Read Chimborazo Highland Quichua ESTER 7 Bible Online

ESTER 7 - Chimborazo Highland Quichua bible

ESTER 7

¹Jatun mandaj Ester huarmi rurashca jatun micuimanmi jatun mandaj Asueroca, Amantaca pushashpa rirca.

²Chaica cayandij punlla jatun micuita ruracujpimi carca. Chai punllapish, jatun mandajca vinota ubyacushpami Estertaca: — Jatun mandaj Ester, ¿imatataj ningui? Imata nishpapish mañailla. Ñuca mandacun chaupi llajtata mañajpipish cushallami — nirca.

³Chashna nijpimi, Esterca cashna nirca: — Ñucaca caillatami mañapani. Can jatun mandaj ñucata c'uyashpaca, cambaj yuyaipi alli cajpica ñucatapish, tucui ñuca llajtapuracunatapish llaquishpa, ama huañuchichun saquihuaichu.

⁴Ñucapish, tucui ñuca llajtapuracunapish huañuchishpa chingachichun c'atushcamari canchij. Shujtajcunata servijcunalla cachun c'atushca cajpica, can jatun mandajtaca mana imata nishpa, upalla saquirimanllami carcani. Tucui ñucanchijta huañuchijpica, can jatun mandajpajca yallitaj llaquimari canga — nircami.

⁵Shina nijpimi, jatun mandaj Asueroca, jatun mandaj Ester huarmitaca: — ¿Maijantaj paipaj shungupi jatun tucushpa chai jatun llaquita rurasha nicunri, chai runaca maipitagari? — nishpa tapurca.

⁶Chashna tapujpimi Esterca: — Cai millai shungu Amanmari ñucanchijtaca p'iñashpa, juchachishpa huañuchisha nicun — nircami. Chashna nijpica Amanca, jatun mandaj huarmindijpaj ñaupajpica, yallitaj mancharishpa upayashpami saquirirca.

⁷Jatun mandajca, yallitaj p'iñarishpami, micucushca ucumantaca mandana huasi c'uchu huertaman llujshirca. Amanca jatun mandaj paita huañuchinataj cashcata yuyashpami, jatun mandaj Ester huarmitaca: “Jatun mandaj ñucata ama huañuchihuachun paihuan rimapai” ningapaj chai ucullapitaj saquirirca.

⁸Chaipi saquirishpaca, Amanca Esterpaj ñaupajpimi, pai tiyacun jatun tiyanapi cungurishca carca. Jatun mandajca, mandana huasi c'uchu huertamanta tigrashpa chai ucuman yaicushpa, chaita ricushpami Amantaca: — ¿Ñuca huarmi jatun mandajtapish ñuca quiquin huasillapitajchu japirisha ningui imamí? — nirca. Jatun mandaj chashna nijpimi, paipajta rurajcunaca Amantaca ñahuita ch'ungullichircacuna.

⁹Chashna rurashpami, jatun mandajta servij eunucocunapuramanta Harbona runaca: — Cai Amanca, paipaj huasipimi Mardoqueota sipichingapaj, ishqui chunga ishqui metro alto jatun caspita shayachishpa charicun. Mardoqueoca, can jatun mandajta shujtajcuna huañuchishun nicujpi, huillashpa quishpichircamari — nircami. Chashna nijpimi jatun mandajca: — Chai caspipica, paillatataj sipigrichij — nishpa mandarca.

¹⁰Chashna mandajpimi Amantaca, Mardoqueota sipichingapaj pai shayachishca caspillapitaj sipircacuna. Chashna rurachishpami jatun mandajca, yallitaj p'iñarishcamanta alli tucurca.