Read Chimborazo Highland Quichua ÉXODO 21 Bible Online

ÉXODO 21 - Chimborazo Highland Quichua bible

ÉXODO 21

¹Israelcunaman cai mandashcacunata huillai:

²Cancunapajta ruraj cachun hebreocunapurallatataj randijpica, sujta huatacunallata cancunapajta rurachun. Canchis huatapica imata mana cushpa llujshichunlla.

³Pailla yaicushca cashpaca, pailla llujshichun. Huarmindij yaicushca cashpaca, huarmindij llujshichun.

⁴Paipaj amollataj huarmita cushca cajpi, chai huarmica churicunata, mana cashpaca ushushicunata charijpica, chai huarmipish chai huahuacunapish chai amopajmi canga. Paica pailla llujshichun.

⁵Ashtahuanpish amopajta rurajca: Ñuca amotapish, ñuca huarmitapish, ñuca huahuacunatapish c'uyashcamanta mana llujshisha ninichu nijpica,

⁶paipaj amoca juezcunapaj ñaupajman pushashpa pungupi cashpa, postepi cashpa paipaj rinrinta churashpa alishñahuan jutcuchun. Chashnaca paipaj tucui causaipimi paipaj amopajta ruraj canga.

⁷Maijanpish paipaj ushushita shujtajpajta ruraj cachun c'atungachari. Paica c'aricuna shinaca mana llujshi tucungachu.

⁸Chai amo mana munashcamanta paipaj huarmi cachun mana japishpaca, pagashpa llujshichichun saquichun. Mana Israel caj llujshichichunca ama saquichun.

⁹Ashtahuanpish paipaj churipaj huarmi cachun cushpaca, quiquin ushushipaj imallata rurana cashca shinallataj rurachun.

¹⁰Chai amoca paipaj huarmi cachun shujtaj huarmita japishpapish, ñaupa huarmimanca micunatapish, churanatapish ima shina caracushca, churachicushca shinallataj cuchun. Chayarinatapish ñaupaman shinallataj chayarichun.

¹¹Cai quimsa mandashcacunamanta maijantapish mana pajtachijpica, chai huarmica imata mana pagashpa llujshichunlla.

¹²Maijanpish shujtajta macashpa huañuchijca, paipish huañungami.

¹³Maijanpish mana huañuchina yuyaihuan cajpish, Dios paipaj maquipi churajpi huañuchingachari. Pai maipi miticugrinataca ñucami ricuchisha.

¹⁴Maijanca shujtajta p'iñashpa huañuchina yuyaihuantaj cashpa huañuchijpica, ñuca altar c'uchupi miticujpipish paitapish huañuchichun ñuca altar c'uchumanta anchuchichun.

¹⁵Maijanpish paipaj yayata cashpa, paipaj mamata cashpa huañuchijca paipish huañungami.

¹⁶Maijanpish genteta shuhuashpa c'atushca cajpi, paipaj maquillapitaj charicushcata japishpapish paitaca huañuchichun.

¹⁷Maijanpish paipaj yayata cashpa, paipaj mamata cashpa llaqui tucushca canman nijca huañunami can.

¹⁸Maijancuna shujtajhuan p'iñanacushpa rumihuan cashpa mana cashpaca huajtashpa chugrichijpi mana huañushpa camapi siricushpa,

¹⁹taunallahuan canllaman ña puricujpica, chai macaj runataca mana huañuchinachu. Ashtahuanpish ungushpa jambirishcamanta chai punllacunapi imata mana rurashcamanta tucuita pagachun.

²⁰Maijanpish paipajta ruraj c'arita cashpa, huarmita cashpa caspihuan macacujpi paipaj maquipi huañujpica paitaca llaquichishca cachun.

²¹Macashcamanta punlla q'uipa, mana cashpaca ishqui punlla q'uipa huañujpica paipaj randishca cashcamanta paitaca ama llaquichishca cachun.

²²Maijancuna p'iñanacushpa macanacucushpa, shuj chichu huarmitaraj macangachari. Chai huarmi mana huañushpapish shullujpica, chai huarmipaj cusa mashnata juchachishcata juezcuna ricushpa mashnata cuchun nijpica chaitataj cuchun.

²³Chai huarmi huañujpica, paitapish huañuchichun.

²⁴Ñahuita llujshichijtaca paitapish ñahuita llujshichichun. Quiruta llujshichijtaca paitapish quiruta llujshichichun. Maquita p'aquijtaca paitapish maquita p'aquichun. Chaquita p'aquijtaca paitapish chaquita p'aquichun.

²⁵Rupachijtaca paitapish rupachichun. Chugrichijtaca paitapish chugrichichun. Huajtajtaca paitapish huajtachun.

²⁶Maijanpish paipajta ruraj c'arita cashpa, huarmita cashpapish ñahuita surcujca chai ñahuimantaca llujshishpa richun saquichunlla.

²⁷Maijanpish paipajta ruraj c'aripaj, paipajta ruraj huarmipaj quiruta llujshichishpaca, chai quirumantaca llujshishpa richun saquichunlla.

²⁸C'arita cashpa, huarmita cashpa shuj huagra sagmajpi huañungachari. Chai huagrataca rumihuan shitashpa huañuchishpa, aichataca ama micuchun. Ashtahuanpish huagrayujca juchachina illajllami canga.

²⁹Maijan runa paipaj huagra sagmajlla cashcata yachashpa ñuca huagraca sagmajllami nishpa huillashca cashpapish huagrata mana alli huatajpi chai huagraca c'arita cashpa, huarmita cashpa sagmashpa huañuchijpica chai huagratapish, huagrayujtapish rumicunahuan shitashpa huañuchichun.

³⁰Huagrayuj runataca paipaj huagra huañuchishca runamantaca paita ama huañuchingapaj cullquita cuchun ningachari. Huagrayujca pai mashna valishcamanta mañajpica chaitataj cuchunlla.

³¹Maijanpaj churita cashpa, ushushita cashpa huagra tsagmashpa huañuchijpica, cai mandashcacunapi nishca shinallataj chai huagrayujtaca rurachuncuna.

³²Shujtajpajta ruraj c'arita cashpa, huarmita cashpapish huagra sagmashpa huañuchijpica chai huagrataca rumicunahuan shitashpa huañuchichun. Huagrayujca shujtajpajta rurajmantaca quimsa chunga siclo cullquita pagachun.

³³Maijanpish paipaj pugyuta pascashcata saquishpa mana cashpaca yacuta tandangapaj allashcata mana tapajpi burro cashpa huagra cashpa chaipi huashicujpica,

³⁴chai yacu tandarinapaj allajca chai animalmantaca mashna valishcata pagachun. Huañushca animalhuanca pai saquirichun.

³⁵Maijanpaj huagrapish shujtajpaj huagrata macashpa huañuchijpica, huañuchij huagrata c'atushpa, cullquitaca ishquindijtaj chaupinacuchun. Huañushca huagra aichatapish chashnallataj chaupinacuchun.

³⁶Maijanpaj huagra macajlla cashcata shujtajcuna yachangachari. Ashtahuanpish huagrayuj mana alli huatajpi shujtajpaj huagrata huañuchijpica, huañushca huagrayujmanca huagrallatataj pagachun. Huañushca huagrataca pai japichun.