Read Chimborazo Highland Quichua JOB 33 Bible Online

JOB 33 - Chimborazo Highland Quichua bible

JOB 33

¹Chaimanta cunanca ñuca imalla yuyashcata uyai, Job. Ñuca imalla rimashcata alli uyahuai.

²Ñuca shimihuanmi cantaca rimagrini. Ñuca cungapi caj c'allumi cantaca rimanga.

³Ñuca yuyaicunami ñuca shungupi mana pandata yuyaj cashcata ricuchinga. Ñuca shimica mana llullashpami, imalla yachashcacunataca rimanga.

⁴Ñucataca Diospaj Espiritumi rurarca. Tucuita Rurai Tucuj Dios p'ucushpallami, causaitapish curca.

⁵Can cutichi tucushpaca cutichiyari. Imalla ninata alli yuyarishpa shayariyari.

⁶Can nishca shinallataj ñucaca, Diospaj randimi caipi cani. Ñucapish allpamanta rurashcallatajmi cani.

⁷Riqui, ñuca rimashcacunaca, cantaca mana manchachingachu. Ñuca maquipish, cantaca mana llaquichingachu.

⁸Canca ñuca uyacuitami rimarcangui. Ñuca rinrinhuantajmi cashna nijta uyarcani:

⁹Ñucaca ima mapa illajmi cani, ima mana allipish ñucapica mana tiyanchu. Ima millaita ruranatapish mana yachanichu. Ñucapica ima millaipish mana tiyanchu.

¹⁰Shina cajpipish paimi ñucataca, juchachinata mashcarca. Ñucataca paita p'iñajta shinami charicun.

¹¹Ñuca chaquicunatapish jutcu caspipimi canichirca. Ñuca imallata rurajta chaparacurcami nircanguimari.

¹²Riqui, can chashna nirishpaca, manamari allita rimarircanguichu. Diosca runata yalli cashcatami canmanca huillagrini.

¹³¿Ima nishpataj paitaca p'iñarishpa rimanguiyari? Pai yuyashcataca mana huillangallachu.

¹⁴Shina cashpapish Taita Diosca, runataca mana shuj layalla rimanchu. Shina cajpipish, runamari mana yuyaita japin.

¹⁵Runacunamanca camapi huañuita dormicujpi tuta muscuipi ricurishpami,

¹⁶rinrinllapi rimashpa, pai imata yuyashcataca ricuchin.

¹⁷Chashnami runacunataca mana allita ruracushcamanta saquichin, jatun tucushca canatapish anchuchinmi.

¹⁸Chashnami paica pambana jutcuman rinamantapish, espadapi huañunamantapish quishpichin.

¹⁹Maijancunataca tullucunapi manchanayaj nanaita churashpami, camallapitaj llaquichin.

²⁰Chai nanaihuanca tandatapish, mishqui micunatapish millanachishpa, mana micunachinchu.

²¹Paipaj aichaca chaquirishpa chingarinmi. Ñaupa mana ricurij cashca tullucunapish, jahuaman ricurinmi.

²²Paica pambana jutcuman rinallami tucun. Paica ñami huañuiman chayacun.

²³Alli rimajcunamanta agllashca runa tiyashpachari, runahuan Dioshuan chaupipi shayarishpa, runa imallata rurana cashcataca huillanman.

²⁴Chai runaca: Diosca canta llaquircami. Pambana jutcuman rinamantapish quishpichircami. Canca quishpirinata japircanguimi ninmanchari.

²⁵Chaimanta paipaj aichaca, llullu huahuapaj aichatapish yalli llullujlla tucushpami, chairaj cashca punllacunaman tigranman.

²⁶Taita Diosta pai mañajpica, paica c'uyanmanmi. Paipaj ñahuita ricushpa cushicunmanmi. Runataca cashcata rurajllatatajmi ruranga.

²⁷Taita Diosca runacunataca ricuracunmi. Shuj runa: Ñucaca juchatami rurashcani, allita ruranapaj randica, mana allitami rurashcani. Shina cashpapish, ima allita mana japishcanichu nijpica,

²⁸Taita Diosmi paitaca pambana jutcuman rinamanta quishpichinga. Chaimantami paica achijtapish ricushpa causanga.

²⁹Riquichij, Taita Diosca runataca ishqui cutin, mana cashpaca quimsa cutinpish chashna ruranllami.

³⁰Chashnami paitaca pambana jutcuman, mana cachashpa causajcunapaj luzhuan achijyachin.

³¹Job, ñuca rimashcata upalla uyahuai.

³²Ima yuyaicunata charishpaca cutichihuai. Ñucaman huillahuai, cantaca ima juchachina illaj cashcataca ricuchisha ninimi.

³³Mana cashpaca, ñucata upalla uyahuai. Alli yachaitaca ñucami canman yachachisha nini nircami.