Read Chimborazo Highland Quichua ÉXODO 4 Bible Online

ÉXODO 4 - Chimborazo Highland Quichua bible

ÉXODO 4

¹Chaimi Moisesca: — Ñuca chashna nijpipish paicunaca mana cringacunachu, ñuca nishcataca mana uyangacunachu. Ashtahuanpish: Mandaj Diosca maitataj canman ricurinman carcari ningacunami — nirca.

²Mandaj Diosca: — ¿Cambaj maquipi charicunca imatagari? — nijpi Moisesca: — Shuj caspillatami charicuni — nirca.

³Mandaj Dios: — Pambapi shitai — nijpi Moisés pambapi shitajpica, chai caspi culebra tucujpimi, Moisesca chaimanta anchushpa callpai callarirca.

⁴Chaimi Mandaj Diosca Moisestaca: — Cambaj maquihuan chupapi japi — nijpi Moisesca maquita chutashpa chai culebrata chupapi japijpica, caspillataj tucurca.

⁵Can chashna rurajta ricushpami paicunapaj ñaupa yaya Abrahampaj, Isaacpaj, Jacobpaj Mandaj Dios canman ricurishcata cringacuna.

⁶Mandaj Diosca cashnapishmi nirca: — Cunanca cambaj maquita ñuñu ucui — nijpi, maquita ñuñu ucushpa cutin llujshichijpica, paipaj maquica rasu shina yurajlla leprahuan cajtami ricurca.

⁷Mandaj Diosca: — Cutinllataj cambaj maquita ñuñu ucui — nijpi cutinllataj maquita ñuñu ucushpa ñuñu ucumanta cutin llujshichijpica paipaj cuerpo cashca shinallataj cajtami ricurca.

⁸Punta señalta ricushpa mana crishpa mana cazushpapish, q'uipa señalta ricushpaca cringacunami.

⁹Cai ishqui señalcunata ricushpapish mana crijpi, can rimashcatapish mana uyajpica, jatun yacumanta yacuta japishpa allpapi tallingui. Chai yacuca allpapica yahuarmi tucunga — nircami.

¹⁰Chaimi Moisesca, Mandaj Diostaca: — ¡Aij, Jatun Dioslla! Cambajta ruraj ñucahuan quiquin manaraj rimajpipish cunanpish saruncunamanpish ñucaca manamari alli rimaj canichu. Ñucaca mana utca rimai tucuj imata rimangapajpish c'allu huataricujmari cani — nircami.

¹¹Mandaj Diosca: — ¿Pitaj runamanca shimita curcari? ¿Mana rimajtapish, mana uyajtapish, ñahui ricujtapish, mana ricujtapish pitaj rurarcari? Chaicunataca ¿Manachu Mandaj Dios ñuca rurarcani?

¹²Ashtahuanpish cunanca rilla. Ñucami cantaca rimachisha. Imallata rimanatapish ñucami yachachisha — nircami.

¹³Chaimi Moisesca: — ¡Aij, Jatun Dioslla, ñucapaj randica shujtajta cachapailla! — nirca.

¹⁴Mandaj Dios Moiseshuan p'iñarishpaca: — ¿Manachu ñucaca levitapura caj cambaj huauqui Aarontaca alli rimaj cajta rijsini? Paimi canta tupanaman llujshinga. Canta ricushpaca jatuntamari cushicunga.

¹⁵Paihuan rimangui. Ñuca imalla nishcacunatapish paiman yachachingui. Can rimanapipish, pai rimanapipish ñucami cancunahuan casha. Imalla rurana cashcatapish ñucami yachachisha.

¹⁶Israelcunamanca paimi can rimacushca shinallataj cambaj randi rimanga. Aaronmanca canmi Diospaj randi rimangui.

¹⁷Cai caspitaca apangui. Chaihuanmi milagrocunata rurashpa ricuchingui — nircami.

¹⁸Chai q'uipaca Moisesca paipaj suegro Jetropajman tigrashpami: — Cunanca ñuca huauquicuna causacushcata mana causacushcata ricungapajmi Egiptoman tigragrini — nijpimi, Jetroca Moisestaca: — Alli ripangui — nirca.

¹⁹Mandaj Diosca Moisestaca Madianpica: — Egiptoman tigrailla. Canta huañuchisha nicujcunaca ñami tucuicuna huañun — nircami.

²⁰Chaimi Moisesca paipaj huarmita, paipaj huahuacunatapish burropi tiyachishpa Egiptoman tigrarca. Moisesca Taita Diospaj caspitapish aisashcami rirca.

²¹Mandaj Diosca Moisestaca: — Egiptoman tigrashpaca, jatun mancharinacunata rurachun ñuca cambaj maquipi churashcataca faraonpaj ñaupajpi tucuita rurashpa ricuchingui. Ashtahuanpish paipaj shunguta ñuca sinchiyachijpimi, israelcuna richunca mana saquinga.

²²Mana cacharisha nijpica faraontaca: Mandaj Diosca cashnami nin: Israelca ñuca punta churimi.

²³Ña nishca shinaca ñucapajta rurachun ñuca churi richun saqui ninmi. Ashtahuanpish paicuna richun mana saquijpica ñucaca cambaj punta churitami huañuchisha ninmi ningui — nircami.

²⁴Egiptoman Moisés tigracujpimi, shuj tutaca Mandaj Diosca pai samaricunman shamushpa paita huañuchisha nirca.

²⁵Chaipimi Moisespaj huarmi Seforaca rumimanta rurashca filojlla cuchillota japishpa, paipaj churi charishca aicha mirga carata p'itishpa, Moisespaj chaquipi tupachishpaca: “Cunantajca ñuca quiquin yahuar cusami cangui” nirca.

²⁶Chashna rurajpimi Mandaj Diosca, Moisestaca Egiptoman richun saquirca. Séfora huarmica circuncisionta rurashcamanta cunanca ñuca quiquin “yahuar cusami cangui” nircami.

²⁷Mandaj Diosca Aarontaca: “Shitashca pambapi Moiseshuan tupanaman ri” nijpi Aarón rishpaca, Taita Diospaj urcupi Moiseshuan tupashpami paita mucharca.

²⁸Chaipimi Moisesca Aaronmanca, Mandaj Dios imallata nichun nishcacunatapish, imalla milagrocunata rurashpa ricuchichun nishcatapish tucuita huillarca.

²⁹Chai q'uipaca Moisespish, Aaronpish rishpami israelcunata cunaj yuyajcunataca tucuicunata tandachircacuna.

³⁰Chaipimi Aaronca, Mandaj Dios Moisesman imalla nishcacunata tucuita huillashpa, milagrocunatapish tucuicunapaj ñaupajpi rurashpa ricuchirca.

³¹Chaita ricushpami, israelcunaca Mandaj Diosca paicuna llaquita apacujpi ricunaman shamushcata uyashpa, crishpa Mandaj Diosta cumurishpa adorarcacuna.