Read Chimborazo Highland Quichua JOB 15 Bible Online

JOB 15 - Chimborazo Highland Quichua bible

JOB 15

¹Temán pueblomanta Elifaz runaca cashnami cutichirca:

²“¿Yachaisapa runaca ima imatapish yangamantachu rimarinman, paipaj huijsapipish huairallatachu jundachinman?

³¿Yanga shimicunallatachu rimarinman, manapish imata yuyachij shimicunallatachu rimarinman?

⁴Canpish manchaitaca cungaringuillamari. Taita Diospaj ñaupajpi mañanataca, ñamari tucui cungaringui.

⁵Ashtahuanpish cambaj shimillatajmari millaita rurashcataca huillarca. Canca, chai yachaj tucushca runacunapaj rimaitamari agllashcangui.

⁶Cambaj shimillatajmi cantaca llaquipi churanga, mana ñucachu cantaca llaquipi churasha. Cambaj shimillatajmi cantaca llaquichinga.

⁷¿Canca Adanpaj ñaupachu huacharircangui? ¿Mana cashpaca urcucuna manaraj rurajpichu, canca ña rurashca carcangui?

⁸¿Canca pacallapi Dios rimashcatapish uyarcanguichu? ¿Canllamanchu alli yachaitaca curca?

⁹¿Canca ñucanchij mana yachashcataca imatataj yachanguiyari? ¿Canca ñucanchij mana yuyashcatachu yuyangui?

¹⁰Ñucanchijpurapica puzu umacuna, ña yuyaj runacunatamari charinchij. Paicunaca cambaj yayapaj causai punllacunapi causajcunatapish yalli alli yachajcunamari.

¹¹¿Canca Taita Dios cushicuita cushcatapish, mishquijlla shimicunahuan rimashcatapish manachu munangui?

¹²¿Imamantataj cambaj shungutaca, paimanta caruyachingui? ¿Imamantataj cambaj ñahuicunataca sipungui?

¹³¿Imapajtaj Taita Diostaca c'ariyashpa rimanguiyari? ¿Imapajtaj shimi llujshishcata rimanguiyari?

¹⁴¿Runaca mapa illaj cangapajca imatagari? Huarmimanta huacharishca runa, ¿ima shinataj cashcata ruraj ricuringari?

¹⁵Riqui, paipaj angelcunapipish manamari shunguta churanchu. Jahua pachapish paipaj ricuipica, manamari mapa illajchu.

¹⁶Millaita ruraj, mana cazuj runacarin yacuta ubyaj shinami millaita ruran.

¹⁷Ñuca huillashcata uyahuayari. Ñuca ñahuihuan ricushcatami huillasha nini.

¹⁸Yachaisapacuna ñucanchijman huillashcata, paicunapaj ñaupa yayacuna yachachishcata ñucanchijman parlashcatami huillagrini.

¹⁹Cai llajtataca chai ñaupa yayacunamanmi cushca carca. Paicuna causacun llajtataca shujtajcunaca, mana pasai tucurcacunachu.

²⁰Diosta mana manchaj runaca tucui paipaj causai punllacunami nanaihuan musparin. Millaita ruraj runapaj causai huatacunaca pacashcami.

²¹Paipaj rinrincunapica c'ulun nishpa manchachijcunami uyarin. Pai charishcacunatapish shuhua shamushpaca, shuhuashpa ringallami.

²²Paica manchanana amsamanta tigranatapish mana crinchu. Paitaca japishcahuan espadahuan huañuchinallami causan.

²³Micunata charishca jahuallatajmi ¿micunaca maipitagari? nishpa musparishpa purin. Manchanana amsa punlla allichishca shuyacujtapish yachanllatajmi.

²⁴Llaquicunapish, huacaicunapish muspachingami. Paita llaquichinamanca, jatun mandaj macanacungapaj allichirishca shinami shamungacuna.

²⁵Paillatajmi Taita Diostaca maquita alzarca. Paillatajmi Tucuita Rurai Tucuj Diostaca, jatun tucushpa c'ariyarca.

²⁶Paica cungata alzashpami, Diosta llaquichinaman callparca. Manchanayaj escudocunahuan jarcarishpa, espada aisashcami callparca.

²⁷Ñahuicuna chingarijtami huirayarca. Paipaj huijsa carapish huarcurishcami carca.

²⁸Paica shitashca pueblocunapipish, rumi montoncunalla siricushca shitashca huasicunapipishmi causarca.

²⁹Mana cutin charij tucungachu, pai imalla charishcacunapish mana unicama tiyangachu. Pai sumaj cashcapish cai pachapica, mana mirangachu.

³⁰Manchanana amsamantapish mana quishpiringachu. Ninami paipaj ramacunataca chaquichinga. Dios paipaj shimihuan p'ucujllapimi huañunga.

³¹Charijyanata yuyajca yangacunapica, ama shunguta churachun. Pai japina cashcataca yangallatatajmi japinga.

³²Paitaca manaraj p'itina punlla tucujpimi p'itinga. Paipaj retoñocunapish mana verdeyangachu.

³³Uva shinami jayaj granocunaca chingaringa. Paipaj sisacunapish olivo sisa shinami chaquirishpa urmanga.

³⁴Diosta mana manchajcuna tandanacunataca, chingachishcami canga. Camaricunahuan charijyashca huasicunataca, ninami tucuchinga.

³⁵Nanaitami chichurcacuna, millaitami huacharcacuna. Paicunaca umana yuyaillami causancuna” nircami.