Read Chimborazo Highland Quichua ÉXODO 13 Bible Online

ÉXODO 13 - Chimborazo Highland Quichua bible

ÉXODO 13

¹Mandaj Diosca Moisestaca:

²“Punta huacharishcacunataca Diospajlla cachun ch'icanchichij. Israelcunapurapi punta huacharishcacunaca gentecuna cashpa, animalcuna cashpapish ñucapajmi” nircami.

³Chaimi Moisesca israelcunataca: “Egiptopi huatashca shina ruracujta Mandaj Dios tucuita rurai tucuj maquihuan cai punllapi llujshichishcataca yuyaricunallami canguichij. Chai punllapica levadurayuj tandataca ama micunguichijchu.

⁴Cunan cancuna caimanta llujshin quillaca Abib quillami.

⁵Cananeocuna, heteocuna, amorreocuna, heveocuna, jebuseocuna causacun llajtamanmi Mandaj Diosca cancunataca yaicuchinga. Lechepish, sacha chuspipaj mishquipish yacu llujshicuj shina tiyan llajtataca cancunapaj ñaupa yayacunamanmi Mandaj Diosca cusha nishpa ari nishca carca. Chai llajtapi ña cashpaca cai quillallapitaj Pascua micuitaca ruranguichij.

⁶Cancunaca canchis punllacamami levadura illajlla tandataca micuna canguichij. Chai canchis punllacuna tucuri punllaca Mandaj Diosta yuyaringapajlla shuj fiestata ruranguichij.

⁷Chai canchis punllacunapica, levadura illajlla tandatami micuna canguichij. Chai punllacunapica tucui llajtapi levadurahuan p'unguillichishcatapish, levaduratapish amataj charinguichij.

⁸Pascua micuita ruracui punllapica cancunapaj huahuacunamanca: Mandaj Dios ñucanchijta Egiptomanta llujshichimushpa ñucanchijpaj imallata rurashpa llujshichishcata yuyarishpami chashna ruracunchij nishpa parlanguichij.

⁹Cai ruraicunaca Mandaj Dios tucuita rurai tucuj maquihuan Egiptomanta canta llujshichimushcataca cambaj maquipi, mana cashpaca ñahui patapi ricunapaj churashca shinami yuyachicungalla. Mandaj Dios mandashca cambaj shimipi cachunmi chashna canga.

¹⁰Chaimantami cancunaca cai fiestataca huatanta ima quillapi, ima punllapi rurachun nishcapitaj rurana canguichij.

¹¹Mandaj Dios cancunamanpish, cancunapaj ñaupa yayacunamanpish cusha nishca shinallataj Canaán llajtaman ña chayachijpica,

¹²cancunapaj punta churicunataca Mandaj Diospaj cashcamanta paiman cunguichij. Cancunapaj animalcunamanta punta huacharishca animalcunatapish Mandaj Diosman cunguichij. Punta huacharishca c'aricunaca Mandaj Diospajmi.

¹³Punta huacharishca burropaj randica shuj ovejata cushpa chai burrotaca llujshichichun. Mana chashna llujshichishpaca cungata p'aquishpa huañuchichun. Punta huacharishca churicunatapish chashnallataj llujshichinguichij.

¹⁴Caya mincha cambaj huahua: ¿Imapajtaj cashnaca ruranguichij? nijpica: Egipto llajtapi huatashca shina llaquinayajta causacujpimari Mandaj Diosca ñucanchijtaca tucuita rurai tucuj paipaj maquihuan llujshichimurca.

¹⁵Faraonca rumi shungu tucushpami, ñucanchijtaca chai llajtamanta llujshichun manataj saquisha nirca. Chaimi Mandaj Diosca, Egipto llajtapi causajcunapajtaca tucui punta c'ari huahuacunata huañuchirca. Punta huacharishca animalcunatapishmi tucuita huañuchirca. Chaimantami ñucanchijca punta huacharishca c'ari animalcunataca Mandaj Diosman cushpa huañuchinchij. Ñucanchij punta churicunatapish paicunapaj randi imata cuna cashcata Mandaj Diosman cushpami llujshichimunchij.

¹⁶Mandaj Dios tucuita rurai tucuj maquihuan Egiptomanta llujshichimushcataca cambaj maquipi, mana cashpaca ñahui patapi ricunapaj churashca shinami cancunataca yuyachicungalla nishpa huillanguichij” nircami.

¹⁷Israelcunata richun faraón ña saquijpica, Taita Diosca Canaanman utca chayanalla filisteocunapaj ñantaca mana pusharcachu. Macanacui tiyajpica, manamari shamuna cashcanchijchu nishpa Egiptollamantaj tigranamantami mana chaita pusharca.

¹⁸Taita Diosca israelcunataca shitashca pambata Puca Cuchaman rina ñanta muyuchishpami pusharca. Israelcunaca Egiptomantaca tucuicunami soldadocuna shina mirga mirgapi ch'icanchishca huichiyarcacuna.

¹⁹Moisesca Josepaj tullucunata apashcami llujshirca. Joseca: “Taita Diosca cancunata ricunaman shamungatajmi. Chaipica, ñuca tullucunataca cai llajtamantaca apashpa ringuichij” nishpami israelcunataca ari nichishca carca.

²⁰Israelcunaca Sucotmanta rishpaca, Etam shitashca pambaman chayanllapimi, carpa huasicunata shayachishpa saquirircacuna.

²¹Mandaj Diosca israelcunata ñaupashcami rirca. Punllaca suni p'uyuhuanmi paicuna rina ñanta ñauparca. Tutaca lunyacuj ninahuanmi achijyachishpa ñauparca. Punllapish, tutapish richunmi chashna ñauparca.

²²Punllacunaca suni p'uyumi israelcunapaj ñaupajmantaca manataj anchurca. Tutaca lunyacuj ninami paicunapaj ñaupajmantaca manataj anchurca.