Read Chimborazo Highland Quichua ÉXODO 39 Bible Online

ÉXODO 39 - Chimborazo Highland Quichua bible

ÉXODO 39

¹Diospajlla ucupi Diospajta ruranapaj churanacunataca azul, morado, amsa puca puchcacunata ahuashpami rurarca. Aarón Diospajlla cura cashpa churarina churanatapish Mandaj Dios, Moisesta mandashca shinallatajmi rurarca.

²Efodtapish curimantami rurarca. Azul, morado, amsa puca puchcacunahuan, caupushca lino puchcahuanmi rurarca.

³Curita martillohuan tacashpa ñañujlla latata rurashpami, puchca shina ñañujllata p'itircacuna. Chai curi puchcahuanmi azul, morado, amsa puca puchcacunahuan, lino puchcahuan sumaj ricunacunayujta ahuarcacuna.

⁴Chai efod nishca churanapica ishqui rigra jahuatami ñaupaj ladohuan huasha ladohuan tandachingapaj ishqui mirga linsocunata rurarca.

⁵Efod jahuata chumbillirina chumbipish efodta shinallataj rurashcami carca. Mandaj Dios Moisesta mandashca shinallatajmi curihuan, azul, morado, amsa puca puchcacunahuan, caupushca lino puchcahuan rurashca carca.

⁶Ónice rumicunata labrashpami, chaicunataca canichinata curimanta rurashcahuan muyundijta canichirca. Chaipica yaya Israelpaj churicunapaj shuticunataca sellanapi quillcashpa churaj shinami quillcashpa churarca.

⁷Chaicunataca Mandaj Dios Moisesta mandashca shinallatajmi, Israelpaj churicunata yuyarinapaj cachun efod churana ishqui rigra jahuapi churarca.

⁸Pectoraltapish efodta shinallatajmi curi puchcahuan, azul, morado, amsa puca puchcacunahuan, caupushca lino puchcahuan sumajta bordashcayujta ahuarca.

⁹Chai pectoralca racuta ahuashca patarijpica, sunimanca ishqui chunga ishqui centímetro chaupihuan, anchomanpish ishqui chunga ishqui centímetro chaupihuanmi carca.

¹⁰Chai pectoralpica chuscu fila rumicunatami churarca. Punta filapica shujca sardio, caishujca topacio, chaishujca carbunclo rumicunami carca.

¹¹Ishqui filapica shujca esmeralda, caishujca zafiro, chaishujca diamante rumicunami carca.

¹²Quimsa filapica, shujca jacinto, caishujca ágata, chaishujca amatista rumicunami carca.

¹³Chuscu filapica, shujca berilo, caishujca ónice, chaishujca jaspe rumicunami carca. Tucui chai rumicunaca curimanta cajonta shina rurashcapi churashpa canichishcami carca.

¹⁴Chai rumicunaca Yaya Israelpaj chunga ishqui churicunapaj shuticuna cashca shinallataj chai rumicunapish chunga ishquimi carca. Chai rumicunapica chunga ishqui aillucunapaj shuticunataca cada rumipi cada aillupaj shuticunata sellanapi quillcashca shinami carca.

¹⁵Pectoralpica ashtahuan alli curita ch'imbatajlla huatuta rurashcatami churarca.

¹⁶Ishqui canichinacunatapish, ishqui argollacunatapish curitami rurarca. Chai ishqui argollacunataca pectoralpaj jahua lado ishqui esquinacunapimi churarca.

¹⁷Curimanta rurashca ishqui argollacunataca pectoralpaj jahua lado ishqui esquinacunapimi churarca.

¹⁸Argollacunapi huatashca caishuj ishqui lado puntataca efod churana rigra jahua ñaupaj ladoman canichinacunata churashcapimi canichirca.

¹⁹Shujtaj ishqui curi argollacunatapish rurashpami, pectoralpaj ucu lado ishqui esquinacunapi churarcacuna. Efod nishca churanahuan tupanacun ishqui lado uripimi churarcacuna.

²⁰Ishqui curi argollacunatapish rurashpami, efod churana ñaupaj lado ishqui ladoman churarcacuna. Chaitaca cintura jananijllapimi, sirashca c'uchullapi churarcacuna.

²¹Chaicunataca pectoralpi churashca argollacunahuan efodpi churashca argollacunahuanmi azul-lla puchcahuan tandachishpa huatarca. Chai pectoraltaca efod churana jahuamanta ama ch'icanyanacuchunmi chashna rurarca. Mandaj Dios Moisesta mandashca shinallatajmi rurarcacuna.

²²Efod ucuta churarina churanataca, azul puchcata sumajta ahuashpami rurarca.

²³Chaupipi jutcushpa chai jutcu muyundij ama lliquirichunmi chai muyundijtaca racuta ahuarca.

²⁴Chai churana muyundijtaca azul, morado, amsa puca puchcacunahuan, caupushca lino puchcahuan granada nishca sumaj bolacunata rurashpami huarcurca.

²⁵Alli curimanta uchijlla campanillacunatapish rurashpami, chai churana chaqui filo muyundijta granadacunahuan chagrushpa churarca.

²⁶Diospajta rurangapaj churarina churana filopica shuj campanilla, shuj granada, shuj campanilla, shuj granadata muyujta churashcami carca.

²⁷Aaronpajpish, paipaj churicunapajpish túnica churanataca ashtahuan alli linota ahuashcami carca.

²⁸Metratapish, tiaracunatapish, calzoncillocunatapish caupushca ashtahuan alli linohuanmi rurarca.

²⁹Chumbillinatapish Mandaj Dios Moisesta mandashca shinallatajmi caupushca linohuan, azul, morado, amsa puca puchcacunahuan sumajta bordashcacunayujta ahuanata yachajmi ahuarca.

³⁰Ashtahuan alli curimanta cintatajlla diadematami rurarca. Chaipica: MANDAJ DIOSCA JUCHA ILLAJMI nishcatami sellanapi quillcaj shina quillcarca.

³¹Mandaj Dios Moisesta mandashca shinallataj mitra jahuata pilluchishpa huatangapajmi chai diademapica azul huatuta churarca.

³²Chashnami Diospaj carpa huasita shayachinapajca tucuita rurarcacuna. Dioshuan tupanacuna carpa huasita shayachinapajca Mandaj Dios Moisesta mandashca shinallatajmi israelcunaca tucuita rurarcacuna.

³³Diospaj carpa huasita shayachinacunatapish, chaipi imallata runapaj cajcunatapish, Moisespajmanmi apamurcacuna. Chaicunaca: Ganchocuna, tablacuna, quinriman churana suni caspicuna, pilarcuna, pilarcunata shayachina basacuna,

³⁴Diospaj carpa huasita c'atanapaj pucajllata tinishca carnero caracuna, tejonpaj caracuna, Diospajlla ch'icanchishca ucuta churana cortina,

³⁵Dioshuan ari ninacushca quillcata huaquichina arca, chai arcata huanduna caspicuna,

³⁶chai arcapaj propiciatorio, meza, chai mezapaj vasocuna, Diospaj ñaupajpi churana tanda,

³⁷ashtahuan alli curita rurashca candelero, candeleropaj lamparacuna, chai lamparacunata allichinacuna, chaipi imallata ruranapaj cajcuna, achijyachichun lamparapi churana aceite,

³⁸curi altar, Diospajlla cachun ch'icanchina aceite, mishquijllata ashnaj incienso, Diospaj carpa huasi pungupi churana cortina,

³⁹bronce altar, chai altarpi churana bronce parrilla, chai altarta huanduna caspicuna, chaipi imallata ruranapaj cajcuna, yacupaj tanque, chai tanqueta tiyachina basa,

⁴⁰Diospaj carpa huasi canlla muyundij cortinacuna, chai cortinacunata churanapaj pilarcuna, chai pilarcunata shayachina basacuna, Diospaj carpa huasi canllaman yaicunapi churana cortina, huascacuna, ishtacacuna, Diospaj carpa huasipi imallata ruranacuna, Dioshuan tupanacuna carpa huasipi imallata ruranacuna,

⁴¹Diospajlla ch'icanchishca ucupi Diospajta ruracushpa churarina churanacuna, Mandaj Diospajlla caj Aarón cura churarina churanacuna, paipaj churicuna Diospajta ruranapi churarina churanacunatapishmi Moisespajman apamurcacuna.

⁴²Mandaj Dios Moisesta tucui imallata rurachun mandashca shinallatajmi israelcunaca tucuita rurarcacuna.

⁴³Moisesca tucui chaicunataca, Mandaj Dios mandashca shinallataj sumajta rurashcatami ricurca. Chaimantami paicunataca allitami rurashcanguichij nirca.