Read Chimborazo Highland Quichua ÉXODO 15 Bible Online

ÉXODO 15 - Chimborazo Highland Quichua bible

ÉXODO 15

¹Moisespish, tucui israelcunapish cai cantotami Mandaj Diosta alabashpa cantarcacuna: “Mandaj Diostami ñucaca cantasha. Paica jatun cashcahuan pillurishcami. Caballocunatapish, soldadocunatapish cuchapimi shitashca.

²Mandaj Diosca ñuca fuerzami. Mandaj Diosca ñuca cantanami. Mandaj Diosca ñuca quishpirinami. Chaimi ñuca Diosca, paitami ñucaca alabacuni. Paica ñuca yayapaj Diosmi, paitami jatunyachini.

³Mandaj Diosca alli macanacujmi. Paipaj shutica Mandaj Diosmi.

⁴Faraonpaj carrocunatapish soldadocunatapish, cuchapimi shitarca. Soldadocunata mandaj tucuimanta yalli allicunatapish Puca Cuchapimi huashicuchirca.

⁵Yacuca ucujmanmi millpurca. Rumi shinamari cucha ucujman huashicurcacuna.

⁶Mandaj Dioslla, cambaj alli maquica tucuita rurai tucujmari. Mandaj Dioslla cambaj alli maquica p'iñajcunataca chingachishcamari.

⁷Canta p'iñashpa jatarijcunataca, tucuita rurai tucuj cashcahuanmi urmachishcangui. Canca jatunta p'iñarishpami, p'angacunata shinalla chingachishcangui.

⁸Can p'ucujpica yacucunaca patami tucurca. Volacuj yacupish patami tucurca. Ucujta yacuca patami tucurca.

⁹P'iñajca cashnami nirca: Paicunataca cati japijtami risha. Mirga mirgatami rurasha. Quichushcacunatapish chaupicushami. Chashna rurashpami ñuca almaca samaringa. Ñuca espadata llujshichishami. Ñuca maquihuanmi tucuchisha nircami.

¹⁰Ashtahuanpish cambaj huairahuan p'ucushpami, yacuhuan tapachircangui. Jatun yacupica plomo shinami huashicurcacuna.

¹¹Mandaj Dioslla, dioscunapaj chaupipica ¿pitaj can shinaca tiyangari? ¿Can shina jucha illaj, tucuita rurai tucujca pitaj tiyangari? Canca pi mana rurai tucushca jatun mancharinacunata rurajmi cangui. Milagrocunata rurajmi cangui.

¹²Cambaj alli maquita chutajpica, allpaca millpurcami.

¹³Quiquin quishpichishca cai gentecunataca cambaj llaquij cashcapimi pusharcangui. Tucuita rurai tucujhuanmi pushangui. Jucha illaj cambaj huasimanmi pushangui.

¹⁴Tucui llajtacunami uyanga. Chujchungacunami. Filisteocunaca jatun nanaihuanmi huañucungacuna.

¹⁵Edom llajtata mandajcunaca musparicungacunami. C'ari c'ari moabitacunataca manchaimi chujchuchicunga. Canaanpi causajcunapish tucuicunami imata mana rurai tucuj cangacuna.

¹⁶Paicunapaj jahuapica chujchuipish, manchaipish urmachun. Tucuita rurai tucuj cambaj rigrata ricushpaca, rumi shina upa cashca cachun. Mandaj Dioslla can agllashcacuna pasangacama chashna cachun. Can quishpichishca cai gentecuna pasangacama chashna cachun.

¹⁷Mandaj Dios cambaj urcumanmi yaicuchingui. Cambaj urcupimi tarpungui. Mandaj Dios can causanapaj maipi allichishcamanmi pushangui. Cambaj maquihuan rurashca cambajlla ucumanmi pushangui.

¹⁸Mandaj Diosca huiñai huiñaitami mandanga. Paica mandacungallami” nishpami cantarcacuna.

¹⁹Faraonpaj caballocuna paipaj carrocunandij, gentecunandij mama cuchaman yaicujpica, chai mama cucha montonarishcatami Mandaj Diosca paicunapaj jahuaman cacharirca. Ashtahuanpish israelcunaca chaupi cuchatami chaquishca allpata ch'imbarcacuna.

²⁰Chaipimi Aaronpaj pani profeta Mariaca, shuj panderota japishpa tocajpi, shujtaj huarmicunapish panderocunapi tocashpa tushuihuan paita catishca llujshircacuna.

²¹Mariaca cashna nishpami cantarca: “Mandaj Diosta cantaichij. Paica jatun cashcahuan pillurishcami. Caballocunatapish, soldadocunatapish cuchapimi shitashca” nishpami cantarca.

²²Moisesca israelcunata Puca Cuchamanta pushashpa rishpaca, Shur nishca shitashca pambatami quimsa punllacunata ima yacuta mana japishpa rircallacuna.

²³Maraman chayashpaca, Marapi caj yacucunaca jayaj cashcamanta mana ubyai tucurcacunachu. Chaimi Mara nishpa shutichircacuna.

²⁴Chaipimi israelcunaca Moisestaca: “¿Imatataj ubyashunri?” nishpa juchachishpa rimai callarircacuna.

²⁵Mandaj Diosta caparishpa Moisés mañajpi, Mandaj Dios shuj yurata ricuchijpi, chai yurata yacupi urmachijpimi chai yacuca mishquijlla tucurca. Chashnami Mandaj Diosca paicuna ima shina cashcata ricurca. Chaitataj pajtachichun nishcatapish, mandashcatapishmi curca.

²⁶Chaipica cashnami nirca: “Cancunaca Mandaj Dios ima nishcata alli uyashpa, paipaj ñaupajpi ima pandata mana rurashpa, pai mandashcacunata alli uyashpa, chaitataj pajtachichun nishcacunata pajtachijpica, egipciocunaman cachashca ungüicunataca shujllatapish cancunapaj jahuaman mana apamushachu. Ñucaca Mandaj Diosmi cani. Cancunata alliyachijmi cani” nircami.

²⁷Chai q'uipaca chunga ishqui pugyucunamanta achca yacucuna llujshicun, canchis chunga palmeracuna tiyan Elim pambaman chayashpami, chai yacu c'uchullapi carpa huasicunata shayachishpa tiyarircacuna.