Read Chimborazo Highland Quichua JOB 14 Bible Online

JOB 14 - Chimborazo Highland Quichua bible

JOB 14

¹Huarmimanta huacharishca runaca, asha punllacunallata causana cashca jahua, llaquihuan shaicushcallami causan.

²Sisa ricurijpi p'itishca shinallami tucun. Llandu ricurishcahuan chingarij shinallami tucun.

³¿Chashna cashcata yachashca jahuachu cambaj ñahuihuan chapacungui? Imalla rurashcata canman ricuchichunpishmari cayangui.

⁴¿Juchata rurashcataca pi pichari tucuipajchu? Pitaj chaitaca pichari tucungari.

⁵Paipaj causaica asha punllacunacamallamari. Pai causana quillacunapish cambaj c'uchullapimari. Can churashcamantaca, mana yallitaj causangachu.

⁶Paita can cungarijpica, paica huañungallami. Cullqui jahua trabajaj runa punlla tucurijta shuyacuj shinami shuyanga.

⁷Yurataca p'itishpapish retoñangami yuyanchijrajmi. P'itishca cashpapish, mushuj yura cutin huiñanrajmi, retoñocunaca manataj illanchu.

⁸Allpa ucullapitaj sapi chaquishpapish, allpallapitaj tronco ismushpapish,

⁹yacuta tsupashpaca, cutin verdijlla tucunllami, mushuj yurata tarpushca shina p'angasapami tucun.

¹⁰Ashtahuanpish runaca huañushpaca, p'itishca shinami saquiringa. Runaca ña chingarishpaca, maipi mana ricurinchu.

¹¹Mama cuchamanta yacu rij shina, jatun yacu asha asha chaquirij chingarinllami.

¹²Chashnami runa huañushpaca, mana cutinca jatarin. Jahua pacha tucuringacama manataj rijcharingachu, dormicushcamantaca manataj jataringachu.

¹³Maijanpish cantaca Seolpi ñucata pacachun nijpichari. P'iñarishcamanta can alli tucungacamaca, chaipi pacashpachari alli canguiman. Ashacama shuyashpapish, ñucataca cutin yuyarishpachari alli canguiman.

¹⁴¿Runaca huañushpaca, cutin causaringachu? Ñuca causashcacamaca ñucapaj quishpirina chayamungacama, punllanta shuyacushallami.

¹⁵Chaipimi ñucata cayajpica, ñucaca cutichisha. Chaipica cambaj maquihuan rurashcataca c'uyanguimi.

¹⁶Ashtahuanpish cunanca ñuca purishcatamari yupangui. Ñuca juchamantaca manamari samachisha ninguichu.

¹⁷Ñuca canta mana cazushcataca costalpimi sellashpa charicungui. Ñuca millaita rurashcataca sirashpami charicungui.

¹⁸Urcu suchurijpica, tucuimi chingarin. Yacu rumi urcucunapish, pai tiyacushcamanta urmanmi.

¹⁹Achca yacu shamushpa allpacunata apajpica, rumicunapish mucurishpa tucurinllami. Runa shuyacushcatapish chai shinallata tucuchinguillami.

²⁰Canca huiñaitami runata yalli sinchi cangui, paica chingarijllami. Paipaj ñahuita maucayachishpaca, minchacama nishpa cachanguillami.

²¹Paipaj huahuacuna alli nishca cajpipish, mana cashpaca yangalla cajpipish, mana yachangachu.

²²Ashtahuanpish paipaj aichaca, paipaj jahuallapitajmi ismunga. Paipaj almaca jatuntami llaquiringa nircami.