Read Chimborazo Highland Quichua JOB 20 Bible Online

JOB 20 - Chimborazo Highland Quichua bible

JOB 20

¹Naamamanta Zofarca cashna nishpami cutichirca:

²“Ñuca yuyaicunallatajmi ñucataca rimachigrin. Chaimantami ñucaca utca cutichisha nini.

³Ñucata mana alli nishpa rimashcatami uyashcani. Chaimantami ñuca charishca alli yuyaicunallataj ñucataca rimachin.

⁴Cai pachapi runata churashcamantapacha, huiñaita cashna cashcataca ¿manachu yachangui?

⁵Millai runacunapaj cushicunaca utca tucurijllami, Diosta mana manchajcunapish ashacamallami cushicun.

⁶Jahua pachaman chayajta jatun tucushpapish, umahuan p'uyucama tupashpapish,

⁷paipaj millanana mapa shinallataj huiñaipaj chingarinallami. Paita ricujcunapish: “¿Paimantaca imataj saquirishca?” ningacunami.

⁸Muscui shina chingarijpica, manataj japi tucungachu. Tuta muscuipi imata ricushca shina chingarinallami.

⁹Paita ricujcunapish cutinca mana ricungacunachu. Pai maipi cashcatapish cutinca mana rijsingachu.

¹⁰Paipaj huahuacunaca, huajchacunatami mañangacuna. Paipaj maquillatajmi imalla shuhuashcataca tigrachinga.

¹¹Paipaj tullucunaca sinchiraj cajpimi, allpapi pambashca sirigringa.

¹²Mana allita paipaj shimipi mishquichishca cajpi, c'allu ucullapi pacalla charicushca cajpi,

¹³allimi yuyashpa mana saquishca cajpi, paipaj shimi ucullapi charishca cajpica,

¹⁴chai micunaca paipaj huijsa ucupica shujtajyangami. Paipaj huijsa ucupica huañuchij culebrapaj hiel shina jayajmi tucunga.

¹⁵Achca charinacunata millpushca cashpapish, shungu tigrangami. Taita Diosllatajmi chaicunataca, paipaj huijsamanta llujshichinga.

¹⁶Huañuchij culebrapaj jayaj venenotami tsupanga, culebrapaj c'allumi huañuchinga.

¹⁷Uchilla yacucunatapish, jatun yacucunatapish, jatun yacucuna shina llujshicuj mishquitapish, lechetapish mana ashtahuan ricungachu.

¹⁸Pai imalla rurashcamanta allicunata japishcatapish tigrachingami. Chaicunataca mana millpungachu, mana cushicungachu.

¹⁹Huajchacunata llaquichishcamanta, quichushpa apashcamanta, mana huasichishpapish, quichushpalla huasiyuj tucushcamantaca,

²⁰paipaj huijsapica manataj sajsangachu. Pai imalla charinata munashcataca, manataj saquichingachu.

²¹Pai mana micushcapish, ima mana saquiringachu. Chaimanta pai imalla charishcacunapish mana unicama tiyacungallachu.

²²Yallitaj charijyashcapimi, jatun llaqui japinga. Tucui millaicuna shamushpami, tucuita quichungacuna.

²³Paipaj huijsapi jundachinapaj tiyacujpica, Taita Dios p'iñarishpami, paipaj jahuapica ninata cachanga. Chai ninataca paipaj jahuapipish, pai micuna jahuapipishmi tamyachinga.

²⁴Fierrohuan huañuchicunmanta miticurijpipish, bronce arcocunahuanmi japichinga.

²⁵Paipaj cuerpotaca puntajlla caspimi tujsishpa llujshinga. Achij nicuj caspi puntami hielta chaupishpa llujshinga. Jatun manchaipishmi paitaca japinga.

²⁶Paipaj charinacunaca jatun llaquipi tucurinapajmi tiyacun. Mana p'ucushpa japichishca ninami chaicunataca rupachishpa tucuchinga, paipaj huasipi imalla tiyajtapishmi chingachinga.

²⁷Paipaj juchataca jahua pachami ricuchinga. Cai pachaca paita llaquichingapaj jataringami.

²⁸Paipaj huasipi tiyaj retoñocunaca apashcami cangacuna. Pai p'iñari punllaca, urata janajtami tsiraparingacuna.

²⁹Taita Diosca paita mana manchaj runapajca, chaicunatami allichishcata charicun. Paipaj shimihuantajmi chaicunataca cusha nishca” nircami.