Read Chimborazo Highland Quichua SALMOS 104 Bible Online

SALMOS 104 - Chimborazo Highland Quichua bible

SALMOS 104

¹Ñuca almalla, Mandaj Diostaca allimari cangui niyari. Mandaj Dios, ñuca Taita Dioslla quiquinca tucuimanta yalli jatunmari cangui. Achij nicujta mandaj cashcahuan churarishcami cangui.

²Jahua churanata shinaca luzhuan pillurishcami cangui. Jahua pachatapish shuj linsota shina chutajmi cangui.

³Quiquin causana ucucunatapish yacucuna jahuapimi churarcangui. P'uyutapish quiquin purina carrota rurajmi cangui. Huairapaj alascunapi purijmi cangui.

⁴Huairataca quiquinpaj huillashpa purijcunata rurajmi cangui. Nina lunyacujtaca quiquinpajta rurajcuna cachunmi churangui.

⁵Paimi cai pachatapish callari rumicuna jahuapi sinchita churarca. Nunca pi mana cuyuchingachu.

⁶Cai pachataca churanahuan shinami jatun yacuhuan pilluchircangui. Yacucunaca urcucuna jahuatami carca.

⁷Quiquin rimajpica yacucunaca anchurircallami. Quiquin c'ulun nishca uyarijpica utca anchurircallami.

⁸Urcucunamanmi huichiyarca. Pugru pambacunamanmi uriyarca. Quiquin maipi cachun nishcamanmi tandarirca.

⁹Maillata tiyachun quiquin lindeta churashcataca manataj pasangachu. Allpatapish mana cutin tapangachu.

¹⁰Quiquinmari pugyumanta llujshij yacutaca jatun yacuman cachangui. Urcucuna chaupitamari puricun.

¹¹Chai yacutami tucui animalcuna ubyan. Sacha burrocunapish chaitami yacunai pararijta ubyan.

¹²Huairata purij pajarocunapish, chai yacu uricunapimari causan. Chai ramacuna chaupipimi cantancuna.

¹³Paimi urcucunapica paipaj huasimanta tamyachin. Chai tamyahuanmi allpaca sumaj granocunahuan junda tucun.

¹⁴Paimi animalcunapaj q'uihuatapish huiñachin. Gentecunapaj granota p'ucuj q'uihuacunatapish paimi huiñachin. Chaicunamanta micunacunata rurachun,

¹⁵gentecunapaj shunguta cushichij vinota surcuchun, ñahuita achijnicujta ruraj aceitetapish surcuchun, runaman causaita cuj micunata surcunchunpishmi chashna rurarca.

¹⁶Mandaj Diospaj yuracunaca achca yacucunahuan jundami. Líbano urcupi pai tarpushca cedro yuracunapish achca yacucunahuan jundami.

¹⁷Chai yuracunapimi pajarocunapish tazinancuna. Haya yuracunapimi cigüeñacunapish paicunapaj huasita rurancuna.

¹⁸Jatun urcucunataca, sacha chivocunapajmi rurashcangui. Rumi c'acacunataca, cunucuna miticunatami rurashcangui.

¹⁹Lunataca quillacunata ricuchichunmi rurashcangui. Intitapish ima horas huashicunata yachajtami rurashcangui.

²⁰Amsayanatami churangui, chaica tutami. Chaipimi sacha animalcunaca caita chaita callpancuna.

²¹Chaillapitajmi huahua leoncunapish micunata mashcashpa huacarishpa purincuna. Diostaca paicunapaj micunatami mañancuna.

²²Inti llujshijpica, tucui chai animalcunami tigrashpa paicunapaj jutcucunapi yaicurishpa siririncuna.

²³Gentecunaca paicuna imata rurana cashcaman llujshirishpami, chishicama trabajancuna.

²⁴¡Mandaj Dioslla, quiquin rurashcacunaca mana yupai tucuipajmari! Tucui chaicunataca quiquinpaj yachaihuanmari rurashcangui. Cai pachaca quiquin rurashcacunahuan jundamari.

²⁵Ricui, yallitaj jatun mama cuchamari. Chaipica mana yupai tucuipaj yallitaj animalcunami puricun. Jatuncunapish, uchillacunapish animalcunami tiyan.

²⁶Chaipimi barcocunapish huambushpa purin. Chai cuchapi pugllachunca Leviatán animaltapishmi churashcangui.

²⁷Tucui chai animalcunami quiquinta shuyancuna. Paicuna micuna horaspi quiquin carachunmi shuyancuna.

²⁸Quiquinmi micunata cungui. Chaitami paicunaca tandan. Maquita pascashpa sajsajtami carangui.

²⁹Quiquin cambaj ñahuita pacajpica musparincunami. Paicunata samaita quichujpica, huañushpa ñutu allpami tucuncuna.

³⁰Quiquin espirituta cachajpica, cutin mirarinllami. Chashna rurashpami allpapica causaiyuj mushujcunata jundachingui.

³¹Mandaj Dios quiquinpaj sumaj canaca huiñaipaj cachun. Mandaj Dios quiquinpaj rurashcacunapi cushicuyari.

³²Mandaj Dios allpata ricujpica chujchunmi. Urcucunapi tuparijpica cushninmi.

³³Ñuca causaipica Mandaj Diostami cantasha. Ñuca causashcacamaca, salmocunatami ñuca Taita Diosta cantasha.

³⁴Ñuca pai munashcata yuyarishcaca mishquimari. Ñucaca Mandaj Diospimi cushicusha.

³⁵Juchayujcunataca cai pachamanta chingachishca cachun. Diosta mana rijsijcunaca tucui illashca cachun. ¡Ñuca almalla, Mandaj Diosta allimari cangui niyari! ¡Paitamari alabani!