Read Chimborazo Highland Quichua ÉXODO 25 Bible Online

ÉXODO 25 - Chimborazo Highland Quichua bible

ÉXODO 25

¹Mandaj Diosca Moisestaca:

²“Israelcunataca: Ñucaman cujcunapajta tandachichij. Ñucaman cunata munashcamanta tucui shunguhuan cujcunapajta tandaichij.

³Paicuna cushcacunataca caicunatami japina canguichij: Curita, cullquita, cobreta,

⁴azul millmata, morado millmata, amsa puca millmata, ashtahuan alli linota, chivo millmata,

⁵pucajllata tinishca carnero carata, tejoncunapaj caracunata, acacia caspita,

⁶lamparapi churashpa rupachina aceiteta, imata Diospajlla ch'icanyachina aceiteta ruranata, mishquijllata ashnacuj inciensota ruranapaj chagruna jambicunatapish japinguichij.

⁷Efodpi, pectoralpi churanapaj ónice rumicunata, shujtaj sumaj rumicunata japinguichij.

⁸Tucui chaicunahuan ñucapajlla shuj carpa huasita ruraichij. Chaipimi ñucaca paicunapaj chaupipi causasha.

⁹Diospaj carpa huasitapish, chaipi tucui imalla tiyajcunatapish ima shinalla ruranata ñuca ricuchishca shinataj rurangui.

¹⁰Acacia caspimanta shuj arcata rurangui. Chai arcataca sunimanca shuj metro chunga ishqui chaupi centimetrota, anchomanca sujta chunga canchis chaupi centimetrota, altomanca sujta chunga canchis chaupi centimetrota rurangui.

¹¹Chai arcataca ucutapish jahuatapish alli curihuan llihuingui. Muyundij filocunataca curi ribeteta churangui.

¹²Chai arcapajca chuscu curi argollacunata rurashpa, chuscu esquinacunapi churangui. Ishquitaca shuj ladoman, ishquitaca caishuj ladoman churangui.

¹³Acacia suni caspicunatapish rurashpa chai jahuataca curihuan llihuingui.

¹⁴Chai caspicunataca arcata huandushpa apanapaj churashca argollacunapi churangui.

¹⁵Chai caspicunaca arcapi churashca argollacunallapitaj saquirichun. Chaimantaca mana anchuchishcachu canga.

¹⁶Ñucahuan ari ninacushcata ricuchij quillcata canman cushcataca chai arcapi huaquichingui.

¹⁷Arcapaj propiciatoriotaca sunimanca shuj metro chunga ishqui chaupi centímetrota, anchomanca sujta chunga canchis chaupi centimetrota alli curita rurangui.

¹⁸Martillohuan tacashpa curi ishqui querubincunatapish rurangui. Chaitaca arcapaj propiciatorio ishqui ladoman churangui.

¹⁹Chai ishqui querubincunataca, arcapaj propiciatoriollapitaj tandachishpa rurangui. Shujtaca shuj lado filoman, caishujtaca caishuj lado filoman rurangui.

²⁰Chai querubincunaca arcapaj propiciatoriota urilla ricushpa cumulla ch'imbapura tiyacuj cachun. Paicunapaj alascunaca arcapaj propiciatoriota llandungapaj jahuata chutashca cachun.

²¹Chai propiciatoriotaca arcapaj jahuapi churangui. Arca ucupica ñucahuan ari ninacushcata ricuchij ñuca cushca mandashcata churangui.

²²Chai arcamanta canman ricurishpami, arcapaj propiciatorio jahuamanta canhuan rimasha. Israelcunata tucui ñuca imalla mandashcataca ñucahuan ari ninacushcata ricuchij quillcata huaquichina arca jahuapi caj ishqui querubincunapaj chaupimanta arcapaj propiciatorio jahuallamantatajmi canman huillasha” nircami.

²³Acacia caspihuan shuj mezatapish rurangui. Chaica sunimanca iscun chunga centímetro, anchomanca chuscu chunga pichca centímetro, altomanca sujta chunga canchis chaupi centímetro cachun.

²⁴Chai mezataca alli curihuan tucuita llihuingui. Chai muyundij filotaca curi ribeteta rurangui.

²⁵Chai muyundijtaca canchis chaupi centímetro ancho jarcata churangui. Chaitapish muyundijta curi ribeteta rurangui.

²⁶Curi chuscu argollacunata rurashpa, chaicunataca chai meza chaquipaj chuscu esquinapi churangui.

²⁷Chai argollacunataca meza filota jarcashca ucunijllapi churashca cachun. Chai argollacunaca huanduna caspicunata churachishpa, mezata apangapaj chashna churashca cachun.

²⁸Chai mezata huanduna caspicunatapish acacia caspimanta rurashpa, jahuataca curihuan llihuingui.

²⁹Platocunata, cucharacunata, trinchicunata, cuchillocunata, vasocunatapish ashtahuan alli curita rurangui. Tasacunaca yacu shinacunata tallinapajmi canga.

³⁰Chai mezapica ñuca ñaupajpi punllanta cana tanda ama illachun churarangui.

³¹Chai candelerotaca chaquiyujta, chai troncotapish copacunatajllayujta, manzanacunatajllayujta, sisacunatajllayujta ashtahuan alli curita martillohuan tacashpa rurangui.

³²Chaitaca sujta maquicunayujta rurangui. Chai maquicunaca quimsaca shuj ladoman, quimsaca caishuj ladoman llujshishca cachun.

³³Cada maquicunapi almendro sisatajlla quimsa copacunata, shuj manzanata, shuj sisatapish rurangui. Caishuj lado maquipajpish quimsa copacunata, shuj manzanata, chai puntapica almendro sisatajllata rurashca cachun. Sujta maquicunapitaj chashna rurashca cachun.

³⁴Tucuita aparij troncopipish almendro sisatajlla chuscu copacunata rurangui. Shuj manzanatajllatapish, shuj sisatajllatapish rurangui.

³⁵Chai troncomanta llujshij quimsa maquicunaca cada maqui puntapi shuj shuj manzanatajllatami charinga.

³⁶Candelero troncopish, chaimanta llujshij maquicunapish alli curita candelero troncopi shujllata rurashcami cana can. Candelero troncopi, chaimanta llujshij maquicunapica manzanatajllacunata martillohuan tacashpa rurashca cachun.

³⁷Canchis lamparacunata rurashpa, ñaupaj ladota achijyachichun candelero maquicuna jahuapi churangui.

³⁸Mecha rupashca ushpata anchuchinacunatapish, chai ushpata tandana platocunatapish alli curillamantataj rurangui.

³⁹Chaipi tucui imalla ruranacunataca shuj talento alli curihuan rurangui.

⁴⁰Ima shinalla ruranata Sinaí urcupi ñuca ricuchishca shinallataj tucuita rurangui.