Read Chimborazo Highland Quichua JOB 16 Bible Online

JOB 16 - Chimborazo Highland Quichua bible

JOB 16

¹Jobca cashna nishpami cutichirca:

²Achca cutinmi cai shinataca uyashcani. Cancunaca cushichijcunami canchij nishpapish, p'iñachijcunallami canguichij.

³¿Chushajlla shimicunaca manatajchu tucurigrin imatagari? Mana cashpaca ¿imata yuyashpataj ashtahuan rimaringui?

⁴Cancunapaj aicha ñuca aicha shina tucushca cajpica, ñucapish cancuna shinallatajmi rimaiman. Llaquichij shimicunahuanmi rimaiman. Umata cuyuchishpachari ricucuiman.

⁵Ashtahuanpish ñucaca sumajta rimashpachari cushichiman. Sumaj shimicunahuanchari cancunapaj nanaitaca samachiman.

⁶Rimarijpipish ñuca nanaica mana samarinchu. Upalla cajpipish nanacunllatajmari.

⁷Ashtahuanpish cunanca canmi ashtahuan shaicuchingui. Ñucahuan cajcunatapish canmi tucuicunata anchuchingui.

⁸Canmi ñuca aichataca muruyachishcangui. Ñuca irquiyashcataca, ñuca ñahuillatajmi ricuchicun.

⁹Pai p'iñarishpami, ñucataca mirga mirgata rurarca, ñucataca p'iñarcami. Quirucunahuan canirishpami ñucataca llaquichirca. Ñucata p'iñaj runaca tujsij shina llaquichingapajmi, paipaj ñahuicunahuanca chapararca.

¹⁰Ñucata c'amishpami rimarcacuna, quijadoscunapi huajtaj shinami chugrichircacuna. Tucuicuna huaicashpami llaquichircacuna.

¹¹Taita Diosca ñucataca llullajcunamanmi cushca, paita mana manchajcunapaj maquipimi churashca.

¹²Ñucaca sumajtami causarcani. Shina cajpipish llaquichircami. Ñucataca cunga tullupi lutsashpami, mirga mirgata rurarca. Paipaj yuraj señalta rurashpami, puntajlla caspicunahuan shitarca.

¹³Ñucataca paipaj puntajlla caspicunata shitajcunami muyundijmanta shitarcacuna. Ñuca riñoncunata chaupishpapish, manataj perdonarcachu. Ñuca hielpish pambapimi tallirirca.

¹⁴Ñucataca huashan huashanmi llaquichishpa catirca. Jatun rucu runa shina callpamushpami, ñucataca japirca.

¹⁵Cañamazuta sirashpami, ñuca cara jahuata churarcani. Ñuca umatapish allpapimi pambarcani.

¹⁶Ñahui p'unguijtami huacani. Ñahui zuyuyashpa mana ricui tucunichu.

¹⁷Ñuca maquicunahuan ima millaita mana rurashca jahua, chuya shunguhuan paita mañashca jahuami chashna ruran.

¹⁸¡Allpalla, ñuca yahuarta ama tapahuaichu! Ñucallatajca, mana caparishpa huillasha ninichu.

¹⁹Ashtahuanpish ñucamanta huillajca, jahua pachapimi. Ñuca imalla rurashcata huillajca, jahuapimi tiyacun.

²⁰Ñucata rimajcunaca ñucahuan tandalla purijcunallatajmi. Ashtahuanpish Taita Diospaj ñaupajpimi, huiquita shitashpa mañasha.

²¹¡Runaca shujtaj runahuan rimanacucuj shinalla Taita Dioshuan rimanacui tucujpichari alli canman!

²²Ashtahuanpish yupashca huatacunarajmi chayamunga. Ñucaca ña mana tigrangapajmi, ñanta japigrini.