Read Chimborazo Highland Quichua ÉXODO 7 Bible Online

ÉXODO 7 - Chimborazo Highland Quichua bible

ÉXODO 7

¹Chaimi Mandaj Diosca Moisestaca: — Riqui, cantaca ñucapaj randimi faraonpaj ñaupajpi churani. Can imalla nishcataca cambaj huauqui Aaronmi huillanga.

²Tucui imalla ñuca mandashcataca Aaronmanca canmi huillangui. Israelcunata paipaj llajtamanta richun saquichunca cambaj huauqui Aaronmi faraonhuanca rimanga.

³Ashtahuanpish faraonpaj shungutaca ñucami sinchiyachisha. Ñucallatajmi Egiptopica, milagrocunatapish, jatun mancharinacunatapish ashtahuan mirachisha.

⁴Chaipipish faraonca cancunataca mana uyangachu. Ashtahuanpish Egipto llajta jahuapi ñuca maquita churashpa yallitaj llaquichishpami, ñuca agllashca israelcunataca soldadocunata shina cada mirgapi churashpa Egiptomantaca llujshichimusha.

⁵Egipto llajta jahuapi ñuca maquita chutashpa paicunapaj chaupimanta israelcunata llujshichijpimi, egipciocunaca ñucataca Mandaj Dios cashcata yachangacuna — nircami.

⁶Moisespish, Aaronpish Mandaj Dios paicunata ima shinalla mandashca shinami tucuita rurarcacuna.

⁷Faraonhuan rimacui punllacunapica, Moisesca pusaj chunga huatata, Aaronca pusaj chunga quimsa huatatami charirca.

⁸Mandaj Diosca Moisestapish, Aarontapish:

⁹— Faraón: Shuj milagrota rurashpa ricuchi nijpica, Aarontaca: Culebra tucuchun cambaj caspita japishpa faraonpaj ñaupajpi shitai ningui — nircami.

¹⁰Moisespish, Aaronpish faraonpajman rishpaca, Mandaj Dios mandashca shinallatajmi rurarcacuna. Aaronca paipaj caspitaca faraonpaj, paipajta rurajcunapaj ñaupajpi shitajpimi, chai caspica culebra tucurca.

¹¹Chaimi faraonca Egiptopi caj adivinocunata, brujocunata tandachichun cachajpi paicuna shamushpaca brujocuna rurana cashcata rurashpa Moisespish, Aaronpish milagrota rurashca shinallataj rurarcacuna.

¹²Paicunapaj caspicunata pambapi shitajpica, chai caspicunapish culebracuna tucurcallami. Ashtahuanpish Aaronpaj caspica, paicunapaj caspicunatami millpurca.

¹³Ashtahuanpish faraonpaj shunguca Mandaj Dios nishca shinallataj rumi tucushpami mana uyasha nirca.

¹⁴Chai q'uipami Mandaj Diosca, Moisestaca: — Faraonca sinchi shungu tucushpami, israelcuna rishun nijpica mana saquisha nin.

¹⁵Cayandij tutamantaca faraonpajman ri. Pai jatun yacuman shamucujpica canca culebra tucushca cambaj caspita apashpa chai yacu uripi tupashpa,

¹⁶paitaca: Mandaj Dios hebreocunapaj Taita Diosmi ñucataca cambajman cashna nichun cachan: Ñuca agllashcacuna shitashca pambapi ñucapajta ruranaman richun saqui. Ashtahuanpish canca cunancama manamari uyanguichu.

¹⁷Mandaj Diosca: Mandaj Diostaj ñuca cashcataca caita ricushpami rijsingui ninmi: Chaimanta cunan ñuca maquipi charicun caspihuan jatun yacupi huajtajpica, chai yacuca yahuarmi tucunga.

¹⁸Chai jatun yacupi tiyaj chalhuacunaca huañungami. Chai yacupish ashnacujmi tucunga. Chaimi egipciocunaca millanachishpa chai yacutaca mana ubyangacuna ninmi — nircami.

¹⁹Mandaj Diosca, Moisestaca cashnapishmi nirca: — Aarontaca: Egiptopica jatun yacupish, huaicuta rij yacupish, tandashca tanque yacupish, maillapi yacuta tandashcacunapish, caspimanta, rumimanta rurashcacunapi tiyaj yacucunapish yahuar tucushpa Egipto llajtapica, yahuarhuan junda cachun cambaj caspita japishpa tucui chai yacucuna jahuata chutai ni — nircami.

²⁰Moisespish, Aaronpish Mandaj Dios nishca shinallatajmi rurarcacuna. Aaronca pai charicushca caspihuan faraonpaj, faraonpajta rurajcunapaj ñaupajpi jatun yacuta huajtajpica, tucui chai yacucunami yahuar tucurca.

²¹Chai jatun yacupi tiyaj chalhuacunapish huañujpi, yacupish yallitaj ashnacuj tucujpimi egipciocunaca mana ubyai tucurcacuna. Egiptopica tucui llajtapimi yahuar tucurca.

²²Shinallataj Egipto llajta brujocunapish, brujocuna rurana cashca shina rurashpaca, Moiseshuan, Aaronhuan milagrota ruraj shinallatajmi rurarcacuna. Chaimi faraonpaj shunguca Mandaj Dios nishca shinallataj rumi tucushpa mana uyarca.

²³Moisespish Aaronpish milagrocunata rurashcaca, faraonpajca ima mana cashca shina cajpimi paipaj huasiman rircalla.

²⁴Chai jatun yacumantaca mana ubyai tucushpami, egipciocunaca tucuicuna yacuta ubyangapajca jatun yacu urindijta pugyucunata allarcacuna.

²⁵Mandaj Dios jatun yacuta yahuarman tigrachishcaca canchis punllacunami tucurca.