca: “Pipish munashcallata ubyachun saquichijlla. Mana nijpica, ama ubyachuntaj nishpa mandanguichijchu” nishpami mandarca.

⁹Shinallataj jatun mandaj Vasti shuti huarmipish, paipaj cusa jatun mandaj Asuero cayashcacunapaj huarmicunahuanmi, mandana huasipi jatun micuita rurarca.

¹⁰Jatun micui tucuri canchis punllapimi jatun mandaj Asueroca, vinota ubyashpa yallitaj cushicushpa tiyacurca. Chashna tiyacushpami paita servishpa paipaj ñaupajpi caj Mehumán, Bizta, Harbona, Bigta, Abagta, Zetar shuti, Carcas shuti canchis eunuco runacunataca cayarca.

¹¹Chashna cayashpaca, Vasti shuti jatun mandaj huarmitaca, coronata churachishpa paipajman pushachunmi cacharca. Chai huarmitaca tucui chaipi cajcunapish, tucui mandajcunapish, yallitaj sumaj cashcata ricuchunmi pushanaman cacharca.

¹²Ashtahuanpish chai mandaj huarmica, jatun mandaj Asuero paita servij eunuco runacunahuan pushanaman cachajpica, mana risha nircachu. Chaimantami jatun mandajca yallitaj p'iñarirca.

¹³Chashna p'iñarishpaca, mandashcapi nishca shina imata ruraipaj cashcata yachajcunatami tapurca. Jatun mandajca imata cashpapish, mandashcacunata alli yachajcunata paicunata tapuj cashcamantami chashna tapurca.

¹⁴Chaipica paihuan alli apanacuj Carsena, Setar, Admata, Tarsis, Meres, Marsena, Memucán shuti canchis mandajcunami paihuan tiyacurcacuna. Paicunaca jatun mandajman alli yuyaita cujcunami carca. Paicunaca tucuicunata yalli alli nishca canapi churashcami carca. Chai mandajcunaca Persia, Media shuti llajtacunamantami carca.

¹⁵Paicunatami jatun mandajca cashna tapurca: — Vasti shuti jatun mandaj ñuca huarmica, ñucapajta ruraj eunuco runacunata pushanaman cachajpimi, ñuca mandashcata mana cazun. Chashna rurashcamantaca, mandashcapi nishca shinaca ¿imatataj ruraipaj cani? — nishpami tapurca.

¹⁶Chashna tapujpica, jatun mandajman yuyaita cuj tucui mandajcunapaj ñaupajpimi, Memucán shuti mandajca jatun mandajtaca cashna nirca: — Vasti shuti jatun mandaj huarmica, mana can jatun mandajllatachu llaquichishca. Ashtahuanpish tucui mandajcunapajpish, can jatun mandaj Asuero mandacun tucui llajtacunapi causajcunapajpishmari mana allita ricuchishca.

¹⁷Jatun mandaj huarmi chashna rurashcataca, tucui huarmicunami yachaj chayangacuna. Chaita yachaj chayashpaca: Jatun mandaj Asueroca, Vasti shuti paipaj huarmita cayanaman cachajpipish, paica mana cazushcachu carca nishpami, paicunapaj cusacunataca mana cazungacuna.

¹⁸Persia, Media shuti llajtacunata mandajcunapaj huarmicunapish, jatun mandajpaj huarmi chashna rurashcata cunantaj yachaj chayashpaca, chaita yuyachishpami paicunapaj cusacunataca mana cazui callaringacuna. Chashna mana cazujpica, p'iñanacuimari tiyanga.

¹⁹Chashna cashcamantaca, can jatun mandajpaj yuyaipi alli cajpica, pipish mana shujtajyachipajta cashna mandashpa quillcayari: Vasti shuti jatun mandaj huarmica, jatun mandaj Asueropaj ñaupajpica ama ashtahuan ricurichun. Shinallataj jatun mandajca, chai huarmipaj randi jatun mandaj huarmi cachunca, chaita yalli alli huarmita churachun nishpa quillcachiyari. Chai mandashcata ama shujtajyachishca cachunca, chai quillcataca Persia, Media shuti llajtacunapi tiyaj mandashcacunapi churachiyari.

²⁰Shinallataj can jatun mandaj chashna mandashcataca, can mandacun tucui llajtacunapi huillachiyari. Chashna huillachijpimi, tucui huarmicuna alli nishcacunapurapipish, yangallacunapurapipish paicunapaj cusacunataca cazungacuna — nircami.

²¹Memucán chashna yuyaita cushcaca, jatun mandajpaj yuyaipipish, paiman yuyaita cuj caishuj mandajcunapaj yuyaipipish allimi ricurirca. Chaimantami jatun mandaj Asueroca chashnataj rurarca.

²²Pai mandacun tucui llajtacunapi causajcunamanmi, paicunapaj quiquin rimaicunapi ima shina quillcaj shinallataj quillcachishpa, tucui llajtacunaman cacharca. Chai quillcacunapica, tucui cusacunatami paicunapaj huarmicunata alli cazuchichun mandarca. Shinallataj chai mandashcataca, tucui pueblocunapi causajcunapaj quiquin rimaipimi alli huillachun mandarca.