Read Chimborazo Highland Quichua JOB 10 Bible Online

JOB 10 - Chimborazo Highland Quichua bible

JOB 10

¹Ñuca almaca, ñuca causaihuanca ñamari shaicushca. Caitaj llaquicunataca huillacushallami. Ñuca almapi huacaihuan huillacushallami.

²Taita Diostaca cashna nisha: Ama llaquiman cachahuaichu, ñucahuan imamanta p'iñarishcata ricuchihuayari.

³¿Cambaj maquihuan rurashcallatataj p'iñashpa llaquichishpa, canta mana manchajcunataraj allipi charinaca, canpica allichu yuyachin imatagari?

⁴Canca manamari huañujlla runapaj ñahui luluncunata shina charinguichu. Canca mana runa ricucuj shinalla ricunguichu.

⁵Cambaj causai punllacunaca, runapaj causai punllacuna shinalla cajpichu, mana cashpaca cambaj huatacunaca huañujlla runacunapaj huatacuna shinalla cajpichu.

⁶¿Imamantataj ñuca millaita rurashcataca, alli yachasha ninguiyari? ¿Imamantataj ñuca juchataca, callarishpa mashcanguiyari?

⁷Ñuca canta manchaj cashcataca, canllataj yachanguimi. Cambaj maquimanta pi mana quishpichi tucuipaj cashcatapish yachanguimi.

⁸Ñucataca cambaj maquicunahuanmi sumajta rurarcangui. ¿Chashna rurashca jahuachu cashna llaquichihuangui?

⁹Mangata shina ñucata rurashcataca yuyariyari. ¿Maitataj allpallamantajca tigrachinguiyari?

¹⁰Ñucataca lecheta shina tallishpamari, quezota shina cuajarcangui.

¹¹Ñucamanca caratapish, aichatapishmari churachircangui. Tullucunatapish, yahuar purina angucunahuanmari ahuashpa churarcangui.

¹²Llaquishpami ñucamanca causaitapish curcangui. Canmari ñuca samaitaca huaquichircangui.

¹³Cai tucuita rurashcataca, cambaj shungupimi huaquichishpa charicungui. Chaicunaca cambaj c'uchupi cashcataca yachanimi.

¹⁴Ñuca juchata rurashcataca, canllataj ricucushcanguimi. Chaimanta ñucataca ima millaita mana ruraj jucha illaj cashcataca ama yuyanguichu.

¹⁵Ñucaca mana alli cashpaca, ¡aij imachari tucusha! Cashcata ruraj cashpapish, umallatapish mana alzashachu. Cunanca cashna llaquichijpi pinganaihuan huañucunimi.

¹⁶Ñuca umata alzajpica, león shinamari japingui. Japishpaca cutinllatajmi ñucapica, ima mancharinata rurangui.

¹⁷Ñucata llaquichishpa ricunatami cutin allichicungui. Manchanayaj soldadocunata shinami cambaj p'iñarinataca ñucapajca mirachicungui.

¹⁸¿Imapajtaj ñucataca huijsa ucumantaca llujshichircanguiyari? Ñuca huañushca cajpica, pipish mana ricunmanchu carca.

¹⁹Ñucaca mana huacharishca shinami caiman carcani. Huijsamantaca pambana jutcuman apashcami caiman carcani.

²⁰Ñuca causai punllacunaca ashallamari, ama ashtahuan llaquichihuaichu. Ashallatapish cushicungapaj saquihuayari.

²¹Rishpaca ña manataj tigrashaca, huañui tiyan chai manchanana, amsa pachaman manaraj rishpa ashallatapish cushicuchun saquihuayari.

²²Imapish mana allichishca tiyaj, huañuna amsa pachaman, chaipi tiyaj achijpish manchanana amsallataj caj pachamanca amaraj cachahuaichu nircami.