Read Chimborazo Highland Quichua SALMOS 102 Bible Online

SALMOS 102 - Chimborazo Highland Quichua bible

SALMOS 102

¹Llaquilla causaj runa Mandaj Diospaj ñaupajpi huacashpa mañashca shimicunami. Mandaj Dioslla, ñuca mañashcata uyahuayari. Ñuca llaquinayajta mingarishcaca quiquinpajman chayachun.

²Ñuca llaquihuan cai punllapica, quiquinpaj ñahuitaca amataj ñucamanta anchuchipaichu. Quiquinpaj rinrinta mañachishpa uyahuayari. Ñuca mañashca punllapitaj cutichihuayari.

³Ñuca causaica cushni shinallamari tucuricun. Ñuca tullucunapish mana tucui rupashca caspi shinamari rupacun.

⁴Ñuca shunguca chugrimari, q'uihua shinamari chaquirishca. Chaimantamari micunatapish cungarishcani.

⁵Aij nishpa huacacushpallamari ñucaca tulluhuan carallahuan tucushcani.

⁶Shitashca pambapi caj pelícano shinamari cani. Chulunllacunapi tiyaj chushij shinamari cani.

⁷Huasi jahuapi pailla tiyacuj pájaro shina tiyacunica. Mana dormi tucunica.

⁸Ñucata p'iñajcunaca punllantamari yanganchincuna. Ñucata chanzata rurajcunaca shujtajcunata llaqui tucushca cachun nicushpapish pai shina llaqui tucushca cachun nincunami.

⁹Micunapaj randica, ushpallatami micuni. Ñuca ubyanatapish huiquihuan chagrutami ubyani.

¹⁰Quiquin yallitaj p'iñarishcamantamari ñucaca chashna tucuni. Jahuaman huichiyachishpamari, ñucataca ucuman shitarcangui.

¹¹Ñuca causaica llandu shinallamari pasacun. Ñucaca q'uihua shinallamari chaquirishcani.

¹²Ashtahuanpish Mandaj Dioslla, quiquinca huiñaitamari tiyangui. Quiquinca huahua huahuacuna yuyaricunallamari cangui.

¹³¡Quiquinca Sionta llaquishpa paimanta shayaringapajmi jataringui! ¡Sionta llaquina punllamari pajtamushca!

¹⁴Quiquinpajta rurajcunaca chai pueblopaj rumimantami huañucuncuna. Chai ñutu allpata llaquishpamari huañucuncuna.

¹⁵Llajtacunaca Mandaj Diospaj shutitaca manchangacunami. Tucui cai pacha jatun mandajcunami quiquin jatun mandajtaca paimi jatun mandaj ningacuna.

¹⁶Mandaj Dios ña Sionta allichijpica, pai jatun cashcami ricuringa.

¹⁷Llaquinayajcuna mañashcata uyana punllami canga. Paicuna rogarishpa mañashcata mana yanganchina punllami canga.

¹⁸Chaicunatapish shamuj huahua huahuacunapajmi quillcanga. Chaicunapaj q'uipa huahuacunami Mandaj Diostaca alabangacuna.

¹⁹Jahuaman caj paipajlla huasimantami ricurca. Mandaj Diosca jahua pachamantami cai pachata ricurca.

²⁰Prezu cajcuna aij nishpa mañashcata uyangapajmi ricurca. Huañunami cangui nishca prezucunata cacharichingapajmi ricurca.

²¹Mandaj Diospaj shutita Sionpi huillachunmi chashna rurarca. Jerusalenpi paita alabachunmi, chashna rurarca.

²²Shujtaj gentecuna, shujtaj llajtacuna tandanacushpa shuj shinalla Mandaj Diospajta rurangapaj tandanacujpi huillachunmi chashna rurarca.

²³Paimari ñucataca chaupi ñanllapi fuerzata quichurca. Paimari ñuca causaitapish uchillayachirca.

²⁴Chaimi ñucaca: “Ñuca Dioslla, ñuca causaitaca chaupillapi ama p'itichu. Quiquinca huiñai huiñaita causajmari cangui”.

²⁵Callaripica quiquinmi cai pachataca rurarcangui. Jahua pachapish quiquinpaj maquihuan rurashcamari.

²⁶Tucui chaicunaca chingaringallami. Ashtahuanpish quiquinca causacunguillami. Tucui chaicunaca churana shina maucayangallami. Shujtaj churanata churachij shinami rurangui. Chaipimi paicunaca mushujyashca canga.

²⁷Quiquin causana huatacunaca manataj tucuringachu. Quiquinca quiquinllataj causacunguillami.

²⁸Quiquinpajta rurajcunapaj huahuacunaca, ima manchai illajllami causangacuna. Paicunapaj huahua huahuacunataca quiquinpaj ñaupajmantaca pi mana cuyuchishcami canga.