Read Chimborazo Highland Quichua ESTER 4 Bible Online

ESTER 4 - Chimborazo Highland Quichua bible

ESTER 4

¹Judá llajta runacunataca tucuicunata huañuchichun nishpa huillachishcata uyashpami, Mardoqueoca llaquirishpa paipaj churanata lliquishpa cañamazuta churarirca. Umapipish ushpata shitarishpami, caparirishpa huacashpa tucui pueblota purirca.

²Chashnami Mardoqueoca, jatun mandaj yaicuna pungucama chayarca. Chaimanca pipish cañamazuta churarishcaca, mana yaicunallachu carca.

³Shinallataj jatun mandaj mandashpa quillcachishcacunataca, tucui llajtacunapimi chayashpa huillarcacuna. Chaimantami judiocuna yallitaj llaquirishpa, aij nishpa huacarcacuna. Chashna huacashpaca cañamazuta churarishpami, mana micurcacuna. Shinallataj achcacunami chai churanata churarishpaca, ushpapi sirirircacuna.

⁴Jatun mandaj Esterta servij huarmicunapish, paita cuidaj eunucocunapish paipajman shamushpami, Mardoqueo llaquilla puricushcata huillarcacuna. Chaita huillajpica Esterca yallitaj llaquirishpami, cañamazuta llujshichishpa alli churanacunata Mardoqueoman churachichun cacharca. Ashtahuanpish Mardoqueoca mana japisha nircachu.

⁵Chaimantami Esterca, imamanta chashna puricushcata tapuchun, Hatac runataca Mardoqueopajman cacharca. Chai runataca jatun mandajmi, paipaj eunucocunapuramanta Esterta cuidachun ñaupaman churashca carca.

⁶Mardoqueoca, pueblo chaupi pambapimi, mandana huasiman yaicuna pungu ch'imbapurapi tiyacurca. Chaipi tiyacujpimi, Hatac runaca tapunaman rirca.

⁷Pai tapujpimi Mardoqueoca, tucui judiocunata Amán huañuchichisha nishcatapish, paicunata huañuchishcamantaca jatun mandajmanca mashna cullquita cusha nishcatapish huillarca. Chashna huañuchisha nishcamanta, llaquilla cashcatami huillarca.

⁸Shinallataj judiocunata huañuchichun mandashca tiyacun quillcamanta shujtaj quillcata rurashpami, Esterpish tucuita yachachun nishpa, chai quillcataca paiman cuchun cacharca. Jatun mandajca chai mandashca quillcacunataca, Susa pueblopica tucuicuna ricunallapimi ña churachishca carca. Shinallataj Mardoqueoca, judiocunata ama llaquichichunmi, jatun mandajhuan rimagri ninmi nishpa Esterman huillachun Hatac runaman mingarca.

⁹Hatac runa ña tigrashpaca, Mardoqueo imalla nishcatami Esterman huillarca.

¹⁰Chashna huillajpimi Esterca, Hatac runataca cutinllataj Mardoqueota cashna nichun cacharca:

¹¹“Jatun mandaj tiyacun ucumanca pi mana yaicui tucunllachu. Pai manapish cayajpi chaiman yaicujpica, c'ari cajpi huarmi cajpipish mandashcapi nishca shinaca huañuchingatajmi. Pai llaquishpa mana huañuchisha nishpallami, paipaj maquipi charicun curi varatapish ñaupajman chutashpa ricuchinga. Chashna mandashca tiyashcataca, jatun mandajta tucui servijcunapish, pai mandacun tucui llajtacunapi causajcunapish allimi yachancuna. Ñucatacarin paita ricuchunca, ña shuj quillatamari mana cayan” nishpami huillanaman cacharca.

¹²Mardoqueomanca, Ester imallata nishcatami tucuita huillarcacuna.

¹³Chashna huillajpipish Mardoqueoca, cutinllatajmi cashna nichun Esterpajman cacharca: “Canpish judiocunapurallatajmi cangui. Chashna cashcamantaca, mandana huasipi causacushcamanta, canllata mana huañuchina cashcataca ama yuyaichu.

¹⁴Jatun mandajhuan mana cunantaj can rimajpipish, ñucanchij judiocunapajca ima shinapish quishpirinaca tiyangami. Ashtahuanpish cantami cambaj yayapaj huasi ucupuracunandijta huañuchingacuna. Cai llaquimanta ñucanchijta quishpichingapaj canca jatun mandajpaj huarmi tucurcanguipishchari” nichunmi cacharca.

¹⁵Chashna huillajpimi Esterca, cutinllataj cashna nichun Mardoqueopajman cacharca:

¹⁶“Judiocuna cai Susa pueblopi causajcunataca tandanacuchun mandagri. Chashna tandanacushpaca quimsa punllata, quimsa tutata ama imata micushpa, ama imata ubyashpa ñucamanta Diosta mañanguichij. Ñucapish ñucapajta ruraj huarmicunahuanmi ayunagrini. Chai q'uipami jatun mandajhuan rimanaman yaicusha. Mandashcata p'aquishpa chaiman yaicugrishcamanta huañuchishpapish, huañuchingallatajchari ninmi” nichunmi cacharca.

¹⁷Ester chashna nijpi rishpami, Mardoqueoca tucui imalla mandashcata rurarca.