Read Chimborazo Highland Quichua ÉXODO 18 Bible Online

ÉXODO 18 - Chimborazo Highland Quichua bible

ÉXODO 18

¹Madián llajta cura Moisespaj suegro Jetroca, Taita Dios Moiseshuan imallata rurashcata, israelcunatapish imallata rurashcata, Egiptomanta israelcunata Mandaj Dios ima shina llujshichimushcatami uyarca.

²Moisespaj suegro Jetroca Moisés paipaj huarmi Seforata paipajman tigrachishpa cachajpica,

³paipaj ishqui churicunandijtami chasquirca. Moisespaj shuj churica Gersón shutimi carca. Paitaca: “Cai ajeno llajtapica catishpa causajllami cani” nishpami chashna shutichirca.

⁴Caishuj churica Eliezer shutimi carca. Paitaca: “Faraonpaj espadamantaca ñuca yayapaj Taita Diosmi quishpichishpa ayudahuarca” nishpami, chashna shutichirca.

⁵Moisespaj suegro Jetroca Moisespaj ishqui churicunandij Moisespaj huarmindij pushashpami, Moisés maipi carpa huasita shayachishpa tiyacun Taita Diospaj urcu c'uchupi caj shitashca pambaman chayashpaca,

⁶Moisestaca: — Ñuca, cambaj suegro Jetromi cambaj huarmitapish, cambaj ishqui churicunatapish pushashpa cambajman shamuni — nirca.

⁷Moisés paipaj suegrota tupanaman llujshishpaca, paipaj ñaupajpi cumurishpa muchashpami, caishuj chaishuj allillachu cangui ninacushpaca, carpa huasiman yaicurcacuna.

⁸Moisesca paipaj suegromanca, Mandaj Diosca israelcunata c'uyashcamantaca faraontapish, egipciocunatapish imallata rurashcata, israelcunahuan ñanpi cashpa imalla llaquicunata apashcata Mandaj Dios ima shinalla paicunata quishpichishcatapishmi parlarca.

⁹Jetroca Mandaj Dios israelcunata egipciocunapaj maquimanta llujshichishpa israelcunapaj allita rurashcamantaca jatuntami cushicurca.

¹⁰Chaimi Jetroca: — Israelcunata egipciocunapaj maquimanta, faraonpaj maquimanta cacharichij Mandaj Diosca alli nishca cachun. Egipciocunapaj maquimantaca israelcunataca paimari cacharichishca.

¹¹Paicuna imahuanmi jatun tucushpa llaquichicurca chaillahuantajmi paicunatapish llaquichishpa israelcunata cacharichirca. Cunantajca Mandaj Diosca tucui dioscunamanta yalli tucuita rurai tucuj, jatun cashcatami yachani — nircami.

¹²Moisespaj suegro Jetroca Diosman cushpa tucuita rupachinata, shujtaj sacrificiocunatapishmi Taita Diosman curca. Aaronpish, israelcunata cunaj yuyajcunapish Moisespaj suegrohuan Taita Diospaj ñaupajpi micunamanmi rircacuna.

¹³Chai cayandij punllaca, Moisesca israelcunapaj llaquicunata allichingapajmi tiyarirca. Israelcunaca tutamantamanta chishicamami, Moisespaj ñaupajpi achcacuna shayacurcallacuna.

¹⁴Israelcunahuan Moisés tucui ima shinalla ruracujta ricushpami Moisespaj suegroca: — Cai tucui ruranataca ¿ima nishpataj canlla ruracungui? Quiquinlla tiyarishpa cai tucuita ruracujpica tucuicunamari tutamantamanta chishicama cambaj ñaupajpi shayacunllacuna — nirca.

¹⁵Shina nijpi Moisesca paipaj suegrotaca: — Paicunaca Taita Diosta tapungapajmari ñucapajman shamuncuna.

¹⁶Maijancunaca p'iñanacushca cashpami, ñucapajman shamuncuna. Paicunataca caishujmanpish, chaishujmanpish ima shina cashcata ricuchishpami, Taita Dios ima shina causachun nishcacunatapish, mandashcacunatapish ricuchishpa huillani — nirca.

¹⁷Shina nijpi Moisespaj suegro Jetroca: — Can ruracushca shinaca mana allichu.

¹⁸Canpish, canhuan caipi caj gentecunapish shaicunguichijmi. Cai ruranacunaca cambajca yallitaj sinchimari. Canllaca mana rurai tucunguichu.

¹⁹Ñuca yuyaita cushcacunata cunanca uyai. Taita Diosca canhuanmi canga. Canmari tucui israelcunapaj randi Taita Diospaj ñaupajpi shayarishpa tucui paicunapaj llaquicunata Taita Diosman huillana cangui.

²⁰Paicunamanca ima shina causachun mandashcata yachachi. Paicuna mailla ñanta purina ñantapish, imallata rurana cashcatapish ricuchi.

²¹Chashna yachachishpaca tucui israelcunapurallamantataj mandai tucuipajcunata, Taita Diosta manchajcunata, imatapish cashcata rurajcunata, quiquinpajlla charij canata mana munajcunata agllashpa, shujcunataca huaranga runacunata, shujcunataca patsaj runacunata, shujcunataca pichca chunga runacunata, shujcunataca chunga runacunata mandajcuna cachun churai.

²²Israelcuna ima shinalla cashcataca paicunami punllanta paicunapaj llaquicunata ricuchinga. Yallitaj llaquicunallata canmanca huillaj shamuchun. Uchillalla llaquicunataca paicunallataj ima shina cashcata ricuchichun. Ima shinalla apanata paicuna chashna ayudajpimi, cambaj sinchi trabajomantaca samaringui.

²³Ñuca nishcata can rurajpi Taita Dios allimi nijpica, chaita rurailla. Chashna rurashpami, ashtahuan ñaupajman apai tucungui. Israelcunapish cushicushpami paicunapaj huasicunaman ringacuna — nircami.

²⁴Moisesca paipaj suegro yuyaita cushcata cazushpami, tucuita chashnataj rurarca.

²⁵Moisesca israelcunapurapi mandai tucuipaj cajcunata agllashpami, huaranga runacunata, patsaj runacunata, pichca chunga runacunata, chunga runacunata mandajcuna cachun churarca.

²⁶Paicunami israelcuna llaquicunata charijpica maijanpajlla ima shinalla cashcata ricuchijcuna carca. Uchilla llaquicunataca paicunallatajmi ima shina cashcata ricuchijcuna carca. Sinchi llaquicunahuan cajllapimi Moisespajman pushamujcuna carca.

²⁷Chai q'uipaca Moiseshuan paipaj suegrohuan minchacama ninacushpaca, Jetroca paipaj llajtaman rircallami.