Read Chimborazo Highland Quichua ÉXODO 37 Bible Online

ÉXODO 37 - Chimborazo Highland Quichua bible

ÉXODO 37

¹Bezaleelca arcatapish acacia caspillamantatajmi rurarca. Chai arcaca sunimanca shuj metro chunga ishqui chaupi centímetro, anchomanca sujta chunga canchis chaupi centímetro, altomanpish sujta chunga canchis chaupi centimetromi carca.

²Chai arcataca ucutapish jahuatapish alli curihuanmi llihuirca. Muyundij filocunapica curi ribetetami rurarca.

³Chai arcapajca chuscu esquinapajmi curi chuscu argollacunata rurarca. Ishquitaca shuj ladopaj, ishquitaca caishuj ladopajmi rurarca.

⁴Acacia suni caspicunatapish rurashpami chai jahuataca curihuan llihuirca.

⁵Chai caspicunataca arcata huandushpa apanapaj churashca argollacunapimi churarca.

⁶Chai arcapaj propiciatoriotapish sunimanca shuj metro chunga ishqui chaupi centímetrota, anchomanca sujta chunga canchis chaupi centimetrotami alli curita rurarca.

⁷Martillohuan tacashpa curi ishqui querubincunatapishmi rurarca. Chaitaca arcapaj propiciatorio ishqui ladomanmi churarca.

⁸Chai ishqui querubincunataca, arcapaj propiciatoriollapitaj tandachishpami rurarca. Shujtaca shuj lado filoman, caishujtaca caishuj lado filomanmi rurarca.

⁹Chai querubincunataca arcapaj propiciatoriota urilla ricushpa cumulla ch'imbapura tiyacujtami rurarca. Paicunapaj alascunaca arcapaj propiciatoriota llandungapaj jahuata chutashcami carca.

¹⁰Mezatapish acacia caspillamantatajmi rurarca. Chai mezaca sunimanca iscun chunga centímetro, anchomanca chuscu chunga pichca centímetro, altomanca sujta chunga canchis chaupi centimetromi carca.

¹¹Chai mezataca alli curihuanmi tucuita llihuirca. Chai muyundij filopica curi ribetetami rurarca.

¹²Chai muyundijtaca canchis chaupi centímetro ancho jarcatami rurarca. Chaitapish muyundijtami curi ribeteta rurarca.

¹³Curi chuscu argollacunata rurashpami, chaicunataca chai meza chaquipaj chuscu esquinapi churarca.

¹⁴Chai argollacunataca meza filota jarcashca ucunijllapimi churarca. Chai argollacunaca huanduna caspicunata churachishpa, mezata apangapajmi chashna churashca carca.

¹⁵Chai mezata huanduna caspicunatapish acacia caspimanta rurashpami jahuataca curihuan llihuirca.

¹⁶Meza jahuapi imallata ruranacunataca: Platocunata, cucharacunata, trinchicunata, cuchillocunata, vasocunatapish ashtahuan alli curitami rurarca. Tasacunaca yacu shinacunata tallinapajmi.

¹⁷Chai candelerotaca chaquiyujta, chai troncotapish copacunayujta, manzanacunayujta, sisacunayujta ashtahuan alli curita martillohuan tacashpami rurarca.

¹⁸Chaitaca sujta maquicunayujtami rurarca. Chai maquicunaca quimsaca shuj ladoman, quimsaca caishuj ladomanmi carca.

¹⁹Cada maquicunatami almendro sisacunatajllayujta, quimsa copacunatajllayujta, shuj manzanatajllayujta, shuj sisatajllayujta rurarca. Caishuj lado maquipipish quimsa copacunatajllayujta, shuj manzanatajllayujta, chai puntapica almendro sisatajllayujtami rurarca. Sujta maquicunapitajmi chashna rurarca.

²⁰Tucuita aparij troncopish almendro sisatajlla chuscu copacunayujmi carca. Shuj manzanatajllatapish, shuj sisatajllatapishmi rurarca.

²¹Chai troncomanta llujshij quimsa maquicunapica cada maqui puntapimi shuj shuj manzanacunatajlla tiyarca.

²²Candelero troncopish, chaimanta llujshij maquicunapish alli curita candelero troncopi shujllata rurashcami carca. Chaicunapi tiyaj manzanacunatajllataca martillohuan tacashpa rurashcami carca.

²³Chai maquicunapi tiyaj canchis lamparacunatapish, mecha rupashca ushpata anchuchinacunatapish, chai ushpata tandana platillocunatapish alli curillamantatajmi rurarca.

²⁴Chai candelerotaca chaipi tucui imallata ruranacunandijtaca shuj talento alli curitami rurarca.

²⁵Inciensota rupachina altartapish acacia caspitami rurarca. Chai altarca sunimanca chuscu chunga pichca centímetro, anchomanpish chuscu chunga pichca centimetrollatajmi carca. Chuscundij ladomi chai medidallataj carca. Altomanca iscun chunga centimetromi carca. Chai altarpi caj gachucunaca altarhuan shuj shinallata rurashcami carca.

²⁶Chai altar jahuatapish, lado quinricunatapish, gachucunatapish alli curihuanmi llihuirca. Muyundij filocunatapish, curihuanmi ribetirca.

²⁷Chai ribete ucunijllapica ishqui esquinapimi curi argollacunata rurarca. Caishuj ladomanpish chashnallatajmi rurarca. Chaipi caspicunata churachishpa maimanpish apanapajmi chashna rurarca.

²⁸Chai caspicunataca acacia caspimanta rurashpami curihuan llihuirca.

²⁹Diospajlla cachun ch'icanchina aceitetapish, mishquijllata ashnaj ashtahuan alli inciensotapishmi rurarca. Chaitaca mishquijllata ashnaj jambicunata ruranata yachaj rurashcatapish yalli mishquijllaman ashnacujtami rurarca.