Read Chimborazo Highland Quichua ÉXODO 22 Bible Online

ÉXODO 22 - Chimborazo Highland Quichua bible

ÉXODO 22

¹Maijanpish shuj huagrata cashpa, shuj ovejata cashpa, shuhuashpa huañuchishca cajpi, mana cashpaca c'atushca cajpica, huagramantaca pichca huagrata pagachun. Ovejamantaca chuscu ovejata pagachun.

²Shuj shuhuata huasiman yaicucujta japishpa huañuchijpica, chai huañuchijca mana juchachishca cangachu.

³Ña punllayashcapi japishpa huañuchishca cajpica, huañuchijpaj jahuami canga. Ashtahuanpish shuhuacushpa japi tucujpica, shuhuashcamanta tucuita pagachichun. Paganapaj mana charijpica paillatataj c'atushpa pagachun.

⁴Chai shuhuashcaca huagra cajpi, burro cajpi, oveja cajpi paipaj maquipi causajta japijpica chai shuhuajca tucui chaicunamantaca shujtaj chai valillahuantaj cuchun.

⁵Maijanpish paipaj animalcunata paipaj michina q'uihuapi cashpa, uva chagrapi cashpapish michicushpa saquijpi, chai animalcunaca shujtajpaj michina q'uihuaman shujtajpaj uva chagraman yaicushpa micungachari. Chashna rurajpica animalyujca uva chagrata cashpa, michina q'uihuata cashpapish ashtahuan allita pagachun.

⁶Cashacunata rupachingapaj ninata maijan japichijpica, cozichashpa montonashca trigondij, cozichanalla trigondij, mana cashpaca tarpushca chagrandij rupajpica ninata japichij runa tucui imalla rupashcamanta pagachun.

⁷Maijanpish shujtaj runaman cullquita cashpa, ima shujtaj achca valijcunata cashpapish huaquichichun mingajpica, chai runapaj huasimanta shuhuajpica, chai shuhuajta japijpica, chai shuhuajca shujtaj chai valillahuantaj tigrachichun.

⁸Shuhua mana japi tucujpica, paiman mingashcataca chai huasiyuj runallataj shuhuashca cajta mana pai shuhuashca cajta juezcuna ricuchun juezcunapajman apachun.

⁹Tucui laya umasha nijcunataca: Huagrata cashpa, burrota cashpa, ovejata cashpa, churanata cashpa, ima shujtaj chingarishcacunata cashpapish maijanca caica ñucapajmi ningachari. Caishujpish caica ñucapajmi ningachari. Chashna cajpica ishquindijtataj juezcunapajman apajpi, ima shina cashcata juezcuna alli ricushpa, maijan umacushcata ricuchijpica, chai umacujca dueñomanca shujtaj chai valillahuantaj pagachun.

¹⁰Maijanpish paipaj burrota cashpa, huagrata cashpa, ovejata cashpa, ima shujtaj animalta cashpapish shujtajman cuidacuchun saquijpi, pi mana ricucujpi chai animalca huañungachari, mana cashpaca macashca cangachari, mana cashpaca shuhuashca cangachari,

¹¹chaipica chai cuidacuj runaca, mingaj runamanca: “Mandaj Diospaj ñaupajpimi, ñucaca imata manataj rurarcanichu” nishpa huillanga. Chai animalyujca pai nishcata crichun. Cuidacujca ama pagachun.

¹²Minguitucuj runa ricucujllapitaj shuhuashca cajpica, chai animalyujmanca minguitucuj pagachun.

¹³Chai animaltaca sacha animal mirga mirgata rurashpa micushca cajpi paiman ama pagangapajca chai sacha animal mirga mirgata rurashcata apamushpa ricuchichun.

¹⁴Maijanpaj animalta mañashpa apajpi, chai animalca animalyuj mana chaipi cajpi macashca, mana cashpaca huañushca cajpica, chai mañashpa apajca mañachijman pagachun.

¹⁵Animalyuj runa chaipi cajllapitaj imapish tucujpica, imata ama pagachun. Alquilachishca cashpaca, alquilachishcamanta cullquita japichun.

¹⁶Maijanpish manaraj cazarana tucushca manaraj chayarinacushca solterata inquitashpa chayarishpaca, cazarangapaj mashnata cuna cashcallatataj paipaj yayaman cushpa chai solterataca paipaj huarmi cachun japichuntaj.

¹⁷Solterapaj yaya paipaj huarmi cachun mana cusha nijpica, c'arihuan manaraj chayarinacushca huarmimanta mashnata cuna cashcatataj pagachun.

¹⁸Bruja huarmitaca ama causachun saquinguichij.

¹⁹Animalhuan maijanpish chayarijtaca huañuchinatajmi can.

²⁰Mandaj Diosllaman sacrificiota cunapaj randi shujtaj dioscunaman sacrificiota cujcunaca huañunatajmi can.

²¹Shujtaj llajtamanta cajcunatapish ama umanguichijchu, ama llaquichinguichijchu. Cancunapish Egipto llajtapi cashpaca, caru llajtamanta cajcunallatajmi carcanguichij.

²²Viudacunatapish, yaya mama illajlla huahuacunatapish pita ama llaquichinguichijchu.

²³Paicunata can llaquichijpi paicuna ñucata caparishpa mañajpica, ñucaca uyashpa,

²⁴nina sindirij shina p'iñarishpami cancunata espadahuan huañuchijpi, cancunapaj huarmicunapish viudacuna saquiringa, cancunapaj huahuacunapish yaya mama illajlla saquiringacuna.

²⁵Ñuca agllashca cancunaca cancunahuan caj imata mana charijcunaman cullquita mañachishpaca, cullquita mañachijcuna rurashca shinaca ama ruranguichij. Huahua cullquitapish ama cobranguichij.

²⁶Cullquita mañachishcamanta paipaj churanata japishca cashpaca, chishicunaca inti manaraj huashicujpi chai churanataca tigrachinguichij.

²⁷Paica shujlla churanata charishcamanta chaillahuan paipaj cuerpota taparij cashcamantaca ¿imahuantaj dormingari? Chashna cashpa pai ñucata caparishpa mañajpi ñucaca llaquij cashcamanta paita uyashami.

²⁸Juezcunataca ama p'iñashpa rimanguichij. Cancunapaj llajtata mandajtaca ama imapish tucushca canman ninguichij.

²⁹Cancunapaj chagrata punta cozichashcacunata, punta capishca vinotapish ama uniyashpa apamunguichij. Cancunapaj punta churitapish ñucaman cunguichij.

³⁰Cancunapaj huagracuna, cancunapaj ovejacuna punta huachashca c'ari animalcunataca chashnallataj ruranguichij. Paicunaca canchis punllacunallata mamahuan cachun. Pusaj punllapica ñucaman cunguichijlla.

³¹Cancunaca ñucapajlla ch'icanchishcacunami canguichij. Cancunaca michina pambapi sacha animalcuna mirga mirgata rurashca aichataca ama micunguichijchu, chaitaca allcucunaman shitanguichij.