Read Chimborazo Highland Quichua ÉXODO 8 Bible Online

ÉXODO 8 - Chimborazo Highland Quichua bible

ÉXODO 8

¹Chaimi Mandaj Diosca, Moisestaca: — Faraonpaj ñaupajman yaicushpa: “Mandaj Diosca cashnami nin ni: Ñuca agllashcacunata ñucapajta ruranaman richun saqui.

²Paicuna richun can mana saquijpica, ñucaca tucui Egiptotami sapocunahuan llaquichisha.

³Jatun yacumantaca yallitaj t'imbucuj sapocuna llujshishpami, cambaj huasipi, can causana ucupi, can dormina camapi, cambajta rurajcunapaj huasicunapi, tucui cai pueblopi, cambaj hornocunapi, tandapaj masana artesacunapipish yaicushpa jundaringacuna.

⁴Sapocunaca cambaj jahuapipish, cai llajtapi causajcunapaj jahuapipish, tucui cambajta rurajcunapaj jahuapipishmi jundaringacuna ninmi” ningui — nircami.

⁵Mandaj Diosca Moisestaca: — Aarontaca: Jatun yacucuna jahuata, huaicuta rij yacucuna jahuata, yacu tanquecuna jahuata, paipaj caspita chutachun mandai. Tucui cai Egipto llajtapi sapocuna llujshishpa jundachun — nircami.

⁶Chashna nijpica Aaronca, Egipto llajtapi tiyaj tucui yacucuna jahuata paipaj caspita chutajpica, chai yacucunamantaca sapocuna llujshishpami, tucui Egipto llajtapi jundarirca.

⁷Chai llajtapaj brujocunapish Moisés, Aarón milagrota rurashca shinallatajmi brujocuna ruraj cashca shina rurashpa sapocunataca tucui Egipto llajtapi jundachirca.

⁸Chaimi faraonca Moisesta, Aaronta cayashpaca: — Ñucamantapish, ñuca mandacun gentecunamantapish, sapocunata anchuchichun Mandaj Diosta mañaichij. Chaipimi israelcunataca Mandaj Diosman sacrificiocunata cunaman richun saquisha — nirca.

⁹Shina nijpi Moisesca, faraontaca: — Canmantapish, cambajta rurajcunamantapish, can mandacun gentecunamantapish, cambaj huasimantapish sapocuna anchushpa jatun yacullapi tiyachunca ¿ima punllataj mañachun ninguiyari? — nircami.

¹⁰Shina nijpi faraonca: — Cayataj mañapangui — nijpimi, Moisesca: — Ñucanchij Mandaj Dios shinaca, pi shujtaj mana tiyashcata can yachachunca can nishca punllapitajmi ruranga.

¹¹Sapocunaca canmantapish, cambaj huasicunamantapish, cambajta rurajcunamantapish, can mandacun gentecunamantapish anchushpami jatun yacucunallapi saquiringa — nircami.

¹²Moisespish, Aaronpish faraonpaj ñaupajmanta llujshirishpaca, faraonpaj jahuaman cachashca sapocunata anchuchichunmi, Moisesca Mandaj Diosta caparishpa mañarca.

¹³Moisés mañashca shinallataj Mandaj Dios rurajpimi, huasicunapi, huasi canllacunapi, chagracunapi tiyaj sapocunaca huañurca.

¹⁴Chai sapocunataca montón montontami tandachirca. Chai llajtaca ashnacujmi tucurca.

¹⁵Ashtahuanpish faraonca ña ima llaquicuna illajpica, Mandaj Dios nishca shinallataj rumi shungu tucushpami mana uyarca.

¹⁶Chaimi Mandaj Diosca Moisestaca: — Aarontaca: Tucui Egipto llajtapi caj ñutu allpa pilis tucuchun, cambaj caspita chutashpa ñutu allpata huajtai ni — nirca.

¹⁷Paicunaca chashnami rurarca. Aarón, paipaj caspita japishpa maquita chutashpa, ñutu allpata huajtajpica, Egipto llajtapi caj tucui ñutu allpa piliscuna tucushpami gentecunapi, animalcunapi jundarirca.

¹⁸Chai piliscunaca gentecunatapish, animalcunatapish jatuntami llaquichicurca. Brujocunapish brujocuna ruraj cashca shinallataj ñutu allpamanta piliscunata rurashun nishpapish mana rurai tucurcacunachu.

¹⁹Chaimi brujocunaca faraontaca — Caitaca Taita Diospaj maquimi ruracun — nircacuna. Ashtahuanpish faraonca Mandaj Dios nishca shinallataj, rumi shungu tucushpami mana uyarca.

²⁰Mandaj Diosca Moisestaca: — Caya tutamanta utcata jatarishpa faraón jatun yacuman llujshijpica, paipaj ñaupajpi shayarishpa: Mandaj Diosca cashnami nin: Ñuca agllashcacunataca, ñucapajta ruranaman richun saqui.

²¹Ñuca agllashcacuna richun can mana saquijpica, ñucaca cambaj jahuamanpish, cambajta rurajcunapaj jahuamanpish, can mandacun gentecunapaj jahuamanpish, cambaj huasicuna jahuamanpish, tucui laya chuspicunatami cachasha. Egipciocunapaj huasicunapipish, paicuna causan llajtapipish tucui laya chuspicunami jundanga.

²²Chai punllacunapica ñuca agllashcacuna causacun Gosén llajtataca ñucapajllami ch'icanchisha. Chaimanta chai llajtapica nima laya chuspicuna mana yaicungachu. Mandaj Dios ñucataj israelcuna causacunpi cashcata yachachunmi chashna rurasha.

²³Chashnami ñuca agllashcacunaca shujcuna cashcata, cancunaca shujtajcuna cashcata ricuchisha. Cayami chashna cashcataca ricuchisha ninmi ningui — nircami.

²⁴Mandaj Diosca pai nishca shinataj rurajpimi, faraonpaj huasipipish, paipajta rurajcunapaj huasicunapipish, tucui Egipto llajtapipish yallitaj mancharina p'iña chuspicuna shamushpa llaquichirca. Chaimantami chai llajtaca yallitaj llaqui saquirirca.

²⁵Chaimi faraonca Moisesta, Aaronta cayashpaca: — Cancunapaj Diosmanca cai llajtallapitaj sacrificiocunata cunaman richij — nirca.

²⁶Chaimi Moisesca: — Animalcunata Diosman cushpa rupachinaca egipciocunapajca millananata rurana cashcamanta cai llajtallapitaj ñucanchij Diosman animalcunata cushpa rupachinaca mana allichu. Paicunapajca millanana cashcata ñucanchij paicunapaj ñaupajpi rurajpica ñucanchijtaca rumicunahuanmari shitangacuna.

²⁷Ñucanchijca shitashca pambaman quimsa punllata rishpami, ñucanchijta Mandaj Dios mandashca shinallataj animalcunata paiman cushpa rupachishun — nirca.

²⁸Chaimi faraonca: — Cancunata Mandaj Diosman shitashca pambapi animalcunata cushpa rupachinaman richun ñucaca saquinimi. Ashtahuanca ama yalli caruta ringuichijchu. Ñucamantapish mañapanguichij — nirca.

²⁹Moisesca: — Caimanta llujshishpami, canmantapish, cambajta rurajcunamantapish, can mandacun gentecunamantapish tucui laya chuspicuna cayataj anchuchun Mandaj Diosta mañasha. Ashtahuanca Mandaj Diosman animalcunata cushpa rupachinaman ñucanchij rijta can jatun mandaj ama jarcangui. Ñataj umashpalla chashna nicunguiman — nirca.

³⁰Moisesca faraonpaj ñaupajmanta llujshishpami Mandaj Diosta mañarca.

³¹Mandaj Diosca, Moisés mañashca shina rurashpami, faraonmantapish, paipajta rurajcunamantapish, pai mandacun gentecunamantapish shuj chuspillatapish mana saquishpa tucuita anchuchirca.

³²Faraonca cai cutinhuanpish rumi shungu tucushpami israelcuna richunca mana saquirca.