Read Chimborazo Highland Quichua ÉXODO 19 Bible Online

ÉXODO 19 - Chimborazo Highland Quichua bible

ÉXODO 19

¹Israelcunaca Egiptomanta llujshishcamanta quimsa quilla callari punllami Sinaí shuti shitashca urcuman chayarcacuna.

²Refidim nishca pambamanta rishpa, chai Sinaí shitashca urcu chaquiman chayashpaca, Sinaí urcu ch'imbapurallapimi carpa huasicunata shayachishpa israelcunaca tiyarircacuna.

³Moisés Taita Dioshuan tupangapaj Sinaí urcuman huichiyajpica, Mandaj Diosca chai urcumanta cayashpami: — Jacobpaj huahua huahuacunaman cashna ni. Israelcunamanca caita huillai:

⁴Egipciocunata ñuca imallata rurashcataca cancunallataj ricurcanguichijmi. Cancunataca águila alas jahuapi apamuj shinami ñucapajmanca apamurcani.

⁵Ñuca imalla nishcata uyashpa ñucahuan ari ninacushcata pajtachishpaca, tucui cai pachapi causajcunamanta yalli sumaj huaquichishcacunami canguichij. Tucui cai pachaca ñucapajmi.

⁶Cancunaca ñuca mandana llajtapi causana curacunapish, jucha illaj runacunapishmi canguichij ninmi nishpa, cai tucui shimicunata israelcunaman huillangui — nircami.

⁷Moisés chaimanta tigrashpaca israelcunata cunaj yuyajcunata cayashpami, Mandaj Dios tucui imalla mandashcata paicunapaj ñaupajpi huillarca.

⁸Tucui israelcunami: — Mandaj Dios tucui imalla nishcataca rurashunllami — nishpa, shuj shinalla cutichircacuna. Tucui israelcuna imalla nishcata Moisés Mandaj Diosman huillajpimi,

⁹Mandaj Diosca Moisestaca: — Israelcuna ñuca canhuan rimacujta uyashpa can huillajpi crichunca ñucaca amsa p'uyupimi cambajmanca shamugrini. Chaipimi cambaj tucui causaipi can mana nij tucujlla cashcata cringacuna — nijpimi, tucui israelcuna imalla nishcata Moisesca Mandaj Diosman huillarca.

¹⁰Mandaj Diosca Moisestaca: — Israelcunapajman ri, paicunataca ñucapajlla cachun cunanpish cayapish chuyayachigri. Paicunapaj churanacunatapish tajshashpa,

¹¹quimsa punllapajca allichirishcacuna cachun ni. Quimsa punllapica Mandaj Diosca tucui israelcuna ricucujpimi, Sinaí urcu jahuaman uriyamunga.

¹²Cai urcuman paicuna ama huichiyachunca, urcu muyundijta maicamalla paicuna c'uchuyana cashcata ricuchishpa cashna ni: Cai urcumanca ama huichiyanguichijchu. Maicama c'uchuyai tucushcata ricuchishcamanpish ama c'uchuyanguichijchu. Maijanpish cai urcuman c'uchuyajca huañungatajmi ningui.

¹³Maijan runa cashpa, animal cashpa urcuman huichiyajpica ama maquihuan huañuchichuncuna. Ashtahuanpish rumicunahuan shitashpa, mana cashpaca puntajlla caspita shitashpalla huañuchichuncuna. Urcuman c'uchuyajtaca runa cachunpish, animal cachunpish huañuchishcataj cachun. Cai urcumanca cornetacunapi sinchita tocashca uyarijllapi huichiyachuncuna — nircami.

¹⁴Moisesca israelcunapajman urcumanta uriyamushpaca, paicunatami chuyayachirca. Paicunaca paicunapaj churanacunatami tajsharca.

¹⁵Moisesca israelcunataca: — Caimanta quimsa punllapajca allichirishca canguichij. Huarmicunapipish ama chayaringuichijchu — nishpami mandarca.

¹⁶Quimsa punllapaj pacarimujpica culun nishpa, achij nishpa amsa p'uyu chai urcuta tapajpica, cornetapi sinchita tocashcami uyarirca. Chaita uyashpaca carpa huasicunapi caj tucui israelcunami chujchushpa mancharircacuna.

¹⁷Taita Diosta tupanaman ringapaj Moisés israelcunata carpa huasicunamanta llujshichishpa pushajpimi, paicunaca urcu chaquillapi shayarircacuna.

¹⁸Mandaj Dios chai urcu jahuaman nina chaupipi uriyamujpimi tucui chai Sinaí urcu cushnirca. Hornomanta cushni llujshicuj shinami cushni llujshirca. Tucui chai urcuca yallitajmi chujchurca.

¹⁹Bocinapi tocashcapish ashtahuan ashtahuan sinchitami uyarishpa catirca. Moisés Taita Dioshuan rimajpica, Taita Diosca culun nicuj rimaihuanmi cutichirca.

²⁰Sinaí urcu jahuaman Mandaj Dios uriyamushpaca, chai urcu puntamantami Mandaj Diosca Moisesta cayajpi paica chai urcu puntaman huichiyarca.

²¹Chaipimi Mandaj Diosca Moisestaca: — Caimanta uriyashpa, israelcunataca cashna ni: Mandaj Diosta ricungapaj cai ñuca ricuchishcata ñataj pasanguichijman. Chaita pasajcunaca achcacunami huañunga.

²²Mandaj Diospajman c'uchuyanapaj caj curacunapish chuyayachun. Paicunatapish Mandaj Dios ama llaquichichun nishpa mandagri — nircami.

²³Chaimi Moisesca Mandaj Diostaca: — Sinaí urcumanca maicamalla c'uchuyana cashcata churashpa, cai urcutaca cambajllata rurachun nishcata israelcunaca yachashcamanta ña mana cai Sinaí urcumanca huichiyamui tucungacunachu — nirca.

²⁴Shina nijpipish, Mandaj Diosca: — Uriyashpa Aaronta pushashpa tigramugri. Ashtahuanpish curacuna, tucui israelcunaca: Mandaj Dios maipi cashcaman huichiyangapaj, maicamalla c'uchuyana cashcataca ama pasashpa huichiyachun. Paicunatapish Mandaj Dios ama llaquichichun ninmi nigri — nircami.

²⁵Moisés uriyashpaca, Mandaj Dios imalla nishcatami israelcunaman huillarca.