Read Chimborazo Highland Quichua JOB 2 Bible Online

JOB 2 - Chimborazo Highland Quichua bible

JOB 2

¹Shujtaj punllami, Mandaj Diospaj churicunaca, pai Diospaj ñaupajpi ricurinaman shamurcacuna. Chai punllapish Satanasca paicunahuan shamushpami, Mandaj Diospaj ñaupajpi ricurirca.

²Chaimantami Mandaj Diosca, Satanastaca: — ¿Maimantataj shamungui? — nishpa tapurca. Shina nijpica chai Satanasca, Mandaj Diostaca cashnami nirca: — Ñucaca, tucui allpa pachata muyushpa purishpami shamuni — nircami.

³Shina nijpimi Mandaj Diosca, Satanastaca cashna nirca: — Tucui allpapica, ñucata servij Job shinaca pi shujtajca mana tiyanchu. Paica, ima pandata mana ruraj, allita ruraj, ñucatapish manchaj, millaita ruranatapish p'iñajmi. Paitaca, can ricungaraicu llaquichijta saquichun nijpimi, yangamanta llaquichichun saquircani. Chashna llaquichijpipish, cunancama ima pandata mana rurashcachu — nircami.

⁴Chashna nijpimi Satanasca, Mandaj Diostaca cashna nirca: — Runaca, carapuraca cambiangallatajmari. Mana huañusha nishpaca, tucui charishcahuanmi paipaj causaitaca quishpichisha ninman.

⁵Ashtahuanpish cunanca cambaj maquita chutashpa paipaj tullupipish, aichapipish unguchiyari. Manachu cantaca cambaj ñaupajllapitaj millaita rimashpa c'amin imami, ricungapaj — nircami.

⁶Shina nijpimi Mandaj Diosca Satanastaca: — Riqui, paica cambaj maquipimi. Shina cajpipish, paipaj causaillata amaraj tucuchingui — nircami.

⁷Chashna nijpimi Satanasca, Mandaj Diospaj ñaupajmanta rishpaca, Jobtaca chaqui plantamantaca uma coronacama carachata churashpa chugrichirca.

⁸Chaimantami Jobca ushpapi tiyarishpa mirga callanata japishpa, chaihuan aspirirca.

⁹Chaita ricushpami paipaj huarmica: — ¿Chashna llaquipi cashca jahuachu mana c'ariyashpa rimangui imatagari? Diosta c'amishpa huañuillari — nircami.

¹⁰Chashna nijpimi Jobca: — Canca chai upa muspa huarmicuna shinamari rimangui. Dios cushca allicunataca chasquircanchijmi. ¿Maitataj llaquicunatapish mana chasquishunri? — nircami. Chai tucui llaquicunata apacushpapish, Job runaca mana ima millaita rimashpa juchata rurarcachu.

¹¹Job runahuan alli apanacuj quimsa runacunaca, shujca Temanmanta Elifaz shutimi carca. Caishujca, Suamanta Bildad shutimi carca, caishujca Naamamanta Zofar shutimi carca. Chai runacunaca, Job llaquita apacun nijta uyashcahuanmi, quiquin llajtapi causacushcamanta tandanacushpa llaquijcuna cashcata ricuchingapaj cushichinaman shamurcacuna.

¹²Chai runacunaca, carumanta ricushpaca mana rijsircacunachu. Chaimantaca caparirishpami huacarcacuna. Shinallataj churanacunatapish lliquirishpa, paicunapaj uma jahuacunapipish allpatami tsiraparircacuna.

¹³Chashna jatun nanaihuan cajta ricushpami, maijan mana imata rimashpa canchis punllata, canchis tutata pai tiyacun c'uchu pambapi tiyacurcacuna.