Read Chimborazo Highland Quichua JOB 29 Bible Online

JOB 29 - Chimborazo Highland Quichua bible

JOB 29

¹Jobca cutinllataj yuyarishpami cashna nirca:

²Sarun quillacunapi ñuca cashcamanca, Taita Dios ñucata cuidacushcapi ima shina cashcamanca ¿pitaj ñucataca tigrachihuangari?

³Paipaj lamparata ñuca uma jahuapi churashpami achijyachij carca. Chai luzhuanmi amsapi cashpapish, purij carcani.

⁴Ñuca chairaj cajpica, Taita Diosllatajmi allicunata cushpa, ñuca huasitapish cuidaraj carca.

⁵Tucuita Rurai Tucuj Dios ñucahuan cajpica, ñuca huahuacunapish ñuca c'uchupimi causacurcacuna.

⁶Ñuca chaquicunataca lechehuanmi maillaj carcani. Yacu rumipish ñucamanca jatun yacuta shinami aceiteta cuj carca.

⁷Ima rurashcacunata ricungapaj pueblo punguman llujshishpapish, plazapimi ñucapajca jatun tiyarinata allichij carcani.

⁸Chairajcuna ñucata ricushpaca miticurcacunami. Yuyajcuna ricushpapish shayarijcunami carca.

⁹Mandajcunapish mana imata rimai tucujcunachu carca. Ashtahuanpish maquihuanmi shimita taparijcuna carca.

¹⁰Tucuicunamanta puntapi caj mandajcunapish upallarijcunami carca. Paicunapaj c'allucunaca shimi ucupimi llutarij carca.

¹¹Ñucata uyajcunaca ñucataca: Cushicuj runa nijcunami carca. Ñucata ricujcunapish, ñuca ima shina cashcatami huillajcuna carca.

¹²Yaricaihuan capariricujmanca ñucamari cararcani. Yaya mama illajtaca ñucamari ayudarcani.

¹³Chingarigrijta ayudashcamantami, ñucataca bendiciarca. Viuda huarmi huacacujpipish cushichircanimi.

¹⁴Ñucaca cashcata rurashcahuanmi churarij carcani. Chaimi ñucamanca pillurinata curca. Ñucapajca allita ruranaca, jahua churanata churarina shina, achij nicuj diademata churarina shinami carca.

¹⁵Ñahui mana ricujpajca, ricuj ñahui shinami carcani. Chaqui p'aquirishcapajca, alli chaqui shinami carcani.

¹⁶Imata mana charijcunamanca, yaya shinami cararcani. Imata mana allichipaj shina cajpipish, alli ricushpami yachaj chayaj carcani.

¹⁷Millai runataca, quirucunatami p'aquij carcani. Imata quichushca cajpipish, quirucunahuan chariracujtami cacharichij carcani.

¹⁸Ñucaca cashnami yuyarcani: Ñuca quiquin tazinllapitajmi huañusha, ñuca causai punllacunataca t'iyu allpata shinami mirachisha yuyarcanimi.

¹⁹Ñuca sapica achca yacu c'uchupimi carca, ñuca ramacunapipish achca shullami tiyarca.

²⁰Ñucaca ashtahuan ashtahuan alli nishcami tucurcani. Ñuca maquihuanca arcotaca, sinchitami charircani.

²¹Ñuca rimajpica upallashpami, ñuca rimachun shuyajcuna carca. Ñuca cunashcacunatami uyanachircacuna.

²²Ñuca rimajpica, mana tigrachircacunachu. Ñuca yuyachishcaca, paicunapimi yacuyarca.

²³Ñucataca tamyata shinami shuyajcuna carca. Q'uipa tamyata shimi pascashcahuan shuyacuj shinami carca.

²⁴Paicunahuan ñuca asijpipish, mana crircacunachu. Ñucataca mana pi pingachircacunachu.

²⁵Paicuna imalla rurashcataca, ñucami ricuj carcani. Ñucaca paicunapaj chaupipica, mandaj shinami tiyarij carcani. Ñucaca soldadocunata jatun mandaj shinami causarcani. Ñucaca huacacujcunata cushichijmi carcani.