Read Chimborazo Highland Quichua ÉXODO 32 Bible Online

ÉXODO 32 - Chimborazo Highland Quichua bible

ÉXODO 32

¹Moisés chai urcumanta mana utca uriyamujpimi, israelcunaca tandanacushpa Aaronpajman c'uchuyashpaca: — Egiptomanta ñucanchijta llujshichimuj Moisestaca ima tucushcataca mana yachanchijchu. Jatari, ñucanchijta ñaupashpa richun dioscunata rurai — nircacuna.

²Chaimi Aaronca: — Cancunapaj huarmicunapaj, cancunapaj churicunapaj, cancunapaj ushushicunapaj rinrincunapi caj curi zarcillocunata llujshichishpa apamuichij — nirca.

³Israelcunaca tucuicunami paicunapaj curi zarcillocunata paicunapaj rinrincunamanta llujshichishpa Aaronpajman apamurcacuna.

⁴Chaicunata paicunapaj maquimanta chasquishpa yacuyachishpa shuj curi bizita rurajpimi paicunaca: — Israelcuna, cancunapaj dioscunaca caicunamari. Paicunami cancunataca Egiptomanta llujshichimurca — nircacuna.

⁵Paicuna caparinacujta ricushpami Aaronca, curi bizipaj ñaupajpi shuj altarta rurashpaca: — Cayaca Mandaj Diospaj fiestami canga — nishpa caparirca.

⁶Cayandij tutamanta utca jatarishpami tucuita cushpa rupachinatapish, alli cangapaj cuna cashcatapish curcacuna. Tucuicunami micungapaj ubyangapaj tiyarircacuna. Chai q'uipaca cushicungapajmi jatarircacuna.

⁷Mandaj Diosca Moisestaca: — Egiptomanta can llujshichimushca gentecunaca millaitami ruracuncuna. Paicunapajman uriyashpa rilla.

⁸Ñuca mandashca ñanmantaca utcami anchurishcacuna. Shuj curi bizita rurashpamari chaita adorashpa paiman sacrifiocunata cushpa: Israelcuna cancunataca cai dioscunamari Egiptomantaca llujshichimurca nicuncuna — nircami.

⁹Mandaj Diosca Moisestaca cashnapishmi nirca: — Ñucaca israelcunataca yallitaj rumi shungu cajtami ricuni.

¹⁰Cunantajca ñuca paicunata llaquichishpa tucuchingapaj saqui. Canmantami shuj jatun llajtata rurasha — nircami.

¹¹Chaimi Moisesca paita Mandaj Taita Diospaj ñaupajpi: — Mandaj Dioslla, cambaj tucuita rurai tucuj maquihuan, cambaj poderhuan Egiptomanta llujshichimushca israelcunahuanca ama chashna jatunta p'iñarihuaichu — nishpa mañarca.

¹²Chaita yachashpaca, Egipto llajtapi causajcunaca: Israelcunata llaquichingapajllamari llujshichishca. Urcucunapi huañuchingapajllamari llujshichishca. Cai pachamanta chingachingapajllamari llujshichishca ningacunami. Nina sindirij shina p'iñarishpa paicunata llaquichisha nicushcataca saquihuailla.

¹³Cambajta ruraj Abrahamman, Isaacman, Israelmanca: Ñucami cambaj huahua huahuacunataca jahua pacha luzerocunata shina mirachisha. Paicunamanmi cancunaman cusha nishca cai allpataca cusha. Paicunapaj huiñaipaj cachunmi cusha nishpa quiquintaj nishcataca yuyaripayari — nirca.

¹⁴Chaimi Mandaj Diosca, pai agllashca israelcunata llaquichisha nishca cashpapish mana llaquichina tucurca.

¹⁵Moisesca chai urcumantaca, Dios ima shina cashcata ricuchishpa causanata mandashcata ishqui tablajlla rumicunapi quillcashcata paipaj maquipi apashcami uriyamurca. Chai rumicunapica cada tablajlla rumicunapi ishquindij ladoman quillcashcami carca.

¹⁶Chai tablajlla rumicunaca Taita Dios rurashcami carca. Chaicunapi quillcashcapish Taita Diostaj quillcashcami carca.

¹⁷Israelcuna yallitaj caparinacucujta uyashpami Josueca Moisestaca: — Carpa huasicunapica macanacuipi caparinatamari caparicuncuna — nirca.

¹⁸Shina nijpi Moisesca: — Macanacuipi mishashca caparita, macanacuipi mishajpi llaquilla cashpa caparitapish mana uyanichu. Ashtahuanpish ñucaca cantacujcunatami uyani — nirca.

¹⁹Carpa huasicunaman Moisés chayashpaca, bizi diostapish, gentecuna bailacujtapish ricushpami, Moisesca yallitaj p'iñarishpa pai charicushca ishqui tablajlla rumicunata pambaman shitajpi chai rumicunaca urcu chaquipi p'aquirirca.

²⁰Chai q'uipaca Moisesca israelcuna rurashca bizi diosta japishpa ninapi rupachishpami, ñutu allpa tucungacama cutashpa yacupi churashpa chai yacutaca israelcunaman ubyachirca.

²¹Chaipimi Moisesca Aarontaca: — Cai gentecunapajman cai jatun juchata apamuchunca paicunaca cantaca ¿imatataj rurarcari? — nirca.

²²Shina nijpi Aaronca: — Ñuca amito, ñucahuanca ama p'iñarihuaichu. Cai israelcuna millaita rurana yuyailla cashcataca canllataj yachanguimi.

²³Paicunamari ñucataca: Egiptomanta ñucanchijta llujshichimuj Moisés ima tucushcataca mana yachanchijchu. Cunanca ñucanchijta ñaupashpa richun dioscunata rurai nircacuna.

²⁴Chaimi ñucaca: Maijanpish curita charijca llujshichishpa apamuichij nijpi paicuna ñucaman cujpimi, chaicunata ninapi shitajpica, cai bizi llujshircalla — nircami.

²⁵Israelcunataca yallitaj cacharishcacuna cajta ricushpa, paicunata p'iñajcunapi pingai tucungapajllataj Aaronpish israelcuna mañashcata rurashcata ricushpami,

²⁶Moisesca carpa huasicuna ñaupajpi shayarishpaca: — Mandaj Diospaj maijanlla casha nijcunaca ñucahuan tandanacuichij — nijpi, tucui levitacuna paihuan tandanacurcacuna.

²⁷Paicunatami Moisesca: — Mandaj Dios israelcunapaj Taita Diosca cashnami nin: Tucuicuna cancunapaj quiquin espadacunata changa uripi aparishca, carpa huasicunaman tigrashpa huasin huasin rishpa cancunapaj quiquin huauquicunata, cancunahuan alli apanacujcunata, cancunapaj familiacunata huañuchigrichij ninmi — nirca.

²⁸Levitacunaca Moisés nishca shinallataj rurajpimi chai punllapica, 3.000 israelcuna huañurcacuna.

²⁹Chaimi Moisesca: — Cancunaca Mandaj Dios alli nishca tucungapajca quiquin churita, quiquin huauquita huañuchishpami, Mandaj Diospajlla tucushcanguichij — nirca.

³⁰Chai cayandij punllami Moisesca israelcunataca: — Cancunaca yallitaj jatuntamari juchallishcanguichij. Cancunapaj juchacunamanta pai yallitaj p'iñarishcata ima shinapish parachi tucushapishchari cunanmi Mandaj Diospajman huichiyagrini — nirca.

³¹Shina nishpa Mandaj Diospaj ñaupajman Moisés tigrashpaca: — Cai israelcunaca curi dioscunata rurashpamari jatunta juchallishca.

³²Cunanca paicunapaj juchacunata perdonapai. Paicunata mana perdonashpaca ñuca shutitapish cambaj libromanta p'ichahuai — nircami.

³³Mandaj Diosca, Moisestaca: — Maijanpish ñucata p'iñashpa juchallijpaj shutillatami ñuca libromantaca anchuchisha.

³⁴Cunanca israelcunata ñuca maiman pushashpa richun nishcaman pushashpa rilla. Ñuca angelmi canta ñaupashpa ringa. Paicunata llaquichina punlla chayajpimi, paicunapaj juchamantaca llaquichisha — nircami.

³⁵Mandaj Diosca israelcunataca Aarón rurashca bizi diosta adorashcamantami chugrichirca.