Read Chimborazo Highland Quichua ÉXODO 11 Bible Online

ÉXODO 11 - Chimborazo Highland Quichua bible

ÉXODO 11

¹Mandaj Diosca Moisestaca: — Faraonpaj, cai Egiptopi causajcunapaj jahuamanca yallitaj llaquitami apamugrini. Chaipimi cancunataca paica richun saquinga. Paitajmi cancunataca shuj cutin llujshichishpa cachanga.

²Israelcunataca c'aricunatapish, huarmicunatapish paicunapaj c'uchullapi causaj egipciocunataca cullquimanta, curimanta rurashca sumaj charinacunata mañachun mandai — nircami.

³Mandaj Diosca, israelcunataca egipciocunapaj ñahuipi alli ricurij cajtami rurarca. Moisestapish faraonpajta rurajcunapaj ñaupajpi, egipciocunapaj ñaupajpi chai llajtapica allita ruraj runa cashcatami ricuchirca.

⁴Moisesca faraontaca: — Mandaj Diosca cashnami nin: Cunan chaupi tutatami egipciocunapaj llajtata purigrini,

⁵Egipto llajtapi causajcunapaj punta huacharishca c'ari huahuacunami huañunga. Mandashpa tiyanapi tiyacuj faraonpaj punta churimanta callarishpaca, molinopi cutashpa paipajta ruraj huarmipaj punta churicamami huañunga. Punta huacharishca animalcunapish tucuimi huañunga.

⁶Tucui Egipto llajtapimi, caparishpa huacana tiyanga. Chashna llaquica nunca mana tiyashcachu, cutinpish manataj tiyangachu ninmi.

⁷Ashtahuanpish israelcunataca paicunatapish, paicunapaj animalcunatapish shuj allcupaj c'allullapish mana cuyuringachu. Egipciocunahuan, israelcunahuanca Mandaj Diosca ch'ican cashcata ricuchingapajmi chashna ruranga.

⁸Chaipica tucui cambajta rurajcunami ñucapajman shamushpa ñuca ñaupajpi cungurishpaca: Canpish, tucui cambaj ucupi caj gentecunapish richij ningacuna. Tucui chai q'uipami ñucaca llujshishpa risha — nishpaca, Moisesca yallitaj p'iñarishcami faraonpaj ñaupajmanta llujshishpa rirca.

⁹Cutinpish Mandaj Diosca Moisestaca: — Egipto llajtapi mancharinacunata ñuca ashtahuan rurachunmi faraonca cancuna nishcataca manaraj uyanga — nircami.

¹⁰Moiseshuan Aaronhuanca, tucui cai milagrocunata faraonpaj ñaupajpi rurajpipish Mandaj Diosllataj faraonpaj shunguta rumi shunguta rurashcamantami, israelcunataca chai llajtamanta llujshichunca manataj saquirca.