Read Chimborazo Highland Quichua ÉXODO 3 Bible Online

ÉXODO 3 - Chimborazo Highland Quichua bible

ÉXODO 3

¹Moisesca Madián llajtapaj cura caj paipaj suegro Jetropaj ovejacunata michishpami chai llajtapi causarca. Moisesca shitashca pambata ovejacunata michinaman rishpaca, Horeb shuti Taita Diospaj urcucamami chayarca.

²Chaipica zarza yura chaupipi nina lunyacunpimi, Mandaj Diospaj ángel ricurirca. Chai zarza yurapi nina lunyashpa rupajpipish zarza yuraca mana ima tucujtami Moisesca ricurca.

³Chaimi Moisesca: “Nunca mana ricushcatamari ricuni. Ima nishpashi zarza yuraca mana rupan” nishpami ricunaman rirca.

⁴Moisés ricunaman c'uchuyacujpica Mandaj Diosca zarza yura chaupimantami: — ¡Moisés, Moisés! — nijpi paica: — Caipimi cani — nirca.

⁵Chaimi Taita Diosca: — Caimanca ama c'uchuyamuichu. Can shayacun cai allpaca ñucapajlla cashcamanta cambaj chaquimanta pargateta llujshichi — nirca.

⁶Taita Diosca cashnapishmi nirca: — Ñucaca cambaj yayapaj Dios, Abrahampaj, Isaacpaj, Jacobpaj Diosmi cani — nijpimi, Moisesca Taita Diosta ricunata manchashpa, paipaj ñahuita taparirca.

⁷Chai q'uipaca Mandaj Diosca: — Ñuca agllashcacuna Egipto llajtapi ima shina llaquita apacujtaca ñucatajmi ricuni. Paicunata llaquichijcuna llaquichicujpi paicuna caparishcataca uyanimi. Paicuna llaquita apacujtaca ñuca ñahuihuantajmi ricuni.

⁸Chaimi egipciocunapaj maquimanta cacharichingapaj uriyamurcani. Chai llajtamanta llujshichishpaca cananeocuna, heteocuna, amorreocuna, ferezeocuna, heveocuna, jebuseocuna causan lechepish, sacha chuspipaj mishquipish yacu llujshicuj shina tiyan shuj jatun sumaj llajtamanmi pushagrini.

⁹Israelcuna caparishpa mañashcaca ñuca ñaupajmanmi chayan. Egipciocuna ima shina jatunta llaquichijtaca ñuca ñahuihuantajmi ricuni.

¹⁰Cunanca faraonpajman utcashpa rilla. Ñucaca cantaca ñuca agllashca israelcunata chai llajtamanta llujshichichunmi mandani — nircami.

¹¹Chaimi Moisesca Taita Diostaca: — Faraonpajman rishpa, israelcunata Egiptomanta llujshichimungapajca ñucaca ¿pitaj caniyari? — nirca.

¹²Taita Diosca: — Ñucamari canhuan casha. Ñuca quiquintaj canhuan cashcata ricuchijca caimi canga: Egiptomanta israelcunata ña llujshichimushpaca, cai urcu jahuapimi Taita Diosta adoracunguichij — nircami.

¹³Shina nijpipish Moisesca Taita Diostaca: — Israelcunapajman ñuca chayashpaca: Cancunapaj ñaupa yayacunapaj Diosmi ñucataca cancunapajman cachan nijpi, paicunaca: Paipaj shutica ¿ima shutitagari? nijpica, ¿imatataj nishari? — nircami.

¹⁴Taita Diospish Moisestaca: — ÑUCACA ÑUCAMI CANI — nircami. Israelcunamanca: ÑUCAMI CANI nijmi cancunapajman cachan ningui — nircami.

¹⁵Taita Diosca Moisestaca cashnapishmi nirca: — Israelcunamanca: Cancunapaj ñaupa yayacunata Mandaj Taita Dios Abrahampaj, Isaacpaj, Jacobpaj Diosmi cancunapajman cachan ningui. Ñuca shutica, huiñaipaj chaillatajmi. Chai shutipimi, ñucataca huiñaita yuyaringacuna.

¹⁶Israelcunata cunaj yuyajcunata tandachishpa cashna nigri: Cancunapaj ñaupa yaya Abrahampaj, Isaacpaj, Jacobpaj Mandaj Diosmi ñucaman ricurishpa cashna nin: Cancunata Egiptopi ima shinalla llaquichicujta ricushpami, cancunata ricuj shamurcani.

¹⁷Ñucami cancunataca Egiptopi llaquita apacunmanta llujshichishpa, cananeocuna, heteocuna, amorreocuna, ferezeocuna, heveocuna, jebuseocuna causacun lechepish, sacha chuspipaj mishquipish yacu llujshicuj shina tiyan llajtaman pushasha ninmi ningui.

¹⁸Paicunaca can nishcatami uyanga. Egiptota jatun mandajpajmanca canpish cunaj yuyajcunapish rishpaca: Hebreocunapaj Mandaj Diosmi ñucanchijhuan tuparca. Chaimantami caimantaca quimsa punllata shitashca pambata rishpa, ñucanchijta Mandaj Diosman animalcunata cushpa huañuchigrishun ninchij ninguichij nircami.

¹⁹Egiptota jatun mandaj cancuna richun mana saquina cashcataca yachanimi. Ashtahuanpish sinchi maquihuan llaquichijpimi saquinga.

²⁰Ashtahuanpish Egiptopi causajcunataca, ñuca maquita chutashpa chai llajtapi mancharinacunata rurashpa paicunata llaquichijpimi, israelcunataca richun saquinga.

²¹Cancuna chai llajtamanta llujshicushpa, ama chushaj maquilla llujshichunca Egiptopi causajcunamanca, cancunata llaquina yuyaitami cusha.

²²Tucui huarmicunami egipcia huarmicunataca cancunapaj c'uchullapi causajcunatapish, cancunallahuantaj causajcunatapish, cullquimanta, curimanta rurashca sumaj charinacunata, churanacunatapish mañana canguichij. Chaicunatami cancunapaj churicunamanpish, ushushicunamanpish churachinguichij. Chashnami egipciocuna imalla charishcacunata quichushpa ringuichij ningui — nircami.