Read Chimborazo Highland Quichua JOB 30 Bible Online

JOB 30 - Chimborazo Highland Quichua bible

JOB 30

¹Ashtahuanpish cunanca ñucapaj q'uipacunamari asicuncuna. Paicunapaj yayacunataca, ñuca animalcunata cuidaj allcucunahuanpish mana churaimanchu carcani.

²Paicunapaj maquicunahuan fuerzarishcapish ¿imapajtaj valingari? Manamari ima fuerzata charincunachu.

³Huajcha caimanta, yaricaihuan caimantami sapalla purircacuna. Manchanana amsacunaman llaquinayaj shitashca pambacunaman rishpami, pacalla purijcuna carca.

⁴Yuracuna chaupipimi malvacunata tandarcacuna. Cunungapajpish enebro yura sapicunatami tandarcacuna.

⁵Tucuicunami carcushpa cachajcuna carca. Shuhuata shinami caparishpa catijcuna carca.

⁶Paicunaca yacu huaicu c'acacunapi, allpata jutcushcacunapi, rumi ucucunapimi causarcacuna.

⁷Ramacuna chaupipimi caparirijcuna carca. Cashacuna ucupimi tandanacujcuna carca.

⁸Paicunaca mana cazujcunapaj huahuacunami carca, shuti illaj runacunami carcacuna. Paicunapaj llajtapi causajcunapuramantaca yallitaj p'iñashcami carcacuna.

⁹Cunanca ñucami paicuna chanzata rurashpa asinapish, yuyachij shimicunata surcunapish tucushcani.

¹⁰Ñucata millanachishpami, ñahuipi ch'ucashpa caruyancuna.

¹¹Taita Diosmi paipaj huatashca anguta cacharishpa, ñucataca azotirca. Chaimantami ñuca ñahuipitaj cacharishca tucuncuna.

¹²Ñuca alli maqui ladomanca, achcacunami jatarircacuna. Paicunami ñucataca t'angashpa shitarcacuna. Ñucata llaquichingapajmi chingarina ñancunatapish allichircacuna.

¹³Ñuca purina ñantaca tucuimi chingachircacuna. Ñucataca llaqui tucujtami chaparacurcacuna. Paicunahuan macanacungapajpish, mana pi ayudarcachu.

¹⁴Ancho punguta shinami yaicumurcacuna. Ñuca llaqui jahuallapitajmi llaquichircacuna.

¹⁵Ñucata pandachijcunami tucurcacuna. Huaira shinami urmachishpa misharcacuna. Ñuca ima charishcapish, p'uyu shinallami chingarirca.

¹⁶Cunanca ñuca almaca yacuyacuj shinamari. Llaqui punllacunami ñucataca tucuchicun.

¹⁷Tutacunapish ñuca tullucunataca jutcucuj shinamari, ñuca nanaicunapish manataj samarinchu.

¹⁸Llaquicunami ñuca aichataca maucayachicun. Jahua churana cunga cuello shinamari sipicun.

¹⁹Paimi ñucataca lodopi singuchirca. Chaimanta cunanca allpa shina, ushpa shinallami cani.

²⁰Canta mañajpipish, manamari uyahuanguichu. Cambaj ñaupajpi ricurijpipish, manamari ricunachinguichu.

²¹Jatunta llaquichijmari ñucapajca tucushcangui. Cambaj sinchi maquihuan llaquichingapajmari catiracungui.

²²Ñucataca huairapi tiyachishpamari, jahuata cacharcangui. Ñuca causaitaca tucuimari yacuyachircangui.

²³Ñucata huañuiman can pushacujtaca yachanimi. Tucui causajcuna huañushpa chaiman richun cushca huasimanmi pushacungui.

²⁴Paipaj maquihuanca pambana jutcuman ama richunca mana jarcangachu. ¿Pai llaquichicujpica pambashcacunaca capariringacunachu?

²⁵Ñucaca, llaquita apacujmantaca huacarcanimi. Ñucaca imata mana charijtaca llaquircanimi.

²⁶Ñucapajca allita shuyacujpica, llaquirajmi shamurca. Achijta shuyacujpipish amsarajmi shamurca.

²⁷Ñuca tucui aichaca manchanayaj nanaihuanmi, chai tucui nanaicunaca manataj samarinchu. Ñucataca jatun llaqui punllacunami japishca.

²⁸Ñucaca manapish inti rupachijllapitajmi yanayashpa puricuni. Tandanacushcapipish caparishpami huillarcani.

²⁹Ñucaca chacalcunapaj huauquimi tucushcani, avestruzcunahuan ishqui purijmari tucushcani.

³⁰Ñuca aicha caraca yanayashpamari, tucui urmacun. Ñuca tullucunapish ruparishpa rauracunmari.

³¹Ñuca arpaca llaquilla tonota tocanami tucushca. Ñuca flautapish huacajcunapaj, cunga shinamari uyarin.