Read Chimborazo Highland Quichua SALMOS 105 Bible Online

SALMOS 105 - Chimborazo Highland Quichua bible

SALMOS 105

¹Mandaj Diosta alabaichigari. Paipaj shutipi mañaichigari. Pai imalla rurashcacunataca, shujtajcunaman yachaj chayachichigari.

²Cantaichigari, salmocunata cantaichigari. Mancharinacunata pai rurashcacunata huillaichigari.

³Jucha illaj Diospaj shutipi cushicuichigari. Mandaj Diosta mashcajcunapaj shungu cushicuchun.

⁴Mandaj Diostapish, pai tucuita rurai tucuj cashcatapish mashcaichigari. Punllanta paipaj ñahuita mashcaichigari.

⁵Mancharinacunata pai rurashcata yuyarichigari. Pi mana rurai tucuipajta rurashcatapish yuyarichigari. Pai mandashca shimicunatapish yuyarichigari.

⁶Cancunaca paipajta ruraj Abrahampaj huahua huahuacunamari canguichij. Jacobpaj huahua huahuacunamari canguichij. Pai agllashcacunamari canguichij.

⁷Paica Mandaj Dios, ñucanchij Taita Diosmari. Paipaj shimicunaca tucui cai pachapimari.

⁸Pai ari nishcapish huiñaita mana cungaripajmi. Pai mandashca shimicunapish huaranga huaranga huahua huahuacunapaj shamucungallami.

⁹Chaitaca Abrahammanmi cusha nirca. Isaacmanpish pajtachishatajmi nircami.

¹⁰Jacobpaj huahuacunamanmi mandashcata curca. Israelcunapaj ari nishcaca huiñaipajmi canga,

¹¹nishpaca: “Canaán llajtataca canmanmi cusha. Cancunapaj allpa cachunmi cusha” nircami.

¹²Paicunaca, ashacunalla cai punllapimi chashna nirca. Chai llajtapica pasajcunalla shina cai punllacunapimi chashna nirca.

¹³Paicunaca llajtan, llajtanmi purircacuna. Llajtan llajtanmi pasarcacuna.

¹⁴Paicunata pi llaquichichunca Diosca mana saquircachu. Paicunata llaquichij jatun mandajcunataca llaquichircami.

¹⁵“Ñuca agllashcacunataca ama tuparinguichij. Ñuca profetacunataca, ama llaquichinguichij” nircami.

¹⁶Chai llajtamanca jatun yaricaitami apamurca. Paicunapaj tucui micunatami chingachirca.

¹⁷Paicunata ñaupashpa richunca shuj runatami cacharca. Shujtajpajta huatashca shina ruraj cachun c'atushca Josetami ñaupashpa richunca cacharca.

¹⁸Paipaj chaquipica grillocunata churachishpami llaquichirca. Paica carcelpi churashcami carca.

¹⁹Pai huillashca shimi pajtangacamami chashna carca. Mandaj Dios rimashcami Josetaca alli cajta mana alli cajta ricuchicurca.

²⁰Jatun mandajmi paita pushamuchishpa carcelmantaca llujshichirca. Chai llajtapi causajcunata mandajmi prezumantaca llujshichirca

²¹Paipaj huasipi mandaj cachunmi churarca. Paipaj imallami carca chaita mandaj cachunmi churarca.

²²Pai churashca mandajcunataca paipaj ima shinami alli can chashna yachachishpa mandachunmi churarca. Paipaj cunaj yuyajcunatapish yachaj cachun yachachichunmi churarca.

²³Chai q'uipaca yaya Israelmi Egiptoman yaicurca. Chaipica Cam nishca llajtapimi Jacobca causarca.

²⁴Chaipimi, Taita Diosca pai agllashcacunataca yallitaj mirachirca. Paicunata p'iñajcunata yalli c'ari c'aricunatami rurarca.

²⁵Chai llajtapi causajcunapaj shungupica pai agllashcacunata p'iñana yuyaitami churarca. Paipajta rurajcunata llaquichinata yuyarichunmi chashna yuyaita churarca.

²⁶Chaimanca paipajta ruraj Moisestami cacharca. Pai agllashca Aarontapishmi cacharca.

²⁷Pi mana rurai tucuipajtapish rimashpalla ruranatami churarca. Cam llajtapica, pi mana rurai tucuipajcunata rurashpami ricuchircacuna.

²⁸Amsatami cacharca, tucuitami amsayachirca. Pai rimashcacunataca pi mana c'ariyarcacunachu.

²⁹Yacucunatapish yahuarman tigrachishpami, chalhuacunatapish huañuchirca.

³⁰Chai llajtapica sapocunatami jundachirca. Jatun mandajcunapaj mandana huasicunacamami jundarca.

³¹Taita Dios rimajpica yallitaj achca chuspicunami shamurcacuna. Tucui chai llajtatami piliscunapish taparca.

³²Tamyapaj randica, rundutami cacharca. Tucui chai llajtamanca lunyacuj ninatami cacharca.

³³Uva chagracunatapish, higo yuracunatapish ñuturcami. Chai llajtapi tiyaj tucui yuracunatapish p'aquircami.

³⁴Taita Dios rimajpica langostacunapish, mana yupai tucuipaj piquicunapishmi shamurcacuna.

³⁵Paipaj llajtapi tiyaj tucui q'uihuatami micurcacuna. Paipaj llajtapi p'ucushcacunatapish tucuimi micurcacuna.

³⁶Paipaj llajtapi cajcunapaj punta huacharishca churicunatami huañuchirca. Paipaj llajtapi cajcunapaj punta fuerzahuan charishca churicunatami huañuchirca.

³⁷Israelcunataca cullquindij, curindijmi llujshichimurca. Paicunapaj aillucunapurapica ungushcacunaca mana tiyarcachu.

³⁸Egipciocunaca israelcunataca jatuntami manchacurcacuna. Paicuna llujshijpica cushicurcacunami.

³⁹Taita Diosca israelcunata tapachunca p'uyutami cacharca. Tutata achijyachichunca ninatami churarca.

⁴⁰Aichata mañajpica codornizcunatami cacharca. Jahua pacha tandatami mana nijta cararca.

⁴¹Peña urcutami chaupirca, yacucunami llujshirca. Chaquishca pambacunatapish, jatun yacumi callparca.

⁴²Paipajta ruraj Abrahamman, paipaj jucha illaj shimihuan cushani nishcatami yuyarirca.

⁴³Paipaj cajcunataca cushicuihuanmi llujshichirca. Pai agllashcacunataca cushicuihuanmi llujshichirca.

⁴⁴Paicunamanca shujtaj llajtacunapaj allpacunatami curca. Shujtaj gentecuna tarpushcacunatami japircacuna.

⁴⁵Pai chaitataj pajtachichun nishcacunata huaquichichun, pai mandashcacunata pajtachichunmari chai llajtapi churarca. ¡Paillata alabashunchigari!