Read Chimborazo Highland Quichua JOB 13 Bible Online

JOB 13 - Chimborazo Highland Quichua bible

JOB 13

¹Riquichij, cai tucuita rurashcacunataca, ñuca ñahuihuantajmi ricushcani. Ñuca rinrinhuantaj uyashpami, yuyaita japishcani.

²Cancuna yachashcataca, ñucapish yachanillatajmi. Cancunaca mana ñucata yalli yachajcunachu canguichij.

³Ashtahuanpish ñucaca Tucuita Rurai Tucuj Dioshuanca rimaimanmi. Taita Dioshuanca yuyaita japinata munaimanmi.

⁴Manataj llullanichu, cancunaca llullashpa pandachijcunami canguichij. Cancunaca mana jambinata yachaj jambijcunami canguichij.

⁵Cancunaca upajlla saquirishpachari, alli canguichijman. Chashnami cancunaca, yachaj cashcata ricuchinguichijman.

⁶Chaimanta cunanca ñuca yuyashcata alli uyaichij, ñuca rimashcata alli uyashpa yuyaita japichij.

⁷¿Taita Diosmantaca millaita rimanguichijmanchu? ¿Paimantaca pita umanguichijmanchu?

⁸¿Taita Diosta allipi saquingapajca, maijantapish ñahuita ricushpalla imata ninguichijmanchu? ¿Cancunaca Diosmanta shayarishpa rimanguichijmanchu?

⁹¿Cancunataca pai ricuchun munanguichijmanchu? ¿Paitaca shuj runata chanzata ruraj shina chanzata rurashun yuyanguichijmanchu?

¹⁰Pitapish ñahuita ricushpalla imata nijpica, paica cancunataca llaquichingatajmi.

¹¹Pai jatun Diosca, cancunataca manchachinmantajmi. Jatun manchaita cancunapaj jahuapi shitanmantajmi.

¹²Yuyaita japina sumaj shimicunata cancuna rimashcaca ushpallami. Cancunapaj baluartecunapish, lodohuan rurashca baluartecunallami.

¹³Ñuca rimashcata alli uyahuaichij. Chai q'uipaca ima tucushpapish, ima tucushallatajchari.

¹⁴¿Imamantataj ñuca aichataca ñuca quirucunallahuantaj anchuchishari? ¿Ñuca causaitaca imapajtaj ñuca maquipica charishari?

¹⁵Riquichij, pai huañuchina cajpipish, paillapimi shuyanataca charini. Shina cajpipish ñucaca paipaj ñaupajpica, ñuca causaita ricuchishpa mitsarishatajmi.

¹⁶Paillatajmi ñucataca quishpichinga. Paita mana manchajca, paipaj ñaupajmanca manataj yaicungachu.

¹⁷Ñuca imalla yuyashcata alli uyahuaichij. Ñuca huillashcacunataca, cancunapaj rinrinman yaicuchichij.

¹⁸Riquichij, ñuca shimihuan cunan mitsarishpa ñuca allipi saquirinataca, shuj yuyaimi cani.

¹⁹¿Pitaj ñucahuanca rimanacui tucungari? Cunan ñuca upallashpaca, huañushami.

²⁰Ñucataca cai ishquillatami rurachun mañani. Chaicunata mana rurajpica, canmantaca ñuca ñahuita mana pacashachu.

²¹Cambaj maquita ñucamanta anchuchihuai, jatun manchaihuan ama manchachihuaichu.

²²Chai q'uipaca can cayajpica, cutichishallami. Mana cashpaca ñuca rimasha, can cutichihuangui.

²³Ñucaca ¿mashna cutitaj millaita rurashcaniyari, mashna juchacunatataj chariniyari? Canta imallapi mana cazushcata, imalla juchata rurashcata yuyachihuayari.

²⁴¿Imamantataj cambaj ñahuitaca pacanguiyari? ¿Imamantataj ñucataca canta p'iñaj cashcata yuyanguiyari?

²⁵¿Shitashca p'angataca ñutunguichu? ¿Chaquishca ujshataca catiranguichu?

²⁶¿Imapajtaj ñucata llaquichinataca quillcanguiyari? ¿Imapajtaj chairaj cashpa, juchata rurashcataca apachinguiyari?

²⁷Chai jahuamari ñuca chaquicunataca, jutcushca caspipi canichingui. Chashna rurashpamari, ñuca causaitaca callarishpa ricungui. Ñuca chaquicuna sarunatapish jarcashcanguimi.

²⁸Ñuca aichaca ismushpamari tucuricun. Churanata polillashca shinami tucuricuni.