Read Chimborazo Highland Quichua ÉXODO 5 Bible Online

ÉXODO 5 - Chimborazo Highland Quichua bible

ÉXODO 5

¹Chai q'uipami Moisespish, Aaronpish faraonpaj ñaupajman rishpaca: — Israelcunata Mandaj Diosca cashnami nin: Ñuca agllashca israelcuna shitashca pambaman rishpa ñucata yuyarishpa fiestata ruragrichun saqui ninmi — nircacuna.

²Ashtahuanpish faraonca: — ¿Pitaj chai Mandaj Diosca pai nishcata uyashpa israelcunata richun ñuca saquingapajca? Mandaj Diosca pipishchari, mana rijsinichu. Israelcunatapish richun mana saquishachu — nircami.

³Chaimi paicunaca: — Hebreocunapaj Taita Diosmari ñucanchijhuan tuparca. Ñucanchijta Mandaj Dios jatun ungüihuan, mana cashpaca espadahuan ama huañuchichunmi, cunanca quimsa punllacunata shitashca pambaman rishpa, chaipi ñucanchijta Mandaj Diosman animalcunata cushpa rupachina canchij — nircacunami.

⁴Chaimi Egiptota jatun mandajca: — Moisés, Aarón ¿ima nishpataj trabajacuj gentecunata saquichishun ninguichij? Richij, imata ruracushcata ruragrichij — nirca.

⁵Faraonca cashnapish nircami: — Cunanca israelcunaca cai llajtapica yallitaj achcacunami. Paicunataca chai tucuicunatachu paicuna trabajacunmanta saquichishun ninguichij — nircami.

⁶Chai punllallatajmi faraonca mirga mirgapi ch'icanchishcacunata mandajcunatapish, paicunata mandajcunatapish cashna mandarca:

⁷— Israelcuna ladrillocunata rurachun cunancama ujshata cucushca shinaca ña ama cunguichij. Cunanmanta pachaca ujshataca paicunallataj tandanaman richun.

⁸Ashtahuanpish ñaupaman mashna ladrillocunata ruraj cashca shinallatataj rurachinguichij. Amataj shujllapish illajtaca chasquinguichijchu. Paicunaca q'uillacuna cashpami: Ñucanchij Diosman sacrificiocunata cugrishun nishpa caparicuncuna.

⁹Llullashpa purijcuna umashcata uyangapaj ama tiempota charichunca paicunamanca ashtahuan sinchi trabajocunata cuichij — nircami.

¹⁰Chaimi mirga mirgapi ch'icanchishcacunata mandajcunapish, paicunata mandajcunapish israelcunapajman rishpaca: — Faraonca cashnami nin: Ujshataca ña mana cugrinichu,

¹¹cunanca cancunallatajmi maipi ujsha tiyanman rishpa japimugrina canguichij. Ashtahuanpish ladrillocunataca ñaupaman mashnata ruraj cashca shinallatatajmi rurana canguichij ninmi — nircacuna.

¹²Shina nijpica israelcunaca tucui Egipto llajtata rishpami, ladrillocunata rurana ujshapaj randica rastrojocunata tandanaman rircacuna.

¹³Mirga mirgapi ch'icanchishcacunata mandajcunaca: “Shujtajcuna ujshata cucujpi cada punlla mashna ladrillocunata ruraj cashca shinallatatajmi rurana canguichij” nircacunami.

¹⁴Mirga mirgapi ch'icanchishcacunata mandachun faraón churashca mandajcunaca israelcunata mandajcunatami: “¿Ima nishpataj ladrillocunataca cainapish cunanpish saruncunaman mashnata ruraj cashca shinallatataj mana rurachinguichij?” nishpami macarcacuna.

¹⁵Chashna rurajpimi, Israel mandajcuna faraonpajman rishpaca: — ¿Ima nishpataj cambajta rurajcunataca chashna llaquichingui?

¹⁶Cambajta rurajcuna ladrillocunata rurachunca ujshataca ña mana shujtajcunahuan ashtachicuncunachu. Chai jahuamari ñucanchijtaca ladrillocunataca sarunman mashnata ruraj cashca shinallatataj rurachun nincuna. Mana chaitataj rurajpica, ujshata mana cushca jahuamari cambajta ruraj ñucanchijtaca macancuna. Cambaj gentecunallatajmari chashna mana allita ruran — nircacunami.

¹⁷Jatun mandajca: — Cancunaca q'uillacunami canguichij. Ari, q'uillacunatajmari canguichij. Chaimantami: Mandaj Diosman sacrificiocunata cunaman ricunchij ninguichij.

¹⁸Ashtahuanpish cunanca utca trabajagrichij. Ujshata ña mana cujpipish, ladrillocunataca sarunman mashnata ruraj cashca shinallatatajmi rurana canguichij — nircami.

¹⁹Ladrillocunata cada punlla mashnata ruraj cashca shinallataj rurachun nishcaca Israel mandajcunapica yallitaj llaquimi ricurirca.

²⁰Faraonpajmanta paicuna llujshishpaca paicunata canllaman shuyacuj Moiseshuan, Aaronhuan tupashpami,

²¹paicunataca: — Faraonpaj ñaupajpi, paipajta rurajcunapaj ñaupajpi ñucanchijta p'iñaipi churashcataca Mandaj Dios ima shina cashcata alli ricushpa imatapish nichun. Cancuna ñucanchijta chashna rurashpaca cancunallatajmari paicunapaj maquipi espadata churaj shina ñucanchijtaca huañuchichigringuichij — nircacunami.

²²Chaimi Mandaj Diospajman Moisés muyurishpaca: — Jatun Dioslla, ¿ima nishpajtaj can agllashcacunataca llaquichinguiyari? ¿Imapajtaj ñucataca caiman cacharcanguiyari?

²³Quiquinmi cachan nishpa faraonhuan ñuca rimai callarishca punllamantamari israelcunataca ashtahuan llaquichin. Chashna rurajpipish, canca paicunataca manarajmari cacharichinguichu — nishpami mañarca.