Read Chimborazo Highland Quichua ESTER 8 Bible Online

ESTER 8 - Chimborazo Highland Quichua bible

ESTER 8

¹Jatun mandaj Asueroca chai punllallatajmi, judiocunata p'iñaj Amán imallata charishcataca, jatun mandaj Ester huarmiman curca. Esterca Mardoqueopaj prima cashcataca, ñami jatun mandajman huillarca. Chaimantami Mardoqueoca, jatun mandajpajmanca yaicui tucurcalla.

²Chashna cajpimi jatun mandajca, Amanta quichushca sortijastaca llujshichishpa Mardoqueoman curca. Shinallataj Esterca, jatun mandajllataj Amanta quichushpa tucui charishcacunata paiman cushcamantami, chaicunata ricuchunca Mardoqueota churarca.

³Chai q'uipaca jatun mandaj Esterca, jatun mandajpajman cutin shamushpami, huacashpa paipaj ñaupajpi cungurishpa pambacama cumurirca. Chashna cumurishpami jatun mandajtaca, judiocunata huañuchichunca ama saquihuaichu nishpa mañarca. Paicunata huañuchichun Agagpaj huahua huahuacunapura caj Amán mandashcata anchuchichunmi mañarca.

⁴Chashna mañajpimi jatun mandajca, pai charicushca curi varataca, Esterpaj ñaupajman chutarca. Chashna chutajpimi Ester jatarishpaca, paipaj ñaupajpi shayarishpa cashna nirca:

⁵— Jatun mandajlla, canta ñuca chashna mañashpaca manapishchari p'iñachircani. Ñuca mañashca alli cajpi, ñucapish can jatun mandajpi alli ricurishca cajpi, cambaj yuyaipipish alli yuyachijpica, tucui ñucanchij judiocunata huañuchichunca amataj saquihuaichu. Ñucanchijta huañuchichun Agagpaj huahua huahuapura Hamedatapaj churi Amán mandashcataca anchuchipaiyari. Can jatun mandaj mandacun tucui llajtacunaman Amán cachashca quillcacunapi mandashcataca anchuchichun mandashpa, shujtaj quillcata rurapai.

⁶Tucui ñuca llajtapuracunatapish, ñuca quiquin huasi ucupuracunatapish huañuchichunca, maitataj ricucushallari. Tucui ñucanchij jahuapi cai jatun llaqui shamujta yachashca jahuaca, maitataj upalla cashari — nircami.

⁷Chashna nijpimi, jatun mandaj Asueroca jatun mandaj Ester huarmitapish, Judá llajtamanta caj Mardoqueotapish cashna nirca: — Tucui judiocunata huañuchisha nishcamantami, Amantaca sipichircani. Shinallataj pai imalla charishcacunatapish, can Estermanmi curcani.

⁸Chashna cashcamantaca judiocunata ama huañuchichunca, cancunapaj yuyaipi ima ashtahuan alli cashcata ñuca shutipi quillcaichij. Chai quillcacunapica, ñuca sortijaspi tiyaj sellota churaichij. Jatun mandajpaj shutipi quillcashpa, jatun mandajpajllataj sellota churashpa mandashcataca, mana anchuchipajllachu — nircami.

⁹Chashna nijpica, chai punllallatajmi jatun mandajpaj quillcajcunataca utca tandachircacuna. Chai punllaca, chai huatapaj quimsa quilla caj Siván shuti quillapaj ishqui chunga quimsa punllami carca. Chai quillcajcunaca, Mardoqueo mandashcatami quillcarcacuna. India llajtamanta callarishpa, Etiopía llajtacamaca, 127 llajtacunapi causajcunapajmi, cada llajtapaj quiquin rimaicunapi ima shina quillcaj shinallataj entendinallata quillcarcacuna. Judiocunapajpish, satrapacunapajpish, caishuj mandajcunapajpish, cada llajtacunata mandajcunapajpishmi chashna quillcarcacuna. Judiocunapajpish, paicunapaj quiquin rimaipi entendinallatami quillcarcacuna.

¹⁰Jatun mandaj Asueropaj shutipi quillcashpami, paipajllataj sortijaspi caj sellota churarcacuna. Chai quillcacunata saquigrichunca, quillcata apajcunatami cacharcacuna. Chaicunaca jatun mandajpaj callpaj caballocunapi tiyarishpami rircacuna.

¹¹Chai quillcacunapica jatun mandajca, judiocunataca tucui pueblocunapi causajcunatami cashna mandarca: “Mai llajtapi cashpapish chaipi causajcuna cancunata huañuchingapaj macanacunacunahuan shamujpica, cancuna causacun pueblocunapi tandanacushpa mitsaringuichij. Huañuchinaman shamujcunapajtaca huarmicunatapish, huahuacunatapish ama llaquishpa huañuchinguichijlla. Paicuna imalla charishcacunatapish japi tucunguichijmi.

¹²Jatun mandaj Asuero mandacun tucui llajtacunapimi, shuj punllallapi chashna rurana canguichij. Cai huatami chunga ishqui quilla caj Adar shuti quilla chunga quimsa punllapica, chashna rurana canguichij” nishpami mandarca.

¹³Chai quillcacunapi mandashcataca, judiocuna paicunata p'iñajcunamanta mitsarichun macanacuna punllapaj allichirishca cachunmi, tucui llajtacunapi causajcunaman huillachinataj carca.

¹⁴Jatun mandaj cachajpimi quillcata apajcunaca, quillcacunata apashpa, callpaj caballocunapi tiyarishpa rircacuna. Jatun mandaj causacun Susa pueblopipish, chai mandashcataca ñami huillarcacuna.

¹⁵Mardoqueoca, jatun mandaj churarina shina azulhuan, yurajhuan churanata churarishca, jahuatapish linollamanta rurashca morado churanatami churashca carca. Umapica, curimanta rurashca sumaj coronatami churashca carca. Chashnami Mardoqueoca, jatun mandajpaj ñaupajmanta llujshirca. Chaimantami Susa pueblopi causajcunaca, jatunta cushicushpa caparircacuna.

¹⁶Judiocunapajcarin amsamanta achijman llujshishca shinapish, cushicuipish, alli nishca canapish, caishuj chaishujhuan cushicuipishmi tiyarca.

¹⁷Tucui llajtacunapipish, pueblocunapipishmi jatun mandaj mandashcahuan chayajpica, judiocunaca yallitaj cushicushpa jatun micuita rurarcacuna. Shinallataj chai llajtacunapi causajcunaca, judiocunata yallitaj manchashpami, paicunapura tucurcacuna.