Read Chimborazo Highland Quichua JOB 1 Bible Online

JOB 1 - Chimborazo Highland Quichua bible

JOB 1

¹Uz llajtapimi Job shuti runa causarca. Paica, ima pandata mana ruraj, allita ruraj, Diostapish manchaj, millaita ruranatapish p'iñajmi carca.

²Paica, canchis churicunata, quimsa ushushicunatami charirca.

³Paipaj haciendapica, 7.000 ovejacunatapish, 3.000 camellocunatapish, 500 yunta huagracunatapish, 500 burrocunatapish, cullqui jahua servijcunatapishmi yallitaj achcata charirca. Inti llujshin ladopi causajcunapuramantaca, paillami yallitaj charij carca.

⁴Paipaj churicunapish, paicuna huacharishca punllacunata pajtachishpaca, quiquin huasicunapimi jatun micuita charijcuna carca. Paicunapaj quimsa panicunatapish paicunahuan micuchun, ubyachunmi cayanaman cachajcuna carca.

⁵Chai jatun micui punllacuna tucurishca q'uipami Jobca paipaj tucui huahuacunapaj juchacunata anchuchichun utcata jatarishpa, Diosman animalcunata cushpa huañuchishpa tucuita rupachij carca. Jobca, ñuca huahuacunaca imapi juchallircallapishchari, Diostapish p'iñashpa paicunapaj shungupi c'amircacunallapishchari yuyashpami, fiesta tucurishca q'uipaca chashna ruraj carca.

⁶Shuj punllami, Mandaj Diospaj churicuna pai Diospaj ñaupajpi ricurinaman shamujpica, Satanaspish paicunahuan shamurca.

⁷Chaipimi Mandaj Diosca Satanastaca cashna tapurca: — ¿Maimantataj shamungui? — nijpi Satanasca, Mandaj Diosmanca: — Allpa pachata ricushpa muyushpami shamuni — nishpa cutichirca.

⁸Chashna nijpimi Mandaj Diosca, Satanastaca: — Allpa pachapica ñucata servij Job shinaca pi shujtaj mana tiyanchu. Paica ima pandata mana ruraj, allita ruraj, ñucatapish manchaj, millaita ruranatapish p'iñajmi — nircami.

⁹Shina nijpimi Satanasca, Mandaj Diostaca cashna nirca: — Chai Jobca, can Diostaca mana yangamanta manchanchu.

¹⁰¿Manachu canllataj paitapish, paipaj familiacunandij, tucui imalla charishcacunatapish ama tuparichunllapish nishpa jarcaracungui? Paipaj maquihuan imata rurajpipish achcatamari bendiciangui. Chaimantami paipaj charinacunaca, allpapica yallitaj mirarishca.

¹¹Shina cajpipish cunanca cambaj maquita chutashpa pai imalla charishcacunata quichuiri, manachu cantaca ñahui ñahui millai shimihuan c'amin imami, ricungui — nircami.

¹²Shina nijpimi Mandaj Diosca, Satanastaca cashna nirca: — Riqui, pai imalla charishcacunaca cambaj maquipimi, ashtahuanpish paillata ama cambaj maquihuan tuparingui — nijpi Satanasca, Mandaj Diospaj ñaupajmanta llujshishpa rircallami.

¹³Shuj punlla Jobpaj churicunapish, ushushicunapish paicunapaj punta huauquipaj huasipimi micucurcacuna, vinotapish ubyacurcacuna.

¹⁴Paicuna chaipi cajpimi, shuj runaca Jobpajman chayamushpaca, cashna nishpa huillarca: — Ñucanchijca, huagracunahuanca yapucurcanchijmi. Chai yapucun c'uchullapitajmi, burrocunatapish michicurcacuna.

¹⁵Chaimantaca ñapish sabeocuna shamushpaca, animalcunatapish quichushpa, cullqui jahua canta servijcunatapish espadahuan huañuchishpami rincuna. Chaita canman huillangapajca, ñucallamari quishpirimuni — nishpami huillarca.

¹⁶Chai runa manaraj tucui huillajpimi, shujtaj runa chayamushpaca cashna nirca: — Taita Diospaj ninami jahua pachamanta urmashpa ovejacunatapish, michijcunatapish tucui rupachin. Chaita huillangapajca ñucallamari quishpirimuni — nishpami huillarca.

¹⁷Chai runa manaraj tucui huillajpimi, shujtaj runa chayashpaca cashna nirca: — Quimsa mirga caldeocuna chayashpami, camellocunata aisashpa rincuna, cullqui jahua canta servijcunatapish espadahuanmi huañuchincuna. Chaita huillangapajca, ñucallamari quishpirimuni — nishpami huillarca.

¹⁸Chai runa manaraj tucui huillajpimi, shujtaj runa chayashpaca cashna nirca: — Cambaj churicunapish, ushushicunapish paicunapaj punta huauquipaj huasipimi micucurcacuna, vinotapish ubyacurcacuna.

¹⁹Chaimantaca ñapish shitashca pambamanta jatun acapana shamushpa, huasi esquinacunapi huajtarishpa cuyuchijpimi, cambaj churicunataca huasi llapishpa huañuchirca. Chaita huillangapajca, ñucallamari quishpirimuni — nishpami huillarca.

²⁰Chaimantaca Jobca jatarishpami, paipaj churanatapish lliquirishpa, uma ajchatapish rasparishpa, pambapi cungurishpa Diosta adorashpa,

²¹cashna nirca: — Ñuca mamapaj huijsamantaca lluchullatajmi huacharircani, lluchullatajmi allpamanca tigrana cani. Mandaj Diosllatajmi curca, Mandaj Diosllatajmi quichun. Mandaj Diosca alli nishca cachun — nircami.

²²Chai tucui llaquicuna shamujpipish, juchata mana rurarcachu, Mandaj Diostapish ima millaita mana rimarcachu.