Read Chimborazo Highland Quichua ÉXODO 14 Bible Online

ÉXODO 14 - Chimborazo Highland Quichua bible

ÉXODO 14

¹Mandaj Diosca Moisestaca:

²“Israelcunataca: Puca Cuchahuan, Migdol pueblohuan chaupipi caj Pi-hahirot, Baal-zefón pueblocuna ch'imbapuraman tigrashpa chaillapi saquirichij. Chai pueblocuna ch'imbapurapi caj cucha yacu c'uchullapi cancunapaj carpa huasicunata shayachishpa tiyarichij.

³Chaimi faraonca israelcunataca: Israelcunaca maiman rinatapish mana yachajchu yuyachin, chai shitashca pamballapimi chingarishpa puricunllacuna yuyanga.

⁴Faraontaca, ñucami rumi shunguta rurashpa cancunata catishpa rina yuyaita cugrini. Ñucaca faraonpi paipaj soldadocunapimi jatun cashcata ricuchisha. Chaimi egipciocunaca ñucataca Mandaj Diostaj cashcata yachangacuna ninmi ningui” nircami. Israelcunaca chashnatajmi rurarcacuna.

⁵Egipto llajtapi causajcunaca, paicunata jatun mandajmanca: “Israelcunaca ñami cai llajtamanta llujshishpa rincuna” nishpa huillajpimi, faraonpish, paipajta rurajcunapish cutin p'iñarishpaca: “Israelcuna ñucanchijta ama ashtahuan ruraj cachun paicuna richun saquishpaca ¿imatataj rurashcanchijchu imamí?” ninacurcacuna.

⁶Chashna nishcahuanmi jatun mandajca, paipaj carrota caballocunahuan aisachishpa paipaj soldadocunata pushashpa rirca.

⁷600 agllashca alli carrocunatapish, Egipto llajtapi tiyaj tucui carrocunatapish tandachishpami, cada carropi mandajcunata churashpa rirca.

⁸Tucuita rurai tucuj maquihuan llujshichishca cajpipish Mandaj Diosllataj faraonpaj shunguta rumi shunguta rurajpimi israelcunata catishpa rirca.

⁹Egipciocunaca caballopi tiyarishcacunandij, faraonpaj carrocunandij tucui soldadocunandij rishpaca, Baal-zefón ch'imbapurapi caj Pi-hahirot pueblo c'uchupi caj cucha uripi carpa huasicunata shayachishpa tiyacujpimi israelcunataca japigrircacuna.

¹⁰Faraón ñalla c'uchuyagricujta israelcuna ricushpami, paicunata egipciocuna caticushcata ricushpa, jatunta mancharishpa Mandaj Diosta caparishpa mañarcacuna.

¹¹Israelcunaca Moisestaca: — ¿Egiptopica pambana jutcucuna mana tiyajpichu cai shitashca pambapi huañuchun ñucanchijtaca llujshichimurcangui? Egiptomanta ñucanchijta llujshichimushpaca mana ruranatamari rurangui.

¹²¿Manachu Egiptopi ñucanchij nishca shinallataj tucucunchij? Ñucanchijca: Egiptopi cashpallatajmi egipciocunapajta rurashpa causachun ñucanchijtaca saquilla. Shitashca pambapi huañugrinapaj randica, egipciocunapajta rurashpa causanami alli canman nircanchij — nircacuna.

¹³Chaimi Moisesca israelcunataca: — Ama manchashpa sinchi sinchi caichijlla. Ricunguichij cunan ima shinami Mandaj Dios cancunata quishpichinga. Cunan punlla cancuna ricushca egipciocunataca cutinca ña manataj ashtahuan ricunguichijchu.

¹⁴Mandaj Diosmi cancunamantaca macanacunga. Cancunaca imata mana ruranachu canguichij — nirca.

¹⁵Chaipimi Mandaj Diosca Moisestaca: — ¿Ima nishpataj ñucata caparingui? Ashtahuanpish israelcunataca maiman ricushcaman rishpa catichun mandai.

¹⁶Israelcuna cucha chaupita chaquishca allpata ch'imbachun, canca cambaj caspita alzashpa, cambaj maquita cucha ladoman chutashpa yacuta ishquindij ladoman chaupi.

¹⁷Egipciocunapaj shungutaca ñucami rumi shunguta rurashpa cancunata ashtahuan catina yuyaita cugrini. Chaipica ñucaca faraonpi, paipaj tucui soldadocunapi, paipaj carrocunapi, paipaj caballopi tiyarij soldadocunapimi ñuca tucuita rurai tucuj jatun cashca ricurisha.

¹⁸Faraonpi, paipaj carrocunapi, paipaj caballopi tiyarishca soldadocunapi ñucaca tucuita rurai tucuj cashcata ricuchijpimi egipciocunaca ñucaca Mandaj Diostaj cashcata yachangacuna — nircami.

¹⁹Israelcunata ñaupashpa ricuj Taita Diospaj angelca paicunapaj huasha ladoman tucushpami huashata catirca. Paicunata ñaupashpa ricuj suni p'uyupish paicunapaj huasha ladoman tucushpa huashata catishpami,

²⁰egipciocunahuan, israelcunahuan chaupipi rirca. Suni p'uyuca egipciocunataca yallitajmi amsayachirca. Ashtahuanpish chai tutaca israelcunataca achijyachircami. Chaimi chai tutaca caishujmanta chaishujmanta mana c'uchuyai tucurcacuna.

²¹Moisesca jatun cucha jahuatami paipaj maquita chutarca. Mandaj Diosca tucui tutami inti llujshin lado sinchi huairata cacharca. Chai huaira tucui tuta p'ucujpimi, jatun cucha yacuca ishquipi chaupirirca. Chai cucha yacu cada ladoman chaupirijpimi chaquishca allpa tucurca.

²²Chaupi yacuca lluqui ladoman, chaupica alli ladoman jatun patacuna shina tucujpimi, chaupi mama cuchata chaquishca allpata ch'imbangapaj israelcunaca yaicurcacuna.

²³Egipciocunaca israelcunata catishcami, caballopi tiyarishca faraonpaj soldadocunandij, carrocunandij, yaicushpa chaupi cuchacama rircacuna.

²⁴Chai tuta ña pacaricuitami Mandaj Diosca lunyacuj ninamanta, suni p'uyumanta ricurishpa, Egipto soldadocunataca tucui muspachishpa,

²⁵paicunapaj carrocunapaj ruedacunatapish llujshijpi chai carrocunapish urata janajta llaqui tucurcacuna. Chaimi egipciocunaca: — Israelcunamanta anchushpa callpashunchij. Mandaj Diosmari paicunapaj randi egipciocunahuan macanacugrin — nircacuna.

²⁶Mandaj Diosca Moisestaca: — Egipciocunatapish, carrocunatapish, caballopi tiyarishcacunatapish, yacu tapachun cucha jahuata cambaj maquita chutai — nircami.

²⁷Shina nijpi Moisés paipaj maquita cucha jahuata chutajpi ña pacaricuitaca, chai yacuca ñaupaman ima shina cashca shinallamantaj tucui fuerzahuan tigrajpimi, egipciocuna tigrashpa callpagrishpaca chai yacupi millpurircacuna. Chashnami Mandaj Diosca egipciocunataca chai cuchapi chingachirca.

²⁸Chai cucha ñaupaman cashca shinallataj tucujpica, faraonpaj carrocunapish, caballopi tiyarishca soldadocunapish, tucui soldadocunami israelcunata caticujcunaca chai cuchapi millpurishpa shujllapish mana saquirircacuna.

²⁹Ashtahuanpish israelcunaca chai yacu alli ladomanpish lluqui ladomanpish pata shina tucushcatami, chaupi cuchata chaquishca allpata rircallacuna.

³⁰Chashnami chai punllaca, Mandaj Diosca israelcunataca egipciocunapaj maquimanta quishpichirca. Israelcunaca egipciocunataca mama cucha uripi huañushca siricujtami ricurcacuna.

³¹Mandaj Dios chai Egipto llajta soldadocunata jatun mancharinata rurajta ricushpami, israelcunaca Mandaj Diostaca mancharcacuna. Mandaj Diospipish, paipajta ruraj Moisespipishmi shunguta churarcacuna.