Read Chimborazo Highland Quichua ÉXODO 12 Bible Online

ÉXODO 12 - Chimborazo Highland Quichua bible

ÉXODO 12

¹Mandaj Diosca Egipto llajtapica Moisesta, Aarontaca cashnami nirca:

²“Cai quillaca cancunapajca huatapaj callari quilla, tucui quillacunamanta yalli alli quillami canga.

³Tandanacushca tucui israelcunataca cashna ni: Cai quillapaj chunga punllapica tucui cancunapaj cada huasi ucupuracuna cada huasi ucupurapaj shuj malta ovejatami charicuna canguichij.

⁴Maijan familia yallitaj ashalla cashpa malta ovejapaj aichata mana tucui micuipaj cashpaca, paipaj huasi c'uchullapi causajhuan tucushpa chai ishqui tandanacushca familiacunapaj yayacunaca mashna cashcata ricushpa shuj malta ovejata japinguichij. Chai aichataca cada quiquin mashnata micui tucuipajllata chaupishpa cunguichij.

⁵Chai animalca ima mana tucushca shuj huatata charij c'ari animal cachun. Ovejata cashpa, chivota cashpa cancunapaj canllamanta shujta japinguichij.

⁶Chai animaltaca, cai quillapaj chunga chuscu punllacama alli cuidashpa chai chishi zuyuyacuita huañuchinguichij. Tucui tandanacushca israelcunami chai horasllataj huañuchina canguichij.

⁷Chai animalpaj yahuarta japishpaca, chai aichata micuna huasi pungu ishqui lado quisyupi, quinriman churashca caspipipish llihuinguichij.

⁸Chai tutaca cusashca aichata, levadura illajlla tandahuan, jayaj q'uihuacunahuan micunguichij.

⁹Chai animalpaj aichataca chahuata cashpapish, yacupi yanushcata cashpapish imata ama micunguichijchu. Umatapish, chaqui maquicunatapish, chunllullicunatapish, aichatapish tucuita cusashcata micunguichij.

¹⁰Chai aichataca cayandij tutamantapajca imata ama saquinguichijchu. Cayandij tutamantapaj ima saquirijpica tucui rupachinguichij.

¹¹Chai aichataca alli chumbillirishca, pargatetapish churarishca, tauna caspitapish maquipi aisashcami micuna canguichij. Mandaj Diospaj Pascua cashcamantaca utcami micuna canguichij.

¹²Chai tutaca Egipto llajtatami puricusha. Chai llajtapi causajcunapaj punta huacharishcacunataca gentecunapajtapish, animalcunapajtapish punta huacharishca c'ari huahuacunataca tucuitami huañuchisha. Chashnami egipciocunapaj dioscunaca yangalla cashcata, ñucaca Mandaj Diostaj cashcata ricuchisha.

¹³Chai yahuarca israelcuna mai huasipi cashcata ricuchijmi canga. Chai yahuarta ricushpami cancunapaj huasi ñaupajtaca pasashpa rishalla. Chashnami egipciocunata huañuchishpa llaquichicujpica cancunapurapica huañui llaquica mana tiyanga.

¹⁴Chai punllataca cancunaca yuyaricunallami canguichij. Mandaj Diospaj jatun fiestataca cancunapaj huahua huahuacunapish ruracungallacunami. Chai mandashcaca huiñaipaj cashcamanta ruracunallami canguichij.

¹⁵Canchis punllacunapica levadura illajlla tandatami micuna canguichij. Chai punllacunapica punta punllamanta pacha tucuri punllacama cancunapaj huasicunamantaca levaduracunata anchuchinguichij. Maijanpish chai canchis punllacunapi maijan punllapi levadurayuj tandata micujca, israelcunapuramanta anchuchishcami canga.

¹⁶Punta punllapica tucuita cayashpa Diospajlla tandanacuimi canga. Tucuri canchis punllapipish tucuita cayashpa Diospajlla tandanacuita charinguichij. Chai ishqui punllacunapica amataj cancunapajca imata ruranguichijchu. Ashtahuanpish cancuna micungapajlla micunata allichinguichij.

¹⁷Levadura illajlla tandata micuna punllacunapica amataj saquishpa ruracunguichijlla. Chai punllacunallapitajmi cancunataca achca tandanacushcacunata Egiptomanta llujshichimurcani. Chaimanta cai mandashcataca cancunapaj huahua huahuacunapish huahua huahua huiñaita pajtachicuchunllacuna.

¹⁸Huata callari quillapaj chunga chuscu punlla chishimanta callarishpaca, chai quillapaj ishqui chunga shuj punlla chishicamami chashna levadura illajlla tandata micuna canguichij.

¹⁹Chai canchis punllacunapica cancunapaj huasicunapica levaduraca mana ricurinachu can. Maijanpish levadurahuan p'unguillichishcacunata micujcunaca israelcuna cashpapish, mana israelcuna cashpapish israelcunapuramantaca anchuchishcami canga.

²⁰Chai punllacunapica, levadurahuan p'unguillichishcacunataca imata ama micunguichijchu. Cancunapaj huasicunapica levadura illajlla tandatami micuna canguichij ninmi nigri” nircami.

²¹Chaimi Moisesca, israelcunata cunaj yuyajcunata tandachishpaca: “Cancunapaj huasi ucupurapaj malta ovejata mashcanaman llujshishpa chai malta ovejataca Pascuapi sacrificaichij.

²²Maqui junda hisopota japishpa chai ovejapaj yahuar bateapi tiyacunpi satishpa pungupi quinriman churashca caspipish, pungu ishqui lado quisyucunapipish llihuinguichij. Cancunaca shujllapish cancunapaj huasimantaca pacaringacama ama llujshinguichijchu.

²³Mandaj Diosca Egipto llajtapi causajcunata huañuchicushpaca, cancunapaj pungupi quinriman churashca caspita pungu ishqui lado quisyucunata yahuarhuan llihuishcata ricushpaca pasajta ringallami. Huañuchij cancunapaj huasicunaman yaicushpa huañuchichun mana saquingachu.

²⁴Chashna yachachishcacunataca cancunapish, cancunapaj huahua huahuacunapish huiñaipaj mandashca cashcamanta pajtachicunallami canguichij.

²⁵Mandaj Diosca pai cusha nishca shinallataj cancunata chai llajtaman chayachijpica cancunaca chai mandashcacunataca pajtachicunallami canguichij.

²⁶Cancunapaj huahuacuna: Cai cancuna ruracuntaca ¿imapajtaj ruranguichij? nishpa tapujpica,

²⁷cancunaca: Cai Pascua ovejaca ñucanchij Mandaj Diosta alli nishpa yuyarishpa micunami. Mandaj Dios egipciocunata huañuchicushpaca, Egiptopi caj israelcunataca mana huañuchircachu. Chashnami ñucanchijtaca mana llaquichishpa quishpichirca ninmi ninguichij” nijpimi israelcunaca, cumurishpa Mandaj Diosta adorarcacuna.

²⁸Israelcunaca Moisesta, Aaronta Mandaj Dios ima shinalla mandashca shinami chaitataj tucuita rurarcacuna.

²⁹Mandaj Diosca, chaupi tutami egipciocunapaj punta churicunataca tucuicunata huañuchirca. Mandashpa tiyanapi tiyacuj faraonpaj punta churimanta callarishpaca, macanacuipi prezu japimushca carcelpi tiyacujpaj punta churicamami huañuchirca. Punta huacharishca animalcunatapishmi huañuchirca.

³⁰Egipciocunapaj huasicunapica tucuicunapajpi shuj huañushca tiyajpimi faraonpish, paipajta rurajcunapish, tucui egipciocunapish chai tuta jatarishpaca jatunta caparishpa huacarcacuna.

³¹Chai tutallataj Moisesta, Aaronta cayachishpami faraonca: — Cancunapish, tucui israelcunapish cai llajtapi causaj ñuca runacunapaj chaupimanta llujshishpa cancuna nishca shinallataj cancunata Mandaj Diospajta ruranaman richij.

³²Cancuna nishca shinallataj cancunapaj ovejacunatapish, vacacunatapish apashpa richij. Ñucatapish alli cashca cachun ninguichij — nircami.

³³Egipciocunaca: “Tucuicunami ña huañugrinchij” yuyashpami, israelcunataca: “Cai llajtamanta utca richij” nishpa llujshichishpa cacharcacuna.

³⁴Israelcunaca tandata rurangapaj masacushcataca levadurata manaraj churashpami, linsocunapi quipishpa rigra jahuapi churashpa aparcacuna.

³⁵Israelcunaca Moisés mandashca shinallatajmi egipciocunataca cullquimanta, curimanta rurashca sumaj charinacunatapish, churanacunatapish mañarcacuna.

³⁶Mandaj Diosca israelcunataca egipciocunapaj ñahuipi alli ricurij cajta rurajpimi, egipciocunaca mashnata israelcuna mañashcata cujpi, israelcunaca egipciocunataca quichushpa rircacuna.

³⁷Israelcunaca Ramesés pueblomanta llujshishpaca, Sucot pueblomanmi rircacuna. Paicunaca huahuacunata mana yupashcami chaquillahuan rij 600.000 runacuna carca.

³⁸Paicunahuanca yallitaj achca tucui laya runacunami huichiyarcacuna. Achca ovejacunata, achca huagracunatami aparcacuna.

³⁹Israelcunaca Egiptopi tandata ruracushpa levadurata manaraj churashca masata apashpa llujshishcallatami tortillata rurashpa cusashpa micurcacuna. Egipciocuna utca llujshichij nicujpimi israelcunaca paicunapaj micunata allichinataca mana pajtarishca carcacuna.

⁴⁰Israelcunaca Egiptopica, 430 huatacunatami causarcacuna.

⁴¹Ña 430 huatacuna pajtai punllami, Mandaj Dios agllashcacunaca soldadocuna shina mirga mirgapi ch'icanchishca Egiptomanta tucuicuna llujshircacuna.

⁴²Chai tutaca Mandaj Dios israelcunata Egiptomanta tucui tuta llujshichishcamanta Mandaj Diospaj tutami. Chaimanta israelcunaca huahua huahua chai tutapica mana dormishpa Mandaj Diosta alli nishpa yuyaricuchunllacuna.

⁴³Mandaj Diosca Moisesta, Aarontaca: “Cai mandashcacunaca Pascua micuimanta mandashcami. Pascua micuitaca mana Israel cajca pipish mana micungallachu.

⁴⁴Maijancunata paipajta ruraj cachun cullquihuan randishca cashca cashpapish, circuncisionta rurashca cashpallami micunga.

⁴⁵Mana Israel cajpish, mana cashpaca trabajacushcallamanta chaipi cajca mana micui tucunchu.

⁴⁶Chai aichataca shuj huasi ucullapi micunguichij. Mirgallatapish ama canllaman llujshichinguichijchu. Tullutaca shuj tullullatapish ama p'aquinguichijchu.

⁴⁷Tucui israelcunami chashna rurana can.

⁴⁸Mana israelcuna cancunahuan causacujcuna Mandaj Diospaj Pascua micuita micusha nishpaca, tucui c'aricuna circuncisiontaraj rurachishpa, chai q'uipa chai Pascua micuita rurachun. Chashna rurashpaca, israelpurallatajmi canga. Maijanpish circuncisionta mana rurachishca cashpaca Pascua micuitaca amataj micuchun.

⁴⁹Chai mandashcallatajmi israelcunatapish, cancunapurapi causacuj mana israelcunatapish mandanga” nircami.

⁵⁰Chaitaca israelcunaca Mandaj Dios Moisesman, Aaronman mandashca shinallatajmi rurarcacuna. Tucuitami chashnataj rurarcacuna.

⁵¹Mandaj Diosca chai punllallatajmi pai agllashca israelcunataca, soldadocunata shina mirga mirgapi ch'icanchishcata Egiptomanta llujshichirca.