Read Chimborazo Highland Quichua JOB 7 Bible Online

JOB 7 - Chimborazo Highland Quichua bible

JOB 7

¹Cai pachapi causaj runaca shaicuitami imatapish rurashpa causan. Paipaj punllacunaca, trabajaj runapaj punllacuna tucuricuj shinami tucuricun.

²Servij runaca, llandurisha nishpami shungu llujshin. Trabajaj runapish, samaringapaj chishiyachunmi shuyan.

³Cai tucui uni quillacunata jatun llaquita apacushpaca, chashnami carcani. Llaquinayajta sirichunpish tutacunataca yupashcatami curca.

⁴Siricushpaca: ¿Ima horastaj jatarishari? ninimi. Ashtahuanpish yallitaj uni tutami tucun. Chaimantami pacaringacama achca yuyaicunahuan musparicunilla.

⁵Ñuca aichaca c'urucunahuan, caspiyashca allpacunahuan jundami. Ñuca aicha carapish carahuan chaquishpa ashnacunmari.

⁶Ñuca causaica, ahuaj runapaj lanzaderatapish yallimari callpacun. Imata mana shuyai tucunichu, ashtahuanpish ñallamari huañugrini.

⁷Taita Dioslla, alli yuyariyari ñuca causaica huaira shinallamari. Ñuca ñahuicunahuanca, ña mana alli causaita ricushachu.

⁸Ñucata ricujcunapish ñucataca, mana ashtahuan ricungacunachu. Can ñucata ricujpipish, ñucaca ña mana ricurishachu.

⁹P'uyuca ricurishcahuan chingarinllami. Chashnallataj maijanpish Seolman uriyashpaca, mana cutin llujshi tucungachu.

¹⁰Mana cutin paipaj huasiman tigrangachu. Pai maipi causashcatapish ña mana cutin ricungachu.

¹¹Chaimanta ñuca shimitaca, mana huichcashachu. Yuyaipi llaquihuan huañucushcamantaca rimacushallami. Tucui shunguhuan huacashpami, canmanca huillacushalla.

¹²Ñucaca mana mama cucha shina p'iña canica, mana mama cuchapi tiyaj manchanana jatun animal shina canica. ¿Imamantataj ñucata chapachun chapajta chaparacunguiyari?

¹³Ñucaca: Camapica ashallatapish samarishpa cushicushapishchari, camapi dormirishpaca cai tucui llaquicunata cungarishapishchari yuyashpami siririni.

¹⁴Ashtahuanpish mancharina muscuicunatamari ricuchihuangui. Muscuipi shina chaicunata ricuchishpamari manchachihuangui.

¹⁵Chaimantami ñuca yuyaipica, cungapi llapijpichari alli caiman yuyarcani. Causanapaj randica, huañunatami munani.

¹⁶Ñuca causaitaca p'iñanayanmi, manataj huiñaita causashachu. Ñuca causaica yangallami, ña huañuchun saquihuailla.

¹⁷Runaca ima cajpitaj jatunyachinguiyari, ¿ima cajpitaj paipica, cambaj shungutaca churanguiyari?

¹⁸¿Imamantataj cada tutamanta ricuj shamunguiyari? ¿Ima cajpitaj imalla ruracushcataca ricuracunguiyari?

¹⁹¿Maicamataj ñucataca ricuracunguillari? ¿Manachu ch'ucata millpuchunllapish saquihuangui imatagari?

²⁰Runacunata chaparacuj Dioslla, ñuca juchata rurashca cashpapish cantaca ¿imatataj rurashcaniyari? ¿Ima nishpataj ñucataca cambaj puntajlla caspicunahuan shitanguiyari? Ñucapajllatajmari shuj quipi shina tucushcani.

²¹¿Imamantataj ñuca mana cazushcataca mana p'ichanguiyari, ñuca juchatapish mana perdonahuangui? Cunanca allpapimi siririgrini, ñucaca tutamanta can mashcajpipish, ña mana ricurishachu nircami.