Read Chimborazo Highland Quichua JOB 6 Bible Online

JOB 6 - Chimborazo Highland Quichua bible

JOB 6

¹Chaimantami Jobca cashna nishpa cutichirca:

²Ñuca llaquicunandij, nanaicunandij balanzapi churashpa pizajpichari.

³Chashna pizajpica, mama cuchapi tiyaj t'iyutapish yallimi pizanman. Chaimantami ñucaca c'ariyashpa rimarircani.

⁴Tucuita Rurai Tucuj Diospaj puntajlla caspicunamari ñucapi shayacun. Chai caspi venenomari ñucataca tucuchicun. Taita Dios cachashca jatun manchaihuan huañucunica.

⁵¿Urcu burroca q'uihuapi shayacushca jahua huacanchu? ¿Huagrapish q'uihuata micushca jahua huacanchu?

⁶¿Cachi illaj micunaca micurinllachu? ¿Yuraj lulunllata micujpica mishquinchu?

⁷Ñuca mana munashcallatatajmi cunanca micucuni.

⁸¡Pitaj ñuca mañashcataca cunaman shamungari! ¡Diosca ñuca munashcata cuhuajpichari alli canman!

⁹Taita Diosca ñucata shuj cutin ñutushpachari alli canman. Paipaj maquita chutashpa ñucata shuj cutin tucuchijpichari.

¹⁰Mana ashtahuan shuyashpa, jatun nanaihuan utca huañuchijpichari, ñucaca samariman. Jucha illaj ñuca Dios rimashcatapish ña mana ashtahuan c'ariyaimanchu.

¹¹Ñucaca fuerzata charishpachu ashtahuan ahuantashari. Imapaj cashna tucushcata yachashpachu ashtahuan shuyashari.

¹²Ñucaca manamari rumi shina sinchi canichu. Ñuca aichapish manamari bronce shinachu.

¹³Ñucapajllatajpish imapaj mana valinichu. Ñucata pi ayudajpish mana tiyanchu. ¿Chaica manachu chashna imatagari?

¹⁴Tucuita Mandaj Diosta mana cazuj, manchai illaj runatapish llaqui tucujpica, paipaj rijsishca runaca cushichintajmari.

¹⁵Ashtahuanpish ñucataca, ñuca huauquicunallatajmari yacu jundai shamuj shina llaquichincuna. Manchanayaj jatun yacu shamushpa, pacashca shinallamari.

¹⁶Paicunaca casa tapashca tiyacuj yacu shinami. Rasu tapashca tiyacuj yacu shinami.

¹⁷Casaca rupai shamujpica yacuyanllami, punlla cunujyajpica maipi cashcamanta chingarinllami.

¹⁸Maita tandalla ricushpapish, caita chaita chaupirishpa rinllami. Asha asha chaquirishpa tucui chingarinllami.

¹⁹Chai yacucunataca Temán llajtamanta purijcunapish chaparacurcami, Sabá llajtamanta purijcunapish shuyacurcami.

²⁰Ashtahuanpish paicuna shuyacushca mana ricurijpica pingarircacunami. Chai yacucuna tiyashcaman chayashpaca, yacutaca mana japircacunachu.

²¹Cunan cancunapish chai yacucuna shinami canguichij. Jatun llaquita apacujta ricushpaca, ashtahuanpish mancharinguichijmari.

²²Cancunapaj haciendamanta imallatapish apamushpa ñucaman cuhuaichigari.

²³Ñucata llaquichicujpaj maquimanta cacharichichigari, huañuchijcunamanta quishpichihuaichigari ¿nishcanichu imatagari?

²⁴Ñuca upallaringapajca, ñucata yachachihuaichigari. Imapi pandarishca cajpica, yuyachihuaichigari.

²⁵¡Alli shimicunaca shunguta cushichinmi! Ashtahuanpish cancuna jarcashpa rimashcaca imata mana nisha ninchu.

²⁶¿Cancunaca ñuca llaquihuan musparicushpa rimarishca huaira shina chingarijlla shimicunamantachu jarcashpa rimanguichij?

²⁷Cancunaca yaya mama illajtaca p'iñanguichijmi. Cancunapaj alli rijsishcapajmari, pambana jutcuta allashcanguichij.

²⁸¿Cancunapaj ñaupajpica ima llullatachu rimacuni imatagari? Ñuca ñahuita ricuichigari.

²⁹Yuyaita japichigari, ama mana allita ruraichijchu. Ñucataca cashcata ruraj cashcata alli yuyarichigari.

³⁰¿Ñuca c'alluhuanca millai shimicunatachu rimani imatagari? Ñuca shimimanta mapa shimicuna llujshijpica, ñucallataj yachaimanmari.